ނޭޕާލުން ވަރުގަދަ އިންޑިއާއާ ދެކޮޅަށް ނުކުތް އިރު، އެޓީމު އޮތީ ކުޅުނު ދެ މެޗު ވެސް ކާމިޔާބުކޮށް ލީގު ތާވަލުގެ ދެވަނައިގައެވެ. ނޭޕާލުން ފުރަތަމަ މެޗުގައި ރާއްޖެ 1-0 އިން ބަލިކުރި އިރު ދެވަނަ މެޗް ކާމިޔާބުކުރީ ސްރީ ލަންކާ 3-2 އިން ބަލިކޮށްގެންނެވެ.
އިންޑިއާ އިން ކުޅުނު ދެ މެޗުން ލިބުނީ ދެ ޕޮއިންޓެވެ. އިންޑިއާއިން ފުރަތަމަ މެޗުގައި ބަންގްލަދޭޝް އަތުން އެއްވަރުވި އިރު، ދެވަނަ މެޗުގައި އެ ޓީމު ވަނީ ސްރީލަންކާއާ ކުޅެ އެއްވަރުވެފައެވެ.
ސާފް ޗެމްޕިއަންޝިޕުގައި ނޭޕާލުން މިހާތަނަށް އިންޑިއާ އަތުން މޮޅުވީ އެންމެ ފަހަރަކު އެވެ. އެއީ 2013 ވަނަ އަހަރުގެ މުބާރާތުގެ ގުރޫޕް ސްޓޭޖުގައެވެ. އެ މުބާރާތުގައި ވެސް ނޭޕާލްގެ ގޯލު ބެލެހެއްޓީ ކިރަން އެވެ.
ނޭޕާލުން މުބާރާތަށް ތައްޔާރުވާން އިންޑިއާއާ ދެކޮޅަށް ރަހުމަތްތެރިކަމުގެ ދެ މެޗު ކުޅުނެވެ. ފުރަތަމަ މެޗު 1-1 އިން އެއްވަރުވިއިރު ދެވަނަ މެޗުން ބަލިވީ 2-1 އިންނެވެ.
މިރޭގެ މެޗުގެ ކުރިން އިއްޔެ އޮތް ނޫސްވެރިންގެ ބަައްދަލުވުމުގައި ނޭޕާލްގެ ކޯޗު އަބްދުﷲ އަލް މުތައިރީ ބުނީ އިންޑިއާ އަކީ ނޭޕާލަށް ވުރެ ހުރިހާ ގޮތަކުން ވެސް ވަރުގަދަ ޓީމެއް ކަމަށެވެ. އެކަމަކު ނޭޕާލުން އެ ޓީމު ދެކެ "ޖެހިލުންނުވާނެ" ކަމަށާއި ނޭޕާލުން އެ ޓީމަށް ދުލެއް ނުދޭނެ ކަމަށް މުތައިރީ ބުންޏެވެ.