މާލެ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)އިން ރާއްޖޭގެ އެކި ކަންކޮޅުތަކުގައި ހިންގަމުންދާ ފެނާއި ނަރުދަމާގެ މަޝްރޫއުތައް، މި އަހަރުގެ ރިޔާސީ އިންތިޚާބުގެ ކުރިއަށް ނިންމުމުގެ މަސައްކަތް ކުރާ ކަމަށް އެކުންފުނިން ބުނެފި އެވެ.
މިއަދު ފާހަގަކުރާ ދުނިޔޭގެ ފެނުގެ ދުވަހުގެ މުނާސަބަތުގައި ބޭއްވި ރަސްމިއްޔާތެއްގައި އެކުންފުނީގެ މެނޭޖިންގް ޑިރެކްޓަރު އިބްރާހިމް ފަޒުލް ރަޝީދު ވިދާޅުވީ މިދިޔަ ހަތަރު އަހަރު ދުވަހުގެ ތެރޭގައި އެކުންފުނިން ފެނާއި ނަރުދަމާގެ 54 މަޝްރޫއެއްގެ މަސައްކަތްތައް އެކި މަރުހަލާތަކުގައި ކޮށްފައިވާނެ ކަމަށެވެ.
އޭގެ ތެރެއިން 26 މަޝްރޫއެއް ނިންމައި، ސަރުކާރާ ހަވާލުކޮށްފައި ވާނެ ކަމަށް ފަޒުލް ވިދާޅުވި އެވެ. އެ 26 މަޝްރޫއުގެ ތެރޭގައި ހިމެނެނީ ފެނުގެ 13 މަޝްރޫއަކާއި ނަރުދަމާގެ 13 މަޝްރޫއެއް ކަމަށް އޭނާ ފާހަގަކުރެއްވި އެވެ.
"މިވަގުތު [އަޅުގަނޑުމެން އަތުގައި އޮތް] 25 އެއްހާ ޕްރޮޖެކްޓުގެ ތެރެއިން ގާތްގަނޑަކަށް 15 ޕްރޮޖެކްޓެއް ހަވާލުކުރުމުގެ މަސައްކަތް ކުރަމުން ދާ އިރު، ދެން އޮތީ ވަރަށް މަދު ޕްރޮޖެކްޓުތަކެއް،" ފަޒުލް ވިދާޅުވި އެވެ.
"މި މަސައްކަތްތައް ރިޔާސީ އިންތިޚާބު އައުމުގެ ކުރިން ނިންމުމަށް ކުރެވެން ހުރި ހުރިހާ މަސައްކަތެއް މި ދަނީ ކުރަމުން،" އޭނާ ވިދާޅުވި އެވެ.
ފަޒުލް ވިދާޅުވީ ދެމެހެއްޓެނިވި ގޮތެއްގައި ރައްޔިތުންނަށް ރައްކާތެރިކަމާ އެކު ފެން ފޯރުކޮށްދިނުމަކީ އެމްޑަބްލިއުއެސްސީގެ މުވައްޒަފުންގެ ކަށީގައި ހަރުލާފައި ހުރި ކަމެއް ކަމަށެވެ. އަދި ދާއިމީ ގޮތެއްގައި ފެނުގެ ރައްކާތެރިކަން ދެމެހެއްޓުމަށް ޓަކައި ސަރުކާރާ ގުޅިގެން އެކުންފުނިން ކޮށްފައިވާ މަސައްކަތްތަކަކީ ތާރީޚުގައި ވެސް ނުދެކޭފަދަ، ބޮޑެތި އަދި ކާމިޔާބު މަސައްކަތްތަކެއް ކަމަށެވެ.
އޭނާ ވިދާޅުވި ގޮތުގައި އެކުންފުނީގެ ތަރައްގީގެ ޕްލޭނު އެކުލަވާލެވިފައިވާ އިރު، މާލެ ސަރަހައްދުގެ ފެނުގެ ރައްކާތެރިކަން ކަށަވަރުކުރުމަށް ޓަކައި ޗައިނާ-މޯލްޑިވްސް ފްރެންޑްޝިޕް ބްރިޖު މެދުވެރިކޮށް އަޅާ ޕައިޕްލައިނުގެ މަސައްކަތް ވަރަށް ހަލުއިކަމާ އެކު ކުރިޔަށް ދާ ކަމަށެވެ.
އަދި މާލޭގެ ރަައްޔިތުންނަށް ފެނާއި ނަރުދަމާގެ ރައްކާތެރިކަން ފޯރުކޮށްދިނުމަށް ޓަކައި މީގެ ދެ އަހަރު ދުވަސް ކުރިން އެމްޑަބްލިއުއެސްސީން ފަށައިގެން ކުރިއަށް ގެންދާ މަސައްކަތް ވެސް ހުއްޓުމެއްނެތި ކުރިޔަށްދާ ކަމަށް ފަޒުލް ވިދާޅުވި އެވެ.
"ފެނުގެ ސެކިއުރިޓީ ގާއިމުކުރުމަށް އެމްޑަބްލިއުއެސްސީގެ މައި އިމާރާތުގެ އިތުރުން، އިތުރު ދެ ތަނެއްގައި ވޯޓާ ޕްރޮޑަކްޝަން ފެސިލިޓީ ގާއިމުކޮށް ނިމިފައިވާކަން ދަންނަވާލަން،" ފަޒުލް ވިދާޅުވި އެވެ.
އެމްޑަބްލިއުއެސްސީގެ ދަށުން ހިންގާ އައިލެންޑް ބެވެރެޖަސް މޯލްޑިވްސް (އައިބީއެމް)އިން އުފައްދާ "ތާޒާ" ބްރޭންޑުގެ ފެންފުޅިއަކީ ބައިނަލްއަގުވާމީ ޕްރޮޑަކްޓަކަށް ހެދުމަށް މަސައްކަތް ކުރާ އިރު، ތާޒާގެ ޕްރޮޑަކްޝަން ސެންޓަރެއް ގުޅީފަޅުގައި ތަރައްގީ ކުރަމުންދާކަން ވެސް ފަޒުލް ފާހަގަކުރެއްވި އެވެ.