އެޗްވަންއެންވަން ވައިރަސް ޖެހޭ މީހުންގެ އަދަދު ރާއްޖޭގައި އިތުރުވެ، ނުރައްކާ ހާލާތަކަށް ގޮސްފައިވާތީ، ބަލީގެ އެލާޓް ލެވެލް ތިނަކަށް ބަދަލުކޮށްފި އެވެ.
އެލާޓް ލެވެލް ތިނަކަށް ބަދަލު ކުރީ ސުވައިން ފުލޫ ޖެހޭ މިންވަރު ކުއްލި ގޮތަކަށް އިތުރުވަމުންދިއުމާއި އެ ބަލި އެއް ސަރަހައްދަކަށްވުރެ ގިނަ ސަރަހައްދުތަކުން ފެންނަމުންދާން ފެށުމުންނާއި ބަލި ޖެހޭ މީހުންގެ ހާލަތު ސީރިއަސްވަމުންދާތީ އެވެ.
އެޗްވަންއެންވަން ނުވަތަ ސްވައިން ފްލޫ ރާއްޖެއިން ޖެހުނު މީހުންގެ އަދަދު އިއްޔެ ހެނދުނު 27 ހުރި ނަމަވެސް، 12 ގަޑިއިރު ނުވަނީސް އެ އަދަދު ރޭ ވަނީ 51 އިތުރުވެފަ އެވެ.
އެ އަދަދަކީ ސުވައިންފުލޫއަށް ޝައްކު ކުރެވިގެން ޓެކްސްޓު ކުރި 251 މީހުންގެ ތެރެއިން، ޕޮޒިޓިވްވި އަދަދެވެ. މިވަގުތު އިތުރަށް ޓެސްޓު ކުރާ 70 ސާމްޕަލެއްގެ ތެރެއިން ސުވައިން ފުލޫ ޖެހިފައިވާ އިތުރު ބަޔަކު ފެނުމަކީ އެކަށީގެންވާ ކަމަށް އެޗްޕީއޭއިން ބުންޏެވެ. އަދި ބަލި ފެތުރެމުންދާ މިންވަރު އަދިވެސް އިތުރުވަމުންދާނެ ކަމަށް އެ އޮތޯރިޓީން ބުންޏެވެ.
އެޗްޕީއޭ އާއި ހެލްތު މިނިސްޓްރީ އާއި އެޑިއުކޭޝަން މިނިސްޓްރީން ޑޮކްޓަރުންނާއެކު ރޭ ބޭއްވި ކުއްލި ޕްރެސް ކޮންފަރެސްގައި ވާހަކަފުޅު ދައްކަވަމުން އޭޑީކޭގެ ކުޑަކުދިންގެ ހާއްސަ ޑޮކްޓަރު، އަބްދުﷲ ނިޔާފު ވިދާޅުވީ ސުވައިން ފުލޫ ފެތުރެމުންދާ މިންވަރާ ގުޅިގެން އެލާޓް ލެވެލް ތިނެއް އިއުލާން ކުރަން ނިންމީ މިރޭ އެ ބޭފުޅުން ކުރިއަށް ގެންދިޔަ މަޝްވަރާތަކަށްފަހުގައި ކަމަށެވެ.
"މި ނަމްބަރު މައްޗަށްދާނެ. ކިހާ ދުވަހަށްކަށް ދަންނަވަން ދަތި. މިހާތަނަށް ފެތުރެމުންދިޔަ ވަރަށް ބަލި ދުވަސްތަކަށް ބަލި ފެތުރިގެންދާ މިންވަރު މައްޗަށްދާނެ،" ޑރ. ނިޔާފު ވިދާޅުވި އެވެ.
ސުވައިން ފުލޫ ފެތުރޭލެއް ބާރުމިނާ ގުޅިގެން ސްކޫލުތައް ބަންދުކޮށްފައި ވަނީ މިޑްޓާމް ބަންދަށްފަހު ސްކޫލުތައް ހުޅުވަންދެކަށެވެ. މިޑްޓާމް ބަންދަކީ އަންނަ ހަފްތާ އެވެ. އެއަށްފަހު ވެސް ސްކޫލުތައް ހުޅުވަންޖެހިއްޖެ ނަމަ އެކަން ވެސް އަންގާނެ ކަމަށް އެޑިއުކޭޝަން މިނިސްޓްރީން ބުންޏެވެ.
އަމިއްލަ ސްކޫލުތައް ވެސް ބަންދުކުރުމަށް އެޗްޕީއޭއިން ވަނީ ލަފާދީފަ އެވެ.