ޝެފް ގިލްޑް މޯލްޑިވްސް (ސީޖީއެމް) އާއެކު ރާއްޖޭގެ ތިން ޝެފުން ގަލްފްގައި ބާއްވާ އެންމެ ބޮޑު ކަލިނަރީ ޗެލެންޖް "ގަލްފޫޑް"ގައި ބައިވެރިވެއްޖެއެވެ.
ދުބާއީގައި އިއްޔެ ފަށައިގެން ހަތަރު ދުވަހުގެ މުއްދަތަށް ކުރިއަށްދާ އެ ޗެލެންޖްގައި ރާއްޖެއިން ބައިވެރިވެފައިވަނީ، ބަރޮސް މޯލްޑިވްސްގައި މަސައްކަތް ކުރާ ޝެފް އިބްރާހިމް ނާތިފް، ޕެރަޑައިސް އައިލެންޑް ރިސޯޓްގައި މަސައްކަތްކުރާ ޝެފް ޔޫސުފް ނާސިމް ހުސައިން އަދި ހުޅުލެ އައިލެންޑް ހޮޓެލްގެ ޝެފް އިބްރާހިމް ނައީމް އެވެ.
ސަން އަން މައުލޫމާތު ދެއްވަމުން ސީޖީއެމްގެ ފަރާތުން ބުނީ، ދުބާއީގައި ބާއްވާ އެ ޗެލެންޖުގައި ބައިވެރިވުމަށް ހޮވާފައިވާ ތިން ޝެފުންނަކީ މިދިޔަ އަހަރު ބޭއްވި ފޫޑް އެންޑް ހޮސްޕިޓާލިޓީ އޭޝިއާ މޯލްޑިވްސް (އެފްއެޗްއޭއެމް) ގައި ބައިވެރިވި ޝެފުންގެ ތެރެއިން އެންމެ މޮޅު ތިން ޝެފުން ކަމަށެވެ.
ސީޖީއެމް އިން ބުނީ، އިއްޔެ ގަލްފޫޑް ކަލިނަރީ ޗެލެންޖް ފަށާފައިވާއިރު އޭގެ ތެރެއިން އިއްޔެ ބޭއްވި "ހޮޓް ކުކިން ބީފް" ޗެލެންޖްގެ ބައިން އިބްރާހިމް ނާތިފް ގޯލްޑް މެޑަލް ހޯދައިފަވާ ކަމަށެވެ. އިބްރާހިމް ނާތިފް އަކީ އެފްއެޗްއޭއެމް އިންވެސް އެއްވަނަ ހޯދައިފަވާ ޝެފްއެވެ.
ގަލްފޫޑް ކަލިނަރީ ޗެލެންޖުގެ "ހޮޓް ކުކިން ބީފް" ޗެލެންޖުން ގޯލްޑް މެޑަލް ހޯދި ޝެފް އިބްރާހިމް ނާތިފް --
ގަލްފޫޑް އަކީ ގަލްފުގެ ގައުމުތަކުގައި ކޮންމެ ދެ އަހަރަކުން އެން އަހަރު ބާއްވަމުން އަންނަ ގަލްފުގެ ގައުމުތަކުގެ އެންމެ ބޮޑު ކަލިނަރީ ޗެލެންޖެވެ. އޭގައި ދުނިޔޭގެ އެކި ގައުމުތަކުން އެކި ކެޓަގަރީގައި 3000 އަށްވުރެ ގިނަ ޝެފުން ބައިވެރި ވެއެވެ.
ގަލްފް ސަރަހައްދުގައި ބާއްވާ ކަލިނަރީ ޗެލެންޖްގައި ރާއްޖެއިން ބައިވެރިވި މިއީ ފުރަތަމަ ފަހަރުކަމަށް ސީޖީއެމްއިން ބުންޏެވެ.