ގައުމީ ބާސްކެޓް ބޯޅަ އެސޯސިއޭޝަން (އެމްބީއޭ) ޗެމްޕިއަންޝިޕްގައި އިއްޔެ ހަވީރު ކުޅުނު މެޗު ކްލަބު ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން ކާމިޔާކުރިއިރު، ރޭ ކުޅުނު ގްރޫޕް ދެއެއްގެ ފުރަތަމަ މެޗު ޓީ-ރެކްސް ބާސްކެޓްބޯލް ކްލަބުން ކާމިޔާބުކޮށްފިއެވެ.
ޒުވާނުންގެ މަރުކަޒުގެ އެތެރެވެށީ ކޯޓުގައި ކުރިއަށްދާ މުބާރާތުގައި އިއްޔެ ހަވީރު ކުޅުނު ގްރޫޕް އެކެއްގެ މެޗުގައި ވާދަކުރީ ކްލަބު އެޗްޑީސީއާއި ޑަބްލިއު ސްޕޯޓްސް އެކަޑެމީއެވެ. މި މެޗު އެޗްޑީސީން ކާމިޔާބުކުރީ 84 ޕޮއިންޓް 57 ޕޮއިންޓުންނެވެ. އެ މެޗުގެ މޮޅު ކުޅުންތެރިޔަކަށް ހޮވިފައިވަނީ ކްލަބު އެޗުޑީސީއަށް 20 ޕޮއިންޓް ނަގައިދިން އާސިފް އިބުރާހީމެވެ.
ރޭ ކުޅެފައިވަނީ މުބާރާތުގެ ގްރޫޕް ދެއެއްގެ ފުރަތަމަ މެޗެވެ. ވާދަކުރީ ޓީ-ރެކްސްއާއި ސްޓިންގާސް ބާސްކެޓްބޯލް ކްލަބެވެ. އެ މެޗު ޓީ-ރެކްސްއިން ކާމިޔާބުކުރީ 94 ޕޮއިންޓް 66 ޕޮއިންޓުންނެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ޓީ-ރެކްސްއަށް 15 ޕޮއިންޓް ނަގައިދިން އަހުމަދު ޒަބީރެވެ.
މިއަހަރުގެ ބާސްކެޓް ބޯޅަ އެސޯސިއޭޝަން ޗެމްޕިއަންޝިޕްގެ ފިރިހެން ޑިވިޝަންގައި ޖުމްލަ 12 ޓީމު ވާދަކުރާއިރު، މުބާރާތް ކުރިއަށްދާނީ ދެ ގްރޫޕަކަށް ބަހާލައިގެންނެވެ. ކޮންމެ ގްރޫޕަކުން ވެސް އެއްވަނަ އަދި ދެވަނަ ޓީމަށް ސެމީ ފައިނަލްގެ ޖާގަ ލިބެނޭ އެވެ. ފިރިހެން ޑިވިޝަންގެ ފުރަތަމަ ސެމީފައިނަލްގައި ވާދަކުރާނީ ގްރޫޕް އެކެއްގެ އެއްވަނައާއި ގްރޫޕް ދެއެއްގެ ދެވަނަ އެވެ. ދެވަނަ ސެމީފައިނަލްގައި ވާދަކުރާނީ ގްރޫޕް ދޭއްގެ އެއް ވަނަ އާއި ގްރޫޕް އެކެއްގެ ދެވަނަ އެވެ.
މުބާރާތުގެ ގްރޫޕް ސްޓޭޖުގެ ދެ މެޗު މިއަދުވެސް އޮންނާނެވެ. މިއަދު އޮންނާނީ ގްރޫޕް ދެއެއްގެ ދެމެޗެވެ. ހަވީރު އޮންނާނީ ސީބީއެލްއާއި ހާފް ކޯޓު މޯލްޑިވްސް ވާދަކުރާ މެޗެވެ. މިރޭ އޮންނާނީ އެލްކިއު ސްޕޯޓްސްއާއި ލައިނެސް ސްޕޯޓްސް ކްލަބު ވާދަކުރާ މެޗެވެ.
ގައުމީ ބާސްކެޓް ބޯޅަ އެސޯސިއޭޝަން ޗެމްޕިއަންޝިޕްގެ އަންހެން ޑިވިޝަންގެ ކުޅުން ފަށާނީ އަންނަ ހޯމަ ދުވަހު ހަވީރު އެވެ. އެ ވާދަކުރާނީ ސައިކްލޯން ބީސީ އަދި ޖިބިލީ އެސްސީއެވެ. އަންހެން ޑިވިޝަންގައި ބައިވެރިވެފައިވަނީ ހަތަރު ޓީމެވެ.