ޒިންމާދާރުކަމާ އެކު ތަކެތި އުފައްދައި ބޭނުން ކުރުމަށް މަސައްކަތްކުރެވި ނަތީޖާ ނެރެވިދާނެ ފަދަ މަޝްރޫއުތަކަށް ވިލާތުގެ އިއްތިހާދުން ހިލޭ އެހީ ދިނުމަށް ޕްރޮގްރާމެއް ފަށައިފި އެވެ.
ޒިންމާދާރުކަމާ އެކުގައި ތަކެތި ބޭނުންކޮށް އުފެއްދުމާ ގުޅޭގޮތުން މަލްޓި-ސްޓޭކްހޯލްޑަރ ކޮންސަލްޓޭޝަން ބައްދަލުވުން މިއަދު ކުރިއަށް ގެންގޮސްފައި ވަނީ ޗަމްޕާ ސެންޓްރަލް ހޮޓަލުގަ އެވެ. ބައްދަލުވުން ފައްޓަވައިދެއްވީ އެންވައިރަންމެންޓް މިނިސްޓަރ ޑރ. ހުސެއިން ރަޝީދު ހަސަން އެވެ.
އެ ބައްދަލުވުމަކީ ޔޫރަޕިއަން ޔޫނިއަން ގެ ސްވިޗް އޭޝިޔާ ފެސިލިޓީއާއި އެންވަޔަރަންމަންޓް މިނިސްޓްރީ ގުޅިގެން އ.ދ ގެ ދެމެހެއްޓެނިވި ތަރައްޤީގެ ލަނޑުދަނޑިތަކުގެ 12 ވަނަ ލަނޑުދަނޑި ކަމުގައިވާ ޒިންމާދާރުކަމާއި އެކުގައި ތަކެތި ބޭނުންކޮށް އުފެއްދުމަށް ބާރުއެޅުމުގެ ގޮތުން ބާއްވާ ބައްދަލުވުމެއް ކަމަށް އެންވަޔަރަންމަންޓުން ބުނެ އެވެ.
ބައްދަލުވުމުގެ މައިގަނޑު މަޤުސަދަކީ ރާއްޖޭގައި އެކިއެކި ދާއިރާތަކުގައި ވަސީލަތްތައް ބޭނުން ކުރެވޭ ގޮތާއި އަދި އެކިއެކި ގިންތިތަކުގައި އިސްރާފު ކުޑަކޮށް އެންމެ ހަރުދަނާ ކަމާ އެކު ތިމާވެށްޓާ ރައްޓެހި ގޮތެއްގައި އަމަލުތައް ބެހެއްޓުމަށް ގެންނަން ޖެހޭ ބަދަލުތައް ގެނައުމަށް ބާރުއެޅުން ކަމަށް ވެސް މިނިސްޓްރީން ބުންޏެވެ.
އަދި މީގެ އިތުރުން އެ ބައްދަލުވުމުގައި އީޔޫ ސްވިޗް އޭޝިޔާ ފެސިލިޓީގެ ފަރާތުން ހުޅުވާލެވިފައިވާ، ހިލޭ އެހީގެ ޕްރޮގްރާމާ ގުޅޭ ގޮތުން ބައިވެރިންނަށް މަޢުލޫމާތު އަރުވާފައިވާ ކަމަށް ވެސް އެންވައިރަންމަންޓް މިނިސްޓްރީން ބުނެއެވެ.
ޒިންމާދާރުކަމާ އެކު ތަކެތި އުފައްދައި ބޭނުން ކުރުމަށް މަސައްކަތްކުރެވި ނަތީޖާ ނެރެވިދާނެ ފަދަ މަޝްރޫއުތަކަށް ހިލޭ އެހީ ދިނުމަށް ވިލާތުގެ އިއްތިހާދުން ކުރިއަށްގެންދާ އެއް ދުވަހުގެ އެ ޕްރޮގްރާމްގައި، ގުޅުން ހުރި މިނިސްޓްރީތަކާއި ސަރުކާރުގެ އެކިއެކި އިދާރާތަކާއި ކުންފުނިތަކުގެ އިތުރުން، ޖަމްޢިއްޔާ ޖަމާޢަތްތަކުން ބައިވެރިވި އެވެ.