މިއީ ''ވޯމްއަޕް''އެއް ކަމަށް ބުނެ އެމްޑީޕީން މުޒާހަރާ ނިންމާލައިފި

އެމްޑީޕީން މުޒާހަރާ ނިންމާލައިފި

އެ އެއްވުމުގައި މީހުންނަށް ސިއްހީ ގޮތުން އެހީ ފޯރުކޮށްދިނުމަށް ރެޑް ކްރެސެންޓުން ހަރަކާތްތެރިވި

މަޖީދީ މަގުގައި މުޒާހަރާ ކުރަމުންދިޔަ ސަރަހައްދު ދޫކޮށް، މީހުން ވަނީ ދާން ފަށައިފައި

ފުލުހުން އަމަލުކުރި ގޮތަށް އިޝާރާތް ކުރައްވައި މާރިޔާ ވިދާޅުވީ، އެ ސަރަހައްދަކީ އާބަން އޭރިއާއެއް ކަމަށާއި އެ ސަަރަހައްދުގެ ގެތަކުގައި ކުޑަކުދިން ނިދާފައި ތިބިއިރު، ފުލުހުން އަމަލުކުރި ގޮތާ މެދު ދެރަވާ ކަމަށް

މުޒާހަރާގެ ތެރެއިން ކުރީގެ ޑިފެންސް މިނިސްޓަރު މާރިޔާ ވަނީ ފުލުހުންގެ އަމަލުތަކަށް ފާޑު ވިދާޅުވެ، ބާރު އޮންނަނީ ރައްޔިތުންގެ އަތުގައިކަން ފުލުހުން ދަސްކުރަން ޖެހޭ ކަމަށް ވިދާޅުވެފައި

މުޒާހަރާ މެދުކަނޑާލަނީ ކަމަށް އިއުލާން ކުރުމުން ބައެއް މީހުން އެ ސަރަހައްދުން ދާން ފެށި ނަމަވެސް، އަނެއްކާވެސް ޕޮލިސް ބެރިކޭޑުތައް ކައިރިއަން މީހުން އެއްވެއްޖެ

މުޒާހަރާ މެދުކަނޑާލަނީ ކަމަށް ބުނި ނަމަވެސް ފުލުހުން ވަނީ ބާރު އަޑުކިޔާ 'ސޮނިކް ހަތިޔާރު' ބޭނުންކޮށްފައި

އެމްޑީޕީގެ ލައުޑްސްޕީކަރުން ވަނީ، މުޒާހަރާ މެދުކަނޑާލަނީ ކަމަށް އިއުލާންކޮށްފައި. އެގޮތުން އަދާލަތު ޕާޓީގެ ރައީސް އިމްރާން ދުއާއެއް ކިޔުއްވި

އިހުސާން ވިދާޅުވީ، ގާނޫނީ އިމުގެ ތެރެއިން ޚިޔާލު ފާޅުކުރުމުގެ މިނިވަންކަމުގެ ހައްގު ނަގަހައްޓައި، އެެންމެންގެ ރައްކާތެރިކަމަށް ޓަކައި ސަރުކާރުން މަސައްކަތް ކުރަމުން ދާނެ ކަމަށް

އިހުސާން ވިދާޅުވީ ފުލުހުން ތިބީ އެމްޑީޕީގެ ހަރަކާތަށް އެއްބާރުލުން ދޭން ކަމަށް. އެހެންނަމަވެސް އެމްޑީޕީން ވަނީ ހުއްދަ ދިން މަގު ނޫން އެހެން މަގަކުން ދާން މަސައްކަތްކޮށްފައި ކަމަށް އޭނާ ވިދާޅުވި.

އެމްޑީޕީން އަމަލުކުރި ގޮތުން، އެ ޕާޓީގެ މަގުސަދަކީ ސުލްހަވެރި ހަރަކާތެއް ބޭއްވުން ނޫން ކަމަށް ބެލެވެން އޮތް ކަމަށް އިހުސާން ވިދާޅުވި.

މުޒާހަރާއާ ގުޅޭ ގޮތުން ހޯމް މިނިސްޓަރު އިހުސާން އަނެއްކާވެސް އެކްސްގައި ޕޯސްޓު ކުރައްވައިފި. އޭނާ ވިދާޅުވީ ސުލްހަވެރިކަމާއެކު އެއްވެ އުޅުމުގެ ގާނޫނުގެ ދަށުން، އެއްވުމަށް ކަނޑައަޅައިފައިވާ ތަނެއް ނޫން އެހެން ތަނެއް އެއްވާނަމަ ފުލުހުންގެ ހުއްދަ ބޭނުންވާނެ ކަމަށް.

އިހުސާން ވިދާޅުވީ އެމްޑީޕީން، މިރޭގެ ހިނގާލުމަށް ވަކި މަގުތަކަކުން ދިޔުމަށް ހުއްދައަށް އެދުނު ކަމަށް. ނަމަވެސް މަޖީދީ މަގުގެ ޓްރެފިކް އޮންނަ މިންވަރަށް ބަލައި، މުޒާހަރާގެ ބައިވެރީންގެ ރައްކާތެރިކަމަށް ވެސް ބަަލައި، ފުލުހުން ހުއްދަ ދިނީ އެހެން މަގަކުން ދިޔުމަށް ކަމަށް އިހުސާން ވިދާޅުވި

އެމްޑީޕީން ވަނީ، ފުލުހުން ބާރު އަޑެއް އިއްވައި 'ސޮނިކް' ހަތިޔާރު ބޭނުންކުރަމުންދާ ކަމަށް ބުނެފައި. އަދި އެ ސަރަހައްދުގައި ސިގްނަލް ޖޭމް ކުރަމުންދާ ކަމުގެ މައުލޫމާތު ލިބިފައިވާ ކަމަށް ވެސް އެ ޕާޓީން ބުނޭ.

އެމްޑީޕީން ވަނީ އެ ފިޔަވަޅުތައް އެޅުމުގެ ބޭނުމަކީ ފުލުހުން އަނިޔާކުރާ މަންޒަރު ނުދެއްކުން ކަމަށް ބުނެފައި.

އެމްޑީޕީގެ ލީޑާޝިޕް ކުރީ ސަފުގައި ތިއްބެވިއިރު، މިހާރު ތިބީ އިށީނދެވަޑައިގެން، އޭގެ ތެރޭގައި ކުރީގެ ރައީސް އިބްރާހީމް މުހައްމަދު ޞާލިޙާއި ޗެއާޕާސަން ފައްޔާޒު އިސްމާއީލް ހިމެނޭ. އަދި ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) އާއި ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ވެސް ހިމެނޭ

ފުލުހުން މުޒާހަރާގެ ބައިވެރިން ފަހަތަށް ޖައްސަން މަސައްކަތް ކުރާތީ، މުޒާހަރާ ކުރާ މީހުން މަގުމަތީގައި އިށީންނަން ފަށައިފި

އެމްޑީޕީގެ މުޒާހަރާގެ ލައިވް ކަވަރޭޖް އެސްއެސްޓީވީން:

ނޫސްވެރިންގެ ޖަމިއްޔާ، ޖާނަލިސްޓްސް އެސޯސިއޭޝަނުން ވަނީ މުޒާހަރާގައި ނޫސްވެރިންނާއި ކެމެރާމަނުންނަށް އަމާޒުކޮށް ޕެޕާ ސްޕްރޭކުރަމުންދާ ކަމުގެ މައުލޫމާތު ލިބިފައިވާ ކަމަށް ބުނެފައި. އެ ޖަމިއްޔާއިން ވަނީ، ފުލުހުންގެ ސަފުގެ ފަހަތުން މުޒާހަރާ ކަވަރު ކުރުމަށް ނޫސްވެރިން އެދުނު ނަމަވެސް އެ ފުރުސަތު ނުދިން ކަމަށް ތުހުމަތުކޮށްފައި.

މުޒާހަރާގެ ތެރެއިން ކުރީގެ ނައިބު ރައީސް ފައިސަލް ނަސީމް ވެސް ކުރީ ސަފަށް އަރައިވަޑައިގެން، ފުލުހުން އަނިޔާނުކުރުމަށް ގޮވާލައްވައިފި

މުޒާހަރާއާ ގުޅިގެން ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު ކުރެއްވި ޓުވީޓެއްގައި ވަނީ، މިރޭ އިދިކޮޅު ފަރާތްތަކުން ރާވަމުންދާ ކަންކަމަކީ ރާއްޖޭގެ އަމަން އަމާންކަން ނަގާލައި، މުޅި ގައުމު ހަލަބޮލިކޮށްލުމަށް ކުރާ ނުބައި މަސައްކަތެއް ކަަމަށް ވިދާޅުވެފައި.

މުޒާހަރާގެ އެންމެ ކުރިއަށް ކުރީގެ ރައީސް އިބްރާހީމް މުހައްމަދު ޞާލިޙް ވަޑައިގެންފި. އާންމުންނާއި ފުލުހުންނާ ދެމެދު މިހާރު ވެސް އަންނަނީ ހަމަނުޖެހުން ހިންގަމުން

އެ މުޒާހަރާގެ ތެރެއިން ކުރީގެ ޑިފެންސް މިނިސްޓަރު އަދި އެމްޑީޕީގެ ކުރީގެ ޗެއާޕާސަން މާރިޔާ އަހުމަދު ދީދީ ވާހަކަދެއްކެވި. އޭނާ ވަނީ ސަރުކާރަށް ކޮރަޕްޝަނުގެ ތުހުމަތު ކުރައްވައި، މީގެ ކުރިން ކޮރަޕްޝަން ހިންގައިފައިވާނަމަ އެ ވާހަކަ ދައްކަންވީ ކަމަށް ވިދާޅުވެފައި. އަދި އެންސްޕާއާއި އެމްއެމްޓީވީއާ ގުޅުވައި ކުރާ ތުހުމަތުތަކަށް އިޝާރާތް ކުރައްވައި އޭނާ ވަނީ "އެންސްޕާއިން ޓީވީ ހަދައިގެން ކޮރަޕްޝަންގެ ވާހަކަދެއްކީމާ ލަދެއް ހަޔާތެއް ނެތްކަން" ފެންނަ ކަމަށް ވިދާޅުވެފައި

މުޒާހަރާއިން ހައްޔަރުކުރި މީހުންގެ އަދަދު ފުލުހުން މިހާތަނަށް ހާމަކޮށްފައިނުވޭ. ނަމަވެސް އެ ސަރަހައްދުގައި ތިބި "ސަން"ގެ ނޫސްވެރިންނަށް ވަނީ ތިން މީހަކު ހައްޔަރުކުރި މަންޒަރު ފެނިފައި.

އެމްޑީޕީން ބުނި ގޮތުގައި ފުލުހުން ވަނީ މުޒާހަރާއިން މިހާތަނަށް ހަ މީހަކު ހައްޔަރުކޮށްފައި. އެ ޕާޓީން ވަނީ، ހައްޔަރުކޮށްފައިވަނީ ޚިޔާލު ފާޅުކުރުމުގެ މިނިވަންކަމުގެ ހައްގު ބޭނުންކުރަމުން ދިޔަ ބަޔަކު ކަމަށް ބުނެ، އެއްވެސް ޝަރުތަކާ ނުލައި އެ މީހުން ދޫކޮށްލުމަށް ގޮވާލައިފައި

އެމްޑީޕީގެ މުޒާހަރާއާ ގުޅިގެން ފުލުހުން ބަޔާނެއް ނެރެފި.

އެ ބަޔާނުގައި ވަނީ، އެމްޑީޕީން ކުރިން ހުއްދަ ދީފައިވާ ރޫޓާ ޚިލާފަށް މަޖީދީ މަގުން ކުރިއަށް ދާން ފެށިކަން ފާހަގަކޮށްފައި. އެގޮތަށް އަމަލު ނުކުރުމަށް ތަކުރާރުކޮށް ނަސޭހަތްތެރިވެ، އިންޒާރު ދިން ކަމަށް ފުލުހުން ބުނި.

ފުލުހުން އަންނަނީ މިއީ "ޣައިރު ގާނޫނީ'' އެއްވުމެއް ކަމަށް ބުނެ، ފަހަތަށް ޖެހެން އިންޒާރު ދެމުން

ފުލުހުން، މުޒާހަރާގެ ބައިވެރިން ހައްޔަރުކުރަން ފަށައިފި

އެމްޑީޕީގެ މުޒާހަރާގެ ބައިވެރިން ހުއްޓުވާފައި ވަނީ، ފުލުހުން ހުއްދަ ދީފައިވާ މަގު ނޫން އެހެން މަގަކުން ދާން މަސައްކަތް ކުރަމުން

އެމްޑީޕީން ވަނީ އިހުސާން ހެއްދެވީ އިތުރުފުޅެއް ކަމަށާއި، އެއީ ފުލުހުން ހާލަތާ ނުބައްދަލު ބާރުގެ ބޭނުންކުރުން ދިފާއު ކުރެއްވުމަށް ކުރެއްވި ޓުވީޓެއްގެ ގޮތުގައި ސިފަކޮށްފައި

އިހުސާނަށް ރައްދުދީ، އެމްޑީޕީން އެކްސްގައި ކުރި ޕޯސްޓެއްގައި ބުނީ ފުލުހުން މުޒާހަރާ ހުއްޓުވަން ހަރުކަށިކޮށް އަމަލުކުރި ކަމަށާއި ޕެޕާ ސްޕްރޭ ޖަހައި ރަޔަޓު ގިޔަރު ބޭނުން ކުރި ކަމަށް.

މުޒާހަރާގެ ބައިވެރިއަކު ފުލުހުންގެ ޝީލްޑެއް ނަގާ މަންޒަރު ވީޑިއޯތަކުން ފެންނަމުންދޭ. ހޯމް މިނިސްޓަރު އަލީ އިހުސާން ވަނީ އެފަދަ ގޮތަކަށް އަމަލުކުރުމުން މިއީ ސުލްހަވެރިކަމާއެކު ކުރިއަށްގެންދާ ސިޔާސީ ހަރަކާތެއްގެ ގޮތުގައި ނުބެލެވޭނެ ކަމަށް ވިދާޅުވެފައި

ފުލުހުން އަންނަނީ މުޒާހަރާގެ ބައިވެރިން ފަހަތަށް ޖައްސަން މަސައްކަތް ކުރަމުން

އިމްރާން ވާހަކަފުޅު ނިންމަވައިލެއްވީ، ގާނޫނުއަސާސީގެ ރޮނގުގެ ފަހަތަށް ރައީސް ޖައްސާފައި ނޫނީ ގެޔަށް ނުވަންނާނެ ކަމަށާއި މިއީ މަސައްކަތުގެ ފެށުމަށް ކަމަށް ވިދާޅުވެ

ފުލުހުންނަށް ރައީސް ނުފޫޒު ފޯރުއްވާ ކަމަށް ތުހުމަތުކުރައްވައި އިމްރާން ވިދާޅުވީ "އެސްއޯ ފުލުހުންނަށް ޔުނިފޯމް ވެސް އެޅެނީ" ރައީސަށް ހުއްދަ ދިނިއްޔާ ކަމަށް

އިމްރާން ވަނީ، ގާނޫނުއަސާސީއާއި ރައްޔިތުންގެ ހައްގުގައި ތިބެން ފުލުހުންނަށް ގޮވާލައްވައިފައި

އިމްރާން ވިދާޅުވީ މިހާރު އަދާލަތާއި އެމްޑީޕީ ގުޅިގެން ފަށައިފައިވަނީ 'ވޯމް އަޕް'އެއް ކަމަށާއި ރައީސަށް ޖެހިވަޑައިގަންނަވާނީ ގާނޫނުއަސާސީގެ ތަރަހައިގެ ތެރެއިން ވެރިކަން ކުރަން ކަމަށް ވިދާޅުވެފައި

ކުރީގެ ހޯމް މިނިސްޓަރު އިމްރާން ވިދާޅުވީ ފެހި ގާނޫނުއަސާސީ ލޫޓުވައިލައިފައިވާ ކަމަށާއި ރައީސް ޑރ. މުހައްމަދު މުއިއްޒު ''ފަހަތަށް ޖައްސާނެ'' ކަމަށް ވިދާޅުވެފައި

އަދާލަތު ޕާޓީގެ ރައީސް އިމްރާން އަބްދުﷲ ގެންދަވަނީ މުޒާހަރާގެ ބައިވެރިންވާ ވާހަކަ ދައްކަވަމުން

ފުލުހުން އަންނަނީ ތަކުރާރުކޮށް ޕެޕާ ސްޕްރޭ ޖަހަމުން

ފުލުހުންނާއި މުޒާހަރާގެ ބައިވެރިންނާ ދެމެދު ކުރިމަތިލުން ހިނގަމުން ދަނީ ބޮޑުތަކުރުފާނު މަގުން ގޮސް، މަޖީދީ މަގަށް އަރާ ދިމާލުގައި

ފުލުހުން ބެރިކޭޑް ޖަހައި، ޝީލްޑާއެކު ހަރަކާތްތެރިވަމުންދާއިރު މުޒާހަރާގެ ބައިވެރިން ދަނީ ކުރިމަތިލަމުން

ފުލުހުން މުޒާހަރާގެ ތެރެއަށް ޕެޕާ ސްޕްރޭ ޖަހައިފި

އެމްޑީޕީން އާޓިފިޝަލް ބީޗުގައި ބޭއްވި އެއްވުމުގެ ބައިވެރިން، އެ ސަރަހައްދުން ނުކުމެ ހިނގަން ފެށުމުން ފުލުހުން ވަނީ ހުއްޓުވައިފައި