ރާއްޖޭގެ ފުޓްބޯޅަ އެސޯސިއޭޝަން އޮފް މޯލްޑިވްސް )އެފްއޭއެމް( އިން އިންތިޒާމް ކޮށްގެން ފުރަތަމަ ފަހަރަށް ރަސްމީ ފުޓްބޯޅަ ދަނޑުގައި ކުރިއަށް ގެންދިޔަ "ވިހި އަހަރުން ދަށުގެ އެފްއޭ ކަޕް" ފުޓްބޯޅަ މުބާރާތުގެތަށި މާޒިޔާ ސްޕޯޓްސް އެންޑް ރެކްރިއޭޝަން އިން ކާމިޔާބު ކޮށްފިއެވެ.
ފައިނަލްގައި ހޯމަ ދުވަހުގެ ރޭ ނިއުރޭޑިއަންޓް ސްޕޯޓްސް ކުލަބާއި ބައްދަލުކޮށް، މާޒިޔާ ތަށި އުފުލާލީ މެޗްގެ 24 ވަނަ މިނެޓްގައި މުޙައްމަދު ޝާން ނިއުގެ ގޯލްދާގަޑުގައި ތަތްކޮށްލި ބޯޅައިންނެވެ.
އެފްއޭ ކަޕް ފުރަތަމަ ކާމިޔާބުކުރި ޓީމުގެ ޝަރަފް މާޒިޔާ ހޯދިއިރު، އެޓީމް މުބާރާތުގައި ކުޅުނު އެއްވެސް މެޗަކުން ބަލިވެފައެއް ނުވެއެވެ.
މިއަހަރު ރާއްޖޭގައި އެންމެ ބޮޑު ފުޓްބޯޅަ ލީގް "ދިރާގް ދިވެހި ލީގް" ކުޅޭ އަށް ކުލަބްގެ ތެރެއިން 20 އަހަރުން ދަށުގެ އެފްއޭކަޕުގައި ބައިވެރިވެފައި ވަނީ ޖުމްލަ ހަތް ޓީމެވެ. އަދި މުބާރާތިގައި ބައިވެރި ވެފައި ނުވަނީ ވިޔަންސާ އެވެ.
ފައިނަލް މެޗަށްފަހު މުބާރާތް ކާމިޔާބު ކުރި މާޒިޔާގެ ޝަރަފްވެރި ތަށި އެޓީމާ ހަވާލުކޮށްދެއްވީ ކުރީގެ އެންމެ މޮޅު ފުޓްބޯޅަ ކުޅުންތެރިޔާ އަދި ނިއުގެ ކެޕްޓަން މޫސާ މަނިކު )ކުޑަމޫސަ( އެވެ. އަދި މުބާރާތުގެ އެހެނިހެން ވަނަތަކަށް ވެސް ހަދާނީ ލިއުމާއި މެޑަލް ދެއްވީ ކުޑަ މޫސައެވެ.
މިމެޗް ބައްލަވާލުމަށް ޓަކައި އެފްއޭއެމްގެ ރައީސް އަލީ އާޒިމްގެ އިތުރުން އެއިދާރާގެ އިސް ބޭފުޅުން ދަނޑަށް ވަޑައިގެން ނެވި އެވެ.
މެޗަށް ފަހު އޮތް އިނާމު ދިނުމުގެ ރަސްމިއްޔާތުގައި މުބާރާތުގެ އެންމެ މޮޅު ތިން ކުޅުންތެރިން ވެސް ވަނީ ހޮވައިފައެވެ. އެގޮތުން އެކުޅުންތެރިން ނަކީ ރަނަރަޕް ނިއުގެ ކެޕްޓަން އަލީ ހައިޝަމް އާއި ވެލެންސިއާގެ ކެޕްޓަން އަބްދުލްވާހިދު )ވާޑް( އަދި މާޒިޔާގެ މުހައްމަދު ތަސްމީނެވެ. އެންމެ ގިނަ ލަނޑު ޖެހި ކުޅުންތެރިއާގެ މަގާމަށް ހޮވުނީ ހައިޝަމް އާއި ނިއުގެ ފޯވަޑް އަބްދުލް ބާސިތެވެ. މި ދެ ކުޅުންތެރިން ވެސް ޖެހީ ހަތަރު ލަނޑެވެ. މުބާރާތުގެ އެންމެ މޮޅު ގޯލްކީޕަރަކަށް ހޮވުނީ މާޒިޔާގެ އިސްމާއިލް ފާތިހެވެ. ފެއާ ޕްލޭ ޓީމަކީ މާޒިޔާ އެވެ.
date_range
ހޯމަ 25 ނޮވެމްބަރ 2024