ހާލުފޮޅި: ކުޅުދުއްފުށީގެ ރަމްޒެއް!

"ތިޔައީ ހާލުފޮޅި ރަށު މީހެއްދޯ" ކުޅުދުއްފުށީ މީހުނަށް ނިސްބަތްކޮށް މީހުން މިހެން ބުނެ އެވެ. ތުނި "ސެލޯފިން" ކޮޅެއް ގޮތަށް އޮންނަ ހާލުފޮޅިއަކީ ކުޅުދުއްފުށީ އެންމެން ރަމްޒް ކޮށްދޭ އެއްޗެކެވެ. ސަބަބުތަކެއް ނެތިއެއް ނޫނެވެ. އެއީ ޒަމާނުންސުރެ ހަމައެކަނި ކުޅުދުއްފުށީގައި ތައްޔާރުކުރާ ކުޅުދުއްފުށީގެ އުފެއްދުމެކެވެ.

"ވަރަށް ދިމާކުރާނެ ތިއީ ހާލު ފޮޅިރަށު މީހެކޭ ކިޔައިގެން، އެމީހުންނަށް ހީވަނީ އަސްލު އަހަރެމެން ރުޅި އަންނާނޭ، އެކަމަކު އަސްލު އުފާވަނީ،" ކުޅުދުއްފުށީ ޒުވާނަކު ބުންޏެވެ.

ކުޅުދުއްފުށީ މީހުން އެ ފޮޅި އަށް "ތުނި ފޮޅި"ކީ ނަމަވެސް އެ ރަށުން ބޭރު މީހުން އެފޮޅިއަށް ކިޔަނީ ހާލުފޮޅި އެވެ. ހާލު ފޮޅި ކިޔައީ ބުރަ މަސައްކަތުން ތައްޔާރުކުރާ ފޮޅިއަކަށް ވުމުން ކަމަށް ބައެއް މީހުންބުނެ އެވެ. ކުޅުދުއްފުއްޓަށް ކުރި މިދަތުރުގައި ހާލުފޮޅި ތައްޔާރުކުރާ އެތައް ބައެއްގެ މަސައްކަތް ވަނީ ފެނިފަ އެވެ. ފެންނަ ފެނުމަށް ތުނިތުނި ފޮޅިއެއް ނަމަވެސް އެއީ ބުރަ މަސައްކަތަކުން ތައްޔާރުކުރާ މަޑު ފޮނި ރަހައެއްގެ ފޮޅިއެކެވެ. ކުޅުދުއްފުށީގެ ގިނަ އަދަދަދެއްގެ އަންހެނުން ކާންބޯން ކުރާ މަސައްކަތެއްގެ ގޮތަށް އެމަސައްކަތް ކުރެ އެވެ.

"މިއީ ބުރަކަމެއް، އެކަމަކު މިކަން ކުރަންވާނެތާ، ޒަމާނުންސުރެ ކުރާ ކަމެއް އަހަރެމެން ހުއްޓާލާފިއްޔާ ހުއްޓޭނެ، އަނެއްކާ މިއީ ހަމައެކަނި މިރަށުގަ ކުރާ ކަމެއް،" ހާލުފޮޅި ތައްޔާރުކުރަން އިނދެ ކުޅުދުއްފުށީ ގެދަމުލިގޭ ހަބީބާ ހަސަން "ސަން"އަށް ކިޔައިދިނެވެ.
http://www.sun.mv/albums/l_21150.jpg
ހާލުފޮޅި ތައްޔާރުކުރުމަކީ ވަރަށް ހާލުގައި ކުރާ މަސައްކަތެކެވެ. ހިނމުންކޮށް ފުނޑާފައި ހުންނަ ހަނޑުލާއި ކުކުޅުބިހާއި ހަކުރުގެ އިތުރުން ހުވަނދުމާ ފެނަކީ އެފޮޅި ހެދުމަށް ބޭނުންވާ އެއްޗިސެވެ. ހާލުފޮޅި އަކީ ވަރަށް މަޑު ގިންޏެއްގައި ފިހާ ފޮޅިއެކެވެ. އެފޮޅި ފިހުމަށްޓަކައި އަލިފާން ޖަހަނީ ކީސް ކުނޑި އަންދައިގެނެވެ. އެފޮޅި ތައްޔާރުކުރާ މީހުން ބުނާގޮތުން ފޮޅި ފިހުމަށްޓަކައި ކުރަން ޖެހޭ އެންމެ ބުރަ ކަމަކީ ދުންއަރާ އުނދުނެއްގެ ބުޑުގައި "ލޮލަށް ދިލަ އަރުވައިގެން އިންނަންޖެހުން" ކަމަށެވެ. މަޑު ގިނީގައި އެ ފޮޅި ފިހުމަށްފަހު އަތްވަށް ވެސް ލާން ޖެހެއެވެ.

ހާލުފޮޅީގެ މަސައްކަތްކުރާތާ ގިނަ ދުވަސްތަކެއް ވެފައިވާ ހަބީބާ ހަސަން ބުނީ ހާލުފޮޅިއަށް ބޮޑު ޑިމާންޑެއް އޮންނަ ކަމަށެވެ. ކޮންމެ ދުވަހަކުވެސް މަދުވެގެން 200 ވަރަކަށް ހާލުފޮޅި ތައްޔާރުކުރާ ކަމަށާއި އެކަމުން ރަނގަޅު މަންފާއެއް ލިބޭކަމަށް އޭނާ ބުންޏެވެ.

"ހަމަ ރަނގަޅު އެއްޗެއް ލިބޭ ކޮންމެ މަހަކުވެސް، އެއިން ލިބޭ އެއްޗަކުން ގޭގެ ހަރަދު ވެސް ބެލެހެއްޓޭވަރުވޭ" ހަ ދަރިންގެ މަންމަ ބުންޏެވެ.

ރުފިޔާއަކަށް ފޮޅިއެއް ވިއްކާއިރު އެފޮޅި ވިއްކައިގެން މަހަކު ގާތްގަނޑަކަށް 3000ރ. ގެ ފައިދާއެއް ވާ ކަމަށް ހަބީބާ ބުންޏެވެ. އޭނާ ބުނީ ގިނައިން އެފޮޅި ގަންނަނީ އެރަށަށް ޒިޔާރަތްކުރާ ބީރައްޓެހިން ކަމަށެވެ. ކުޅުދުއްފުށީ ހާލުފޮޅި އަކީ ބީރައްޓެހިންގެ މަގުބޫލް އެއްޗެއް ކަމަށް އޭނާ ބުންޏެވެ.
http://www.sun.mv/albums/l_21151.jpg
ކުޅުދުއްފުށީ ހާލުފޮޅިއަކީކޮން ޒަމާނެއްގައި ތައްޔާރުކުރަން ފެށި އެއްޗެއްކަން ބުނަން އެރަށު ދުވަސްވީ މީހުނަށްކަށްވެސް ނޭންގެއެވެ. އެމީހުން ބުނާގޮތުން އެއީ އެރަށަށް ހާއްސަ ޒަމާންވީ އަމިއްލަ އުފެއްދުމެކެވެ. އެކަމުގެ ހެއްކެއްކަމަށް އެމީހުން ބުނަނީ އެއީ ފައިދާވާ މަސައްކަތަކަށް ވާއިރުވެސް ކުޅުދުއްފުށީ މީހުން ނޫން ބަޔަކު އެކަން ނުކުރާތީ އެވެ.

ކުޅުދުއްފުށީ ކައުންސިލް މެމްބަރު ޖަމްޝީދު މުހައްމަދު ވިދާޅުވީ ހާލުފޮޅި ތައްޔާރުކުރާ ގިނަ އަދަދެއްގެ ބަޔަކުއުޅޭ އެރަށުގައި އުޅޭކަމަށާއި އެއީ އެރަށުގެ އަންހެން ވެރިން ކުރާ ބުރަ މަސައްކަތެއް ކަމަށެވެ.

ހާލު ފޮޅިއާއި ވިއްދައިގެން ކޮންމެ ގޮތަކަށް މީހުން ވާހަކަދެއްކި ނަމަވެސް ކުޅުދުއްފުށީ ރައްޔިތުން އެވާހަކަތައް އަޑުއަހަމުން ދަނީ ހިތްހަމަޖެހުމާއެކު އެވެ. އެމީހުން ބުނާ ގޮތުން ހާލުފޮޅި އަކީ އެމީހުންގެ ކާބަފައިން ހަވާލުކޮށްފައިވާ ކުޅުދުއްފުއްޓަށް ހާއްސަ ރަމްޒެއް ކަމަށްވާއިރު އެރަށުމީހުން އެކާމާ އުފާކޮށް ފަހުރުވެރި ނުވާންވީ އެއްވެސް ސަބަސެއް ނެތެވެ.