އެއް މެޗެއްގައި އެންމެ ގިނަ ޕޮއިންޓް ނެގި ކުޅުންތެރިޔާގެ ރެކޯޑު، ޓީ ރެކްސް ބާސްކެޓްބޯލް ކްލަބުގެ އިބްރާހިމް ރަޝްވާން (ޗިކޫ) އަނެއްކާވެސް މުގުރާލައިފިއެވެ.
މިއީ މިހާރު ކުޅެމުންދާ އެމްބީއޭޗެމްޕިއަންޝިޕްގައި އެ ރެކޯޑު މުގުރާލި ތިންވަނަ ފަހަރެވެ.
މިއަހަރުގެ މުބާރާތުގައި ފުރަތަމަ ފަހަރަށްވެސް އެ ރެކޯޑު މުގުރާލީ ޗިކޫއެވެ. ޗިކޫ އެ ރެކޯޑު ފުރަތަމަ ފަހަރަށް މުގުރާލީ ޓީ ރެކްސްއިން ލަޔަނަސް ސްޕޯޓްސް ކްލަބާ ދެކޮޅަށް ކުޅުނު މެޗުގައެވެ.
އޭނާވަނީ އެ މެޗުގައި 85 ޕޮއިންޓް ޓީ ރެކްސްއަށް ނަގައިދީފައެވެ. ޗިކޫ އެ މެޗުގައި މުގުރާލީ ކުރިން ޒިލާލް ހަދައިފައިވާ ރެކޯޑެކެވެ. ޒިލާލް އެ ރެކޯޑު ހަދައިފައިވަނީވެސް 2013 ވަނަ އަހަރު ގައުމީ މުބާރާތުގައި ވީ ޔުނައިޓެޑް އަދި އާރުއެލްސީ ވާދަކުރި މެޗުގައެވެ. ޒިލާލް ވަނީ އާރްއެލްސީ އަށް 67 ޕޮއިންޓް ނަގައިދީފައެވެ.
މިއަހަރުގެ މުބާރާތުގައި ޗިިކޫގެ ރެކޯޑު ސްޓިންގާސްގެ މުހައްމަދު ސަބީހުވަނީ 88 ޕޮއިންޓް ނަގައި މުގުރާލައިފައެވެ. ސަބީހު އެ ރެކޯޑު މުގުރާލީ ސްޓިންގާސްއިން ލަޔަނަސް ސްޕޯޓްސް ކްލަބާ ދެކޮޅަށް ކުޅުނު މެޗުގައެވެ.
ރޭ ހާފް ކޯޓު މޯލްޑިވްސްއާ ދެކޮޅަށް ކުޅެ ޓީ ރެކްސް މޮޅުވީ 234 ޕޮއިންޓް 36 ޕޮއިންޓުންނެވެ. މެޗުގައި ޗިކޫވަނީ 110 ޕޮއިންޓް ހަދައި ސަބީހުގެ ރެކޯޑު މުގުރާލައިފައެވެ.
އެމްބީއޭ ޗެމްޕިއަންޝިޕްގެ ފިރިހެން ސެމީފައިނަލްގެ މެޗުތައް އަންނަ އާދީއްތަ ދުވަހު އޮންނައިރު، ގްރޫޕް އެކަކުން ސެމީއަށް ދަތުރުކުރީ ޓީ ރެކްސްއާއި ސްޓިންގާސް ބީސީއެވެ.