މާޗް އެކެއްގައި ފުލުހުން ލައިންފަޅާ ހަމަނުޖެހުން ހިންގި މީހުންގެ މައްޗަށް މާދަމާ ދައުވާ ކުރާނެ: ޕީޖީ އޮފީސް

މިމަހުގެ އެއް ވަނަ ދުވަހު މަޖިލީސް ހިމެނޭ ސަރަހައްދު ފުލުހުން ބަންދުކޮށްފައިވަނިކޮށް، ލައިންތައް ފަޅާލައި ވަދެ ހަމަނުޖެހުން ހިންގި މައްސަލައިގައި ފުލުހުން ހައްޔަރުކުރި 23 މީހެއްގެ މައްޗަށް ދައުވާކުރަން މާދަމާ ކޯޓަށް ވައްދާނެ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފި އެވެ.

ޕްރޮސެކިއުޓާ ޖެނެރަލް އޮފީހުގެ އޮފިޝަލަކު މިރޭ ވިދާޅުވީ މިމަހުގެ އެއްވަނަ ދުވަހު މަޖިލީސް ކުރާގޭގެ ސަރަހައްދުގައި ހިނގި ހަމަނުޖެހުންތަކުގައި ހިމެނޭ 23 މީހެއްގެ މައްސަލަ މާދަމާ ކޯޓަށް ވައްދާނެ ކަމަށާއި އެމީހުންގެ މައްޗަށް ދައުވާކުރަނީ ފުލުހުންގެ ގާނޫނޫގެ 72 ވަނަ މާއްދާ އާއި 73 ވަނަ މާއްދާގެ ދަށުން ކަމަށެވެ.

އެމީހުންގެ މައްޗަށް ދައުލަތުން ކުރަން ނިންމާފައިވާ ދައުވާތަކަކީ ފުލުހުންނަށް ހަމަލާދިނުމުގެ ކުށުގެ ދައުވާ އާއި ފުލުހުންނަށް ހަމަލާދޭން އުޅުމުގެ ކުށުގެ ދައުވާ އާއި ފުލުހުންގެ ދައުރު އަދާކުރުމަށް ހުރަސް އެޅުމުގެ ކުށުގެ ދައުވާ އާއި ފުލުހުންގެ ދައުރު އަދާކުރުމަށް ހުރަސް އަޅަން އުޅުމުގެ ކުށުގެ ދައުވާގެ އިތުރުން ފުލުހުންގެ ދައުރު އަދާކުރުމަށް ދަތިކުރުމުގެ ކުށުގެ ދައުވާ ކަމަށް އޮފިޝަލް ވިދާޅުވި އެވެ.

ފުލުހުންގެ ގާނޫނުގެ 75 ވަނަ މާއްދާގައި ބުނަނީ އެފަދަ ދައުވާއެއް ސާބިތުވެއްޖެ މީހެއްގެ އަދަބަކީ 12000ރ. ވުރެ ބޮޑު ނޫން އަދަދަކުން ޖޫރިމަނާ ކުރުން ނުވަތަ ހަމަސް ދުވަހަށް ވުރެ ދިގުނޫން މުއްދަތަކަށް ޖަލަށް ލުން ނުވަތަ 12000ރ. ވުރެ ބޮޑު ނޫން އަދަދަކުން ޖޫރިމަނާ ކުރުމާއި އެކު ހަމަސް ދުވަހަށް ވުރެ ދިގުނޫން މުއްދަތަކަށް ޖަލަށް ލުމެވެ.

ދައުވާކުރުމަށް މާދަމާ ކޯޓަށް ވެއްދިޔަސް ދައުވާކުރަނީ ކޮންބައެއްގެ މައްޗަށް ކަމެއް އޮފިޝަލް ވިދާޅެއް ނުވެއެވެ.
އެމީހުންގެ މައްޗަށް ދައުވާކުރުމަށް މާދަމާ ކޯޓަށް ވައްދާއިރު، މާދަމާވެސް މަޖިލީސް ހުޅުވުމުގެ ޖަލްސާ ބޭއްވިޔަ ނުދިނުމަށް އެމްޑީޕީގެ ޕާލަމެންޓްރީ ގްރޫޕުން މިއަދު ވަނީ ފާސްކޮށްފަ އެވެ. އަދި މާދަމާ މަޖިލިސް ހުޅުވާއިރު ވެސް މަޖިލިސް ހިމެނޭ ސަރަހައްދު ބަންދުކޮށްފައި ބޭއްވުމަށް ފުލުހުން ވަނީ ނިންމާފަ އެވެ.