ފީފާ ވޯލްޑް ކަޕު އޮރިޖިނަލް ޓްރޮފީ މިވަގުތު ހުރީ ދިވެހި ފަސްގަނޑުގައެވެ. މިއީ އަހަރެމެންނަށް މީގެ ކުރިން ތަސައްވަރުވެސް ކޮށްނުލޭ ދުވަހެކެވެ. ދިވެހިރާއްޖެ ފަދަ ކުޑަކުޑަ ގައުމަކަށް ދުނިޔޭގެ ހުރިހާ ގައުމަކުން ވާދަކުރާ ފީފާ ވޯލްޑް ކަޕުގެ ޝަރަފުވެރި ތަށި ގެނައި ދުވަހެއްވެސް މިއޮތީ އައިސްފައެވެ.
ކޮކާކޯލާގެ ހެޔޮއެދުމާއެކު ފީފާއިން ކުރިއަށް ގެންދާ ފީފާ ވޯލްޑް ކަޕު ޓްރޮފީ ޓުއާގެ މަންޒިލެއް ގޮތުގައި ރާއްޖެ ހިމެނުމާއެކު ތަށްޓާއެކު ފޮޓޯ ނެގުމަށް ތައްޔާރު އެތައް ބަޔަކު މިއަދު އެދަނީ އެ އުންމީދު ހާސިލްކުރަމުންނެވެ. މިއަދު ހެނދުނުއްސުރެ މާލޭގެ މާފަންނު ދަނޑުގައި އެތައް ބަޔަކު ކިއު ޖެހެމުންދަނީ ހަމަ އެންމެ ކަމަށެވެ. ފީފާ ވޯލްޑް ކަޕުގެ ޓްރޮފީއާއެކު ފޮޓޯ ނެގުމުގެ ފަހުރަށްޓަކައެވެ.
ވޯލްޑް ކަޕު ޓްރޮފީ ޓުއާ: ޓްރޮފީއާއެކު ފޮޓޯ ނެގުން ފެށިގެން ކުރިއަށްދަނީ --- ސަން ފޮޓޯ/ މުހައްމަދު އަފްރާހް
އިއްޔެ އިރުއޮއްސުނު އިރު ވެލާނާ އިންޓަނޭޝަނަލް އެއާޕޯޓްގައި ޓްރޮފީ ޓުއާގެ ހާއްސަ ޖެޓު ޖެއްސުމާއެކު ދިވެހި ފުޓުބޯޅަ އާއިލާ ހެއްވާލިއެވެ. ޓްރޮފީ ފުރަތަމަ ފަހަރަށް ރާއްޖެއަށް ހުޅުލޭ އެއާޕޯޓުގައި ދައްކާލުމުގެ ޝަރަފުވެރިޔަކީ ދިވެހި ރާއްޖޭގެ ފަސްޓް ލޭޑީ ފާތުމަތު އިބްރާހީމެވެ. އެއާއެކު ފެނުގެންދިޔައީ ތަފާތު މަންޒަރެކެވެ. ތަށްޓަށް މަރުހަބާ ކިޔުމުގެ ގޮތުން ވެލާނާ އެއާޕޯޓަށް ގޮސް ތިބި ހާއްސަ އެހީއަށް ބޭނުންވާ ކުދިންނަށް ވޯލްޑް ކަޕު ތަށްޓާއެކު ފޮޓޯ ނެގުމުގެ ފުރުސަތު ދިންތަނެވެ. އެ ވަގުތު އެކުދިންގެ މޫނުމަތިން ފެނިގެންދިޔައީ އުފާވެރިކަމެވެ. ހިނިތުންވުމެވެ.
ފީފާ ވޯލްޑް ކަޕް ޓްރޮފީ ވެލާނާ އިންޓަނޭޝަނަލް އެއާޕޯޓް ވީއައިޕީ ލައުންޖުގައި ދައްކާލުން --- ސަން ފޮޓޯ/ މުހައްމަދު އަފްރާހް
ޓްރޮފީ ދިވެހި ރައްޔިތުންގެ ޝަރަފުގައި އުފާލާލީ ރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމެވެ. ރޭ ގައުމީ ބޯޅަ ދަނޑުގައި ކުރިއަށް ގެންދިޔަ ކުލަގަދަ ހަފްލާގައި ފެނިގެންދިޔަ އަނެއް މަންޒަރަކީ ދިވެހި ފުޓުބޯޅައަށް ލޯބިކުރާ ކުޑަކުދިންގެ 'ޕެޝަން'އެވެ. ފުޓުބޯޅަ އެކުދިންގެ ހިތުގައި ހުރި މިންވަރެވެ. ހަޅޭކުގެ އަޑާއެކު މުޅިތަން ގުގުމާލި އިރު ފީފާ ޓްރޮފީ ޓުއާގައި ރާއްޖެއަށް ތަށި ގެނެސްދިން ހާއްސަ މެހެމާން ފްރާންސްގެ ފުޓުބޯޅަ ލެޖެންޑް ކްރިސްޓިއަން ކްރެމްބޭއަށް އެ ކުދިން ކިއީ ހޫނު މަރުހަބާއެކެވެ. ކުދިންގެ ޖޯޝު ފެނި ކްރެމްބޭވެސް މުޅި ދަނޑުގައި ދުވެ މަޖާކުރި މަންޒަރު ފެނިގެންދިޔައެވެ.
ފީފާ ވޯލްޑް ކަޕްގެ ޓްރޮފީ ރައީސް ޔާމީން އުފުލާލަނީ --- ސަން ފޮޓޯ/ މުހައްމަދު އަފްރާހް
ރޭއްސުރެ އެތައް ދިވެހިންނެއް ކުރި މަސައްކަތަކީ މި ހާއްސަ ޓްރޮފީއާއެކު ފޮޓޯ ނެގުމަށް ޓިކެޓެއް ހޯދުމުގެ މަސައްކަތެވެ. ރަށްޓެހިންނާ ގާތްތިމާގެ އެންމެނަށް ޓިކެޓު ހަމަކޮށް، މިއަދަށް ތައްޔާރުވިކަން މާފަންނު ސްޓޭޑިއަމްގެ ފޯރިގަދަ މާހައުލުން އެނގެއެވެ. ހޫނު ގަދަނަމަވެސް ކެތްތެރިކަމާއެކު އެތައްބައެއް މަޑުކޮށްލައިގެން ތިބީ ވޯލްޑް ކަޕު ތަށްޓާއެކު ނެގޭ ޝަރަފުވެރި ފޮޓޯއަށެވެ.
ކްރެމްބޭގެ ފުޓުބޯޅައާއެކު ކުޑަކުދިންނަށް އައިސްފައިވަނީ ބޮޑު އީދެކެވެ. ފީފާ ވޯލްޑް ކަޕުގެ މެސްކޮޓް ޒަބީވާކާއެކު ފޮޓޯ ނެގުމާއި، އެކުވެރިން އެއްކޮށްލައި، ކްރެމްބޭއާއެކު ސެލްފީ ނެގުމުގެ މަންޒަރުން ފެނުނީ ދިވެހިން ފުޓުބޯޅައަށް ދޭ ލޯތްބެވެ.
ޓްރޮފީއާއެކު ނެގި ފޮޓޯ ކެމެރާއަށް ދައްކާލަނީ --- ސަން ފޮޓޯ/ މުހައްމަދު އަފްރާހް
ފޮޓޯ ބޫތަށް ވަދެ ނަގާ ފޮޓޯއާއެކު ނުކުންނަ ކޮންމެ މީހެއްގެ މޫނުންވެސް ފެންނަނީ ހިނިތުންވުމެވެ. ފޮޓޯއާ އެކު ނުކުތް މީހުންނާ ވާހަކަ ދައްކާލުމުން ބުނީ މިއީ އަބަދުވެސް ދެކުމުންދިޔަ ހުވަފެނެއް ކަމަށާއި، އެ ހުވަފެން ހަގީގަތަކަށް ވެއްޖެ ކަމަށެވެ. އެތައް ކުދިންނެއް އުފަލާއެކު ބުނަމުންދިޔައީ ވޯލްޑް ކަޕުގެ ޗެމްޕިއަނުންގެ ގޮތުގައި ތަށި އުފުލާލުމަށް އަޒުމް ކަނޑައެޅިއްޖެ ކަމަށެވެ.