ގައުމީ ބާސްކެޓް ބޯޅަ އެސޯސިއޭޝަން (އެމްބީއޭ) ޗެމްޕިއަންޝިޕްގެ ސެމީ ފައިނަލަށް ކިންގްސް ބާސްކެޓްބޯލް ކްލަބު އަދި ޓީ ރެކްސް ބާސްކެޓްބޯލް ކްލަބު ދަތުރުކޮށްފިއެވެ.
އެމްބީއޭ ޗެމްޕިއަންޝިޕްގެ ފިރިހެން ޑިވިޝަންގައި މިއަހަރު 12 ޓީމަކުން ވާދަކުރާއިރު، މުބާރާތް ކުރިއަށްދާނީ ދެ ގްރޫޕަކަށް ބަހައިލައިގެންނެވެ. ސެމީގައި ކުޅޭނީ ގްރޫޕް އެކެއްގެ އެއްވަނަ އާއި ގްރޫޕް ދެއެއްގެ ދެވަނައެވެ. އަދި ގްރޫޕް އެކެއްގެ ދެވަނަ އާއި ގްރޫޕް ދެއެއްގެ އެއްވަނައެވެ.
މުބާރާތުގައި މިހާތަނަށް ކުޅުނު ހަތަރު މެޗުވެސް ކާމިޔާބުކޮށް ކިންގްސް ބީސީން ސެމީ ކަށަވަރުކޮށްފައިވަނީ ގްރޫޕް އެކެއްގެ އެއްވަނަ ޓީމުގެ ގޮތުގައެވެ. މުބާރާތުގެ ގްރޫޕް ސްޓޭޖުގައި ކިންގްސްއަށް އަދި ބާކީ އެއް މެޗުވެސް އެބައޮތެވެ.
ގްރޫޕް ސްޓޭޖުގައި ރޭ ކިންގްސް ބީސީ ކުޅުނު މެޗުގައި ރޯޔަލްސް ބާސްކެޓް ޓީމު ބަލިކުރީ 88 ޕޮއިންޓް 83 ޕޮއިންޓުންނެވެ. މެޗުގެ މޮޅު ކުޅުންތެރިއަކަށް ހޮވުނީ ރޯޔަލްސް ބީސީގެ މުހައްމަދު ނާއިފް ރުޝްދީއެވެ.
ގްރޫޕް އެކެއްގެ ދެވަނަ ޓީމުގެ ގޮތުގައި ސެމީއަށް ދިއުމުގެ ފުރުސަތު ރެޕްޓާސް ބާސްކެޓް ބޯލް ކްލަބު އަދި ރޯޔަލްސް ބީސީއަށް އޮތްއިރު، އިއްޔެ ކުޅުނު މެޗުގައި އެޗްޑީސީ އަތުން ބަލިވެ ރެޑްވިންގަށްވެސްވަނީ ސެމީގެ ފުރުސަތު ގެއްލިފައެވެ.
ޓީ ރެކްސްއިން ސެމީގެ ޖާގަ ހޯދާފައިވަނީ ކުޅުނު ތިން މެޗު ކާމިޔާބުކޮށްގެންނެވެ. ޓީ ރެކްސްއަށް އަދި ގްރޫޕް ދެއެއްގައި ބާކީ ދެ މެޗު އޮތްއިރު، ގްރޫޕްގެ އެއްވަނަ ކަށަވަރުވާނީ މިއަދު އަދި މާދަމާގެ މެޗުތަކަށް ފަހުގައެވެ.
މުބާރާތުގެ އަންހެން ޑިވިޝަންގެ މެޗުތައްވެސް މިހާރު ކުރިއަށްދާއިރު، ސައިކްލޯންއިންވަނީ ކުޅުނު ދެ މެޗުވެސް ކާމިޔާބުކޮށްފައެވެ. ހަތަރު ޓީމު ވާދަކުރާ އަންހެން ޑިވިޝަންގައި ޖިބިލީ ސްޕޯޓްސް ކްލަބު އަދި ރެޑްވިންގްސް ބީސީން ކުޅުނު ދެ މެޗުގެ ތެރެއިން އެއް މެޗު، ކޮންމެ ޓީމަކުންވެސް ވަނީ ކާމިޔާބުކޮށްފައެވެ.
މިއަދު އޮންނާނީ މުބާރާތުގެ ފިރިހެން ޑިވިޝަން ދެމެޗެވެ. ހާވިރު އޮންނާނީ ގްރޫޕް ދެއެއްގެ މެޗެއް ކަމަށްވާ ހާފް ކޯޓު މޯލްޑިވްސް އާއި އެލްކިއު ވާދަކުރާ މެޗެވެ. މިރޭ އޮންނާނީ ގްރޫޕް އެކެއްގެ މެޗެކެވެ. ވާދަކުރާނީ ރެޕްޓާސްއާއި ޑަބްލިއު ސްޕޯޓްސް އެކަޑެމީއެވެ.