ސިޔާމް މައުރޫފް ސޮކާ ކަޕްގެ ފައިނަލް މެޗާއި ނިންމުމުގެ ރަސްމިއްޔާތަށް ސަންގެ ކިޔުންތެރީންނަށް މަރުހަބާ!
- ނ. އަތޮޅުގެ ރަށްތަކަށް އަމާޒުކޮށްގެން މާޅެންދޫގައި ކުރިއަށްގެންދާ މިމުބާރާތުގެ ފައިނަލް މެޗުގައި ބައްދަލުކުރާނީ ލަންދުއާއި މިލަދޫ.
- މިއަހަރުގެ މުބާރާތުގެ ފައިނަލް މެޗުގެ ހާއްސަ މެހެމާނެއްގެ ގޮތުގައި ބައިވެރިވާނީ އިނގިރޭސި ކާމިޔާބު ކްލަބު ޗެލްސީ އަދި އައިވަރީ ކޯސްޓް ގައުމީ ޓީމުގެ ލެޖެންޑް ޑިޑިއާ ޑްރޮގްބާ. މިދިޔަ އަހަރުގެ ފައިނަލް މެޗުގެ ހާއްސަ މެހެމާނެއްގެ ގޮތުގައި ބައިވެރިވެފައިވަނީ ބާސެލޯނާ އަދި ސްޕެއިން ގައުމީ ޓީމުގެ ލެޖެންޑް ކާލްސް ޕުޔޯލް.
- ޑްރޮގްބާ އެންމެ ފާހަގަކޮށްލެވުނީ އޭނާ ޗެލްސީއަށް ކުޅުނު ދުވަސްވަރު. ޗެލްސީގައި ޑްރޮގްބާ ހޭދަކުރި ދިގު މުއްދަތުގެ ތެރޭގައި އޭނާ ވަނީ އެ ކްލަބާއެކު ޔޫއެފާ ޗެމްޕިއަންސް ލީގުގެ ތަށްޓަކާއި، ހަތަރު އިނގިރޭސި ޕްރިމިއާ ލީގު ތަށްޓާއި، ހަތަރު އެފްއޭ ކަޕާއި، ތިން ލީގު ކަޕް އަދި ދެ ކޮމިއުނިޓީ ޝީލްޑް ކާމިޔާބުކޮށްފައި. ޗެލްސީގެ ތާރީހުގައި އެ ކްލަބަށް އެންމެ ގިނަ ލަނޑު ކާމިޔާބުކޮށްދިން ބިދޭސީ ކުޅުންތެރިޔަކީ ވެސް ޑްރޮގްބާ.
- ސިޔާމް މައުރޫފް ކަޕަކީ ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހްމަދު ސިޔާމް މުހައްމަދާއި ކެނދިކުޅުދޫ ދާއިރާގެ މެންބަރު އަލީ މައުރޫފްގެ އިސްނެންގެވުމާއެކު ނ. އަތޮޅުގެ ހުރިހާ ރަށަކަށް ހުޅުވާލައިގެން ކުރިއަށްގެންދާ މުބާރާތެއް. މިއަހަރުގެ މުބާރާތުގައި ނ. އަތޮޅުގެ 12 ރަށަކުން ވާދަކުރޭ.
- ސިޔާމް މައުރޫފް ސޮކާ ކަޕަކީ ރާއްޖޭގައި ބާއްވާ އެންމެ އަގުބޮޑު ފުޓްބޯޅަ މުބާރާތް. މިއަހަރުގެ މުބާރާތުގެ ޗެމްޕިއަން ޓީމަށް 500،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މުބާރާތުގެ ރަނަރަޕް ޓީމަށް 100،000 ރުފިޔާ، ފެއަރ ޕްލޭ ޓީމަށް 25،000 ރުފިޔާ އަދި ބެސްޓް ސަޕޯޓިން ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވޭ.
- މިމުބާރާތުގެ ފައިނަލް މެޗުގައި ވާދަކުރާ މިލަދޫ އަދި ލަންދޫ ވެސް ވަނީ މުބާރާތުގައި ވަރަށް ރަނގަޅު ނަތީޖާތަކެއް ހޯދާފައި. މިލަދޫން ފައިނަލުގެ ޖާގައެއް ހޯދީ ސެމީ ފައިނަލުގައި އެންމެ ފަހުގެ ދެ އަހަރުގެ ޗެމްޕިއަން ހޮޅުދޫގެ މައްޗަށް ކުރި ހޯދައިގެން. އަދި ލަންދޫން ފައިނަލުގެ ޖާގައެއް ހޯދީ ސެމީ ފައިނަލުގައި ވެލިދޫގެ މައްޗަށް ކުރި ހޯދައިގެން.
