ގައުމީ ބާސްކެޓް ބޯޅަ އެސޯސިއޭޝަން (އެމްބީއޭ) ޗެމްޕިއަންޝިޕްގައި ހާފް ކޯޓާއި އެލްކިއު ސްޕޯޓްސް ކްލަބުން ފެށުން ރަނގަޅުކޮށްފިއެވެ.
ކުޅިވަރު އެކުވެނީގެ އެތެރެވެށީ ކޯޓުގައި ކުރިއަށްދާ 26 ވަނަ އެމްބީއޭ ޗެމްޕިއަންޝިޕްގައި އިއްޔެ ކުޅުނީ ގްރޫޕް ދޭއްގެ ދެ މެޗެވެ.
އިއްޔެ ހަވީރު ކުޅުނު މެޗުގައި ވާދަކުރީ ސީބީއެލް ސްޕޯޓްސްއާއި ހާފް ކޯޓެވެ. މި މެޗު ހާފް ކޯޓުން ކާމިޔާބުކުރީ 59 ޕޮއިންޓް 39 ޕޮއިންޓުން ސީބީއެލް ބަލިކޮށްގެންނެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ހާފް ކޯޓަށް 15 ޕޮއިންޓް ނަގައިދިން މުހައްމަދު ހާޝިމްއެވެ.
މުބާރާތުގައި ރޭ ކުޅުނު މެޗުގައި ވާދަކުރީ ލަޔަނެސް ސްޕޯޓްސް ކްލަބާއި އެލްކިއު ސްޕޯޓްސް ކްލަބެވެ. މި މެޗު 82 ޕޮއިންޓް 34 ޕޮއިންޓުން ކާމިޔާބުކުރީ އެލްކިއު ސްޕޯޓްސް ކްލަބެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ އެލްކިއުއަށް 15 ޕޮއިންޓް ނަގައިދިން އަހުޒަމް އިބްރާހީމެވެ.
މިއަހަރުގެ ބާސްކެޓް ބޯޅަ އެސޯސިއޭޝަން ޗެމްޕިއަންޝިޕްގެ ފިރިހެން ޑިވިޝަންގައި ޖުމްލަ 12 ޓީމު ވާދަކުރާ އިރު، މުބާރާތް ކުރިއަށްދާނީ ދެ ގްރޫޕަކަށް ބަހާލައިގެންނެވެ. ކޮންމެ ގްރޫޕަކުން ވެސް އެއްވަނަ އަދި ދެވަނަ ޓީމަށް ސެމީ ފައިނަލްގެ ޖާގަ ލިބެނޭއެވެ. ފިރިހެން ޑިވިޝަންގެ ފުރަތަމަ ސެމީފައިނަލްގައި ވާދަކުރާނީ ގްރޫޕް އެކެއްގެ އެއްވަނައާއި ގްރޫޕް ދެއެއްގެ ދެވަނައެވެ. ދެވަނަ ސެމީފައިނަލްގައި ވާދަކުރާނީ ގްރޫޕް ދޭއްގެ އެއްވަނައާއި ގްރޫޕް އެކެއްގެ ދެވަނައެވެ.
މުބާރާތުގެ ފިރިހެން ޑިވިޝަންގެ ދެ މެޗު މިއަދުވެސް އޮންނާނެއެވެ. މިއަދު އޮންނާނީ ގްރޫޕް އެކެއްގެ ދެމެޗެވެ. އެގޮތުން ހަވީރު އޮންނަ މެޗުގައި ވާދަކުރާނީ ކިންގްސް ބީސީއާއި ޑަބްލިއު ސްޕޯޓްސް އެކަޑެމީއެވެ. މިރޭ އޮންނަ މެޗުގައި ވާދަކުރާނީ ރެޕްޓާސް ބީސީއާއި ރެޑްވިންގްސް ބީސީއެވެ.