ވިހި އަހަރުން ދަށުގެ އެފްއޭ ކަޕް ފުޓްބޯޅަ މުބާރާތުގެ ގްރޫޕް އޭ ފަޅިން ރޭ އޯލް ޔޫތު ލިންކޭޖް )އޭވައިއެލް( އާ ދެ ކޮޅަށް ކުޅުނު މެޗް 3-1 ލަނޑުން ކުލަބް އީގަލްސް އިން ކާމިޔާބުކޮށް ދެ ވަނަ ބުރަށް ދިއުމުގެ ފުރުސަތު އީގަލްސް އިން ބޮޑު ކޮށްފި އެވެ.
ގަލޮޅު ދަނޑުގައި ރޭ ކުޅުނު މިމެޗްގެ ފުރަތަމަ ލަނޑު ޖަހާ ލީޑް ހޯދީ ވެސް މެޗް ކާމިޔާބު ކުރި އީގަލްސް އިން ނެވެ. އެގޮތުން މެޗްގެ ފުރަތަމަ 11 ވަނަ މިނެޓުގައި އީގަލްސްއަށް ލީޑް ނަގައި ދިނީ ކެޕްޓަން އަހުމަދު އިމާޒެވެ. އަދި މެޗްގައި އީގަލްސް އިން ޖެހި އެ ޓީމް ދެ ވަނަ ލަނޑު ފުރަތަ މަހާފްގެ ފަހު މިނެޓުގެ ތެރޭގައި ހުސެން އާތިފް ކާމިޔާބުކޮށްދިން އިރު، އީގަލްސްގެ ތިން ވަނަ ލަނޑު އެ ޓީމަށް ކާމިޔާބު ކޮށްދިނީ މެޗްގެ އެންމެ ފަހު މިނެޓްގެ ތެރޭގައި ޝުހައިދު ސައީދެވެ.
މެޗުން މޮޅުވެ، ތިން ޕޮއިންޓް ކަށަވަރު ކުރި އީގަލްސް ކޮޅަށް، އިދިކޮޅު އޭވައިއެލް އިން ޖެހި ހަމައެކަނި ލަނޑު އެ ޓީމަށް ކާމިޔާބު ކޮށްދިނީ މެޗްގެ 88 ވަނަ މިނެޓުގައި އާދަމް ނަޝްވާން އެވެ.
ދެ ގްރޫޕަކަށް ބަހާލައިގެން ކުރިއަށްދާ މިމުބާރާތުގެ ސެމީ ފައިނަލަށް ދާނީ ކޮންމެ ގުރޫޕަކުން ވެސް އެއްވަނަ އާއި ދެ ވަނަ ޓީމެވެ.
މި މުބާރާތުގައި މިރޭ ކުޅޭނީ ގްރޫޕް ބީ ފަޅިން ވާދަކުރާ މާޒިޔާ އާއި ވީބީ ސްޕޯޓްސް އެވެ.
date_range
ހޯމަ 25 ނޮވެމްބަރ 2024