އިސްތަންބޫލު (އޭޕްރިލް 8): ތުރުކީގެ ބޮސްފަރަސް ސްޓްރެއިޓުން ދަތުރު ކުރަމުން ދިޔަ އާގު ބޯޓެއް ކޮންޓްރޯލު ނުވެގެން ގޮސް އިސްތަންބޫލުގެ އައްސޭރިފަށުގައި ހުރި ތާރީހީ ގެއެއްގައި ޖެހި، އެގެ ސުންނާފަތިވެއްޖެ އެވެ.
މޯލްޓާގެ ދިދަ ޖަހާފައިވާ އެބޯޓު ކޮންޓްރޯލު ނުކުރެވުނީ އޭގެ ހުންގާނު މަސައްކަތް ނުކުރުމުން ކަމަށް އަންދަލޫ ނޫސް އޭޖެންސީން ބުންޏެވެ. އަދި އެހާދިސާއަށް ފަހު އެސަރަހައްދު ބަންދުކޮށް، ބޯޓު ފަހަތަށް ޖެއްސުމަށް ރެސްކިއު ބޯޓުތަކާއި ޓަގު ބޯޓު ބޭނުންކޮށްފައިވާ ކަމަށް އެނޫހުގައިވެ އެވެ.
އެހާދިސާގައި އެއްވެސް މީހަކަށް ވެސް އަދި ތިމާވެއްޓަށް ވެސް ގެއްލުމެއް ނުލިބޭ ކަމަށް އިސްތަންބޫލުގެ އޮފިޝަލުން ބުންޏެވެ.
އެހާދިސާ ހިނގި މަންޒަރު ދައްކުވައިދޭ ވީޑިއޯތަކުން ފެންނަ ގޮތުގައި ބޯޓު އެކްސިޑެންޓުވުމުގެ ސަބަބުން އެގޭގެ ފުރާޅާއި ފުރަތަމަ ފަންގިފިލާ ވަނީ ސުންނާފަތިވެފަ އެވެ.
އަށާރަ ވަނަ ގަރުނުގައި އަޅާފައިވާ އެގެއަކީ މިހާރު ކައިވެނި ހަފްލާތަކާއި ކޮންސެޓުތައް ބާއްވާ ތަނެއް ކަމަށް އެގެއަށް ހާއްސަކޮށްފައިވާ ވެބްސައިޓުގައިވެ އެވެ. (އަކްޖަޒީރާ)