ރާއްޖޭގައި ވަގުފު ތަރައްގީކުރުމަށާއި، ވަގުފު އިމާރާތް ބިނާކުރުމަށް ކުރިއަށް ވުރެ ފުޅާ ދާއިރާއެއްގައި ރާއްޖެއަށް އެހީ ފޯރުކޮށްދޭނެ ކަމަށް އިސްލާމިކް ޑިވެލޮޕްމެންޓް ބޭންކް (އައިޑީބީ)އިން ބުނެފި އެވެ.
މި އަހަރުގެ ހައްޖުގެ އިންތިޒާމުތައް ބެއްލެވުމަށް ޓަކައި ސައުދީ އަރަބިއްޔާ އަށް މިހާރު ކުރައްވަމުން ގެންދަވާ ދަތުރުފުޅުގައި، ރާއްޖޭގެ އިސްލާމިކް މިނިސްޓަރު އަދި އައިޑީބީއަށް ރާއްޖެއިން ކަނޑައަޅާފައި ހުންނަވާ ގަވަރުނަރު ޑރ. އަހްމަދު ޒިޔާދު ބާގިރު ވަނީ، އައިޑީބީގެ ރައީސް ޑރ. ބަންދަރު ބިން އަލް ހާއްޖުއާ ބައްދަލުކުރައްވައިފަ އެވެ.
އެ ބައްދަލުކުރެއްވުމުގައި އިސްލާމިކް މިނިސްޓަރު ވަނީ ރާއްޖޭގައި ހިނގަމުންދާ މަޝްރޫއުތަކާ ބެހޭ މައުލޫމާތު، އއިޑީބީގެ ރައީސްއާ ހިއްސާކުރައްވައިފަ އެވެ.
އެ ބައްދަލުވުމުގައި، އައިޑީބީއިން ވަނީ ރާއްޖޭގައި ވަގުފު ތަރައްގީކުރުމަށާއި ވަގުފު އިމާރާތް ބިނާކުރުމުގައި ކުރިއަށް ވުރެ ފުޅާ ދާއިރާއެއްގައި ފޯރުކޮށްދޭނެ ކަމަށް ބުނެފަ އެވެ.
އިސްލާމިކް މިނިސްޓްރީން މިހާރު ވެސް ދަނީ މާލޭގައި "ދާރުލްއީމާން"ގެ ނަމުގައި ވަގުފު އިމާރާތެއް ހިންގަމުންނެވެ. އެ އިމާރާތް ހުންނަނީ މާލޭގެ ރަސްފަންނު ކައިރިން، މަޖީދީމަގުގަ އެވެ.
އަދި އައިޑީބީ އިން ރާއްޖެއަށް ސިއްހީ އަދި ތައުލީމީ ދާއިރާއިން އިތުރަށް އެހީ ފޯރުކޮށްދިނުމާ ބެހޭ ގޮތުން ދެބޭފުޅުން މަޝްވަރާކުރެއްވި އެވެ.
އެ ބައްދަލުވުމުގައި ހައްޖު ކޯޕަރޭޝަންގެ ޗެއާމަންކަން ކުރައްވާ އިސްލާމިކް މިނިސްޓްރީގެ ޑެޕިއުޓީ މިނިސްޓަރު މުހައްމަދު ރަޝީދު އިބްރާހިމް ރަޝީދު ވެސް ބައިވެރިވެވަޑައިގެންނެވި އެވެ.