ހަސަން އަދުހަމް (ސަޑޭ) ޖަހައިދިން ދެ ލަނޑާއެކު 3-1 ލަނޑުގެ ނަތީޖާއަކުން ޓީސީ ސްޕޯޓްސް ބަލިކޮށް، އެފްއޭ ކަޕްގެ ޗެމްޕިއަންކަން ކްލަބު ވެލެންސިއާއިން ހޯދައިފިއެވެ. އެފްއޭ ކަޕް ކާމިޔާބުކުރެވުމާއެކު ކްލަބު ވެލެންސިއާއަށް މިވަނީ، އަންނަ އަހަރުގެ އޭއެފްސީ ކަޕްގެ ޖާގައެއް ކަށަވަރު ވެފައެވެ.
މުޅިން އަލަށް އެފްއޭ ކަޕްގެ ފައިނަލްގައި ވާދަކުރި ޓީސީ ސްޕޯޓްސް އާއި، ފައިނަލްގައި 13 ވަނަ ފަހަރަށް ވާދަކުރި ކްލަބް ވެލެންސިއާ، ގައުމީ ފުޓްބޯޅަ ދަނޑުގައި މިރޭ ކުޅުނު ފޯރިގަދަ ފައިނަލް މެޗު ބަލަން، ގިނަ ބަޔަކު ދަނޑަށް ވަދެފައި ނުވި ނަމަވެސް، ދެ ޓީމުގެ ފަރާތުން ވެސް ވަނީ، ރީތި ކުޅުމެއް ދައްކައި، އިދިކޮޅު ގޯލަށް ނުރައްކާތެރި ހަމަލާތަކެއް ފޮނުވާލައިފައެވެ.
ވެލެންސިއާއިން މެޗުގެ ލީޑު ނެގީ، 22 ވަނަ މިނިޓްގައެވެ. ހަސަން އަދުހަމް އެ ލަނޑު ކާމިޔާބުކުރީ ވެލެންސިއާގެ ކުޅުންތެރިއަކު ޓީސީ ގޯލް ކުރިމައްޗަށް ހުރަސްކޮށްލި ބޯޅަ ބޮލުން ޖަހައި ގޯލް ތެރެއަށް ފޮނުވާލައިގެންނެވެ.
ފުރަތަމަ ހާފް ނިމުމުގެ ކުރީން ވެލެންސިއާއިން ވަނީ، ލީޑު ފުޅާކޮށްފައެވެ. މެޗުގެ 38 ވަނަ މިނިޓްގައި އެޓީމުގެ ދެވަނަ ލަނޑު ކާމިޔާބުކޮށްދިނީ، ޓީސީގެ ޕެނަލްޓީ އެރިޔާ ތެރޭން ގޯލް ކުރިމައްޗަށް ރިލްވާން ނަގައިދިން ރީތި ހުރަހެއް، ހަމަ އެހާރީތިކޮށް، ގޯލްތެރެއަށް ފޮނުވާލައިގެން އަހްމަދު ނިހާނެވެ.
މެޗުގައި ފެނިގެން ދިޔަ ޓީސީގެ ހަމަ އެކަނި ލަނޑު 42 ވަނަ މިނިޓްގައި ޖަހައި ދިނީ، އަލީ ނާފިއުއެވެ. ނާފިއު އެ ލަނޑު ކާމިޔާބުކުރީ، ފުރަތަމަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި، ނާއިޒް ހަސަން، ވެލެންސިއާ ޕެނަލްޓީ އޭރިޔާ ތެރޭން ޖައްސާލި ބޯޅަ ގޯލްގެ މެދަށް ފޮނުވާލައިގެންނެވެ.
ދެވަނަ ހާފްގައި ޓީސީން ވަރުގަދައަށް ކުޅެމުން ދަނިކޮށް، އަދުހަމް ވަނީ އަނެއްކާވެސް، ވެލެންސިއާ އަށް ދެލަނޑަށް ލީޑު ފުޅާކޮށްދީފައެވެ. އެ ލަނޑަކީ، ޓީސީގެ ޕެނަލްޓީ އޭރިޔާ ތެރެއަށް ބޯޅަ ހިފައިގެން ވަދެ، ހަތަރު ކުޅުންތެރީން ކައިރިން ނައްޓާލުމަށް ފަހު، ގޯލް ކީޕަރުވެސް ކަޓުވާލާފައި ސަޑޭ ކާމިޔާބުކުރި ލަނޑެކެވެ.
މިހާތަނަށް 28 ފަހަރު އެފްއޭ ކަޕް ބާއްވާފައިވާއިރު، މި މުބާރާތުގެ އެންމެ ކާމިޔާބު ކުލަބަކީ، 11 ފަހަރު މުބާރާތް ކާމިޔާބުކޮށް، އަދި ޖެހިޖެހިގެން ތިންފަހަރު (2005، 2006، 2007) މުބާރާތް ކާމިޔާބުކުރި ހަމަ އެކަނި ކްލަބު ކަމަށްވާ ނިއުރޭޑިއަންޓް ސްޕޯޓްސް ކްލަބެވެ.
ނިއުއިން ޖެހިޖެހިގެން ތިން ފަހަރު މުބާރާތް ކާމިޔާބުކުރީ ވެސް ވެލެންސިއާ އާ ވާދަކޮށް 2-0ގެ ނަތީޖާއަކުން މޮޅުވެގެންނެވެ. އޭގެ ފަހުން ވެލެންސިއާ އެފްއޭކަޕްގެ ފައިނަލްގައި ވާދަކުރި މިއީ ފުރަތަމަ ފަހަރެވެ. އަދި އެ ކްލަބުން އެފްއޭކަޕް ކާމިޔާބުކުރި މިއީ ފަސްވަނަ ފަހަރެވެ. (1988, 1995, 1999, 2004، 2016). އެހެންކަމުން ވެލެންސިއާ މިހާރު ވެގެން ގޮސްފައި ވަނީ މި މުބާރާތުގެ ދެވަނައަށް އެންމެ ކާމިޔާބު ކުލަބުގެ ގޮތުގައެވެ.
އެފްއޭކަޕް ޗެމްޕިއަންސް:
- ނިއުރޭޑިއަންޓް، (11 ފަހަރު)
- ވެލެންސިއާ (5 ފަހަރު)
- ވިކްޓަރީ ސްޕޯޓްސް ކްލަބް (4 ފަހަރު)
- ވީބީ އައްޑޫ އެފްސީ (4 ފަހަރު)
- ކްލަބް ލެގޫންސް (2 ފަހަރު)
- މާޒިޔާ ސްޕޯޓްސް އެންޑް ރެކްރިއޭޝަން (2 ފަހަރު)
