ސަރަހައްދީ އެންމެ ބޮޑު ފުޓުބޯޅަ މުބާރާތް "އުރީދޫ ސާފް ޗެމްޕިއަންޝިޕް" މިއަދު މާލޭގައި ފެށުމަށް އޮތީ ފުރިހަމައަށް ތައްޔާރުވެފައެވެ. ފުރަތަމަ މެޗުގައި ބައްދަލު ކުރާ ސްރީ ލަންކާ އަދި ބަންގްލަދޭޝްގެ ޓީމުވެސް އޮތީ ހަމަ އެ ފޯރީގައެވެ.
ފުރަތަމަ މެޗުން މޮޅުވެ، ރަނގަޅު ޖޯޝެއްގައި މުބާރާތަށް އަތް ގަދަކޮށްލަން ލިބޭ މި ފުރުސަތަށް ދެ ޓީމުން ވެސް އަތްއޮޅާލައިގެން ތިބި އިރު، ހަގީގަތުގައި މި ފަހަރުގެ ސާފް ޗެމްޕިއަންޝިޕް ބާއްވަން ހަމަޖެހިފައި އޮތީ ބަންގްލަދޭޝްގަ އެވެ. ނަމަވެސް މިދިޔަ އަހަރު މުޅި ދުނިޔެ ބައްދާލި ކޮވިޑް-19 ގެ ބަލިމަޑު ކަމުގައި މުބާރާތް މި އަހަރަށް ފަސް ކުރީ އެވެ. އެކަމަކު ބަންގްލަދޭޝްގެ ކޮވިޑުގެ ހާލަތު ރަނގަޅެއް ނުވި އެވެ. އެ ގައުމުގައި މުބާރާތް ބޭއްވޭނެ ހާލަތެއް ނުހޯދުނެވެ. އެންމެ ފަހުން ޖެހުނީ މުބާރާތް ބާއްވާނެ އެހެން ގައުމެއް ހޯދުމަށް ބިޑަށް ހުޅުވާލާށެވެ.
އެ ބިޑް ކާމިޔާބުކޮށް ރާއްޖެއިން ދެވަނަ ފަހަރަށް މުބާރާތް ހޯސްޓް ކުރާއިރު، ބަންގްލަދޭޝްގެ ކޯޗަކަށް ހުރީ ގަލޮޅު ދަނޑަށް ފަރިތަ އޮސްކާ ބުރުޒޯން ބަރޭރަސްއެވެ. ކުރިން ރާއްޖޭގެ އެއް ނަންބަރު ޓީމު ނިއުރޭޑިއަންޓަށް ކޯޗުކަން ކޮށްދިން އޮސްކާ އަކީ ސަރަހައްދުގެ ދެ ގައުމުގެ ޑޮމެސްޓިކް ލީގު ޗެމްޕިއަނެވެ. ވަގުތީ ކޯޗެއްގެ ގޮތުގައި ކުރިއަށް އޮތް ދެ މަހު އޮސްކާ ކުރިމަތިލާނީ ސާފް ޗެމްޕިއަންޝިޕްގެ އިތުރުން ނޮވެމްބަރު މަހު ލަންކާގައި ބާއްވާ އިންޓަނޭޝަނަލް މުބާރަތަށެވެ.
އުރީދޫ ސާފް ޗެމްޕިއަންޝިޕްގައި ބަންގްލަދޭޝް ކުޅޭ މެޗުތައް
- އޮކްޓޯބަރު 1 (ހަވީރު): ސްރީ ލަންކާ - ބަންގަލަދޭޝް
- އޮކްޓޯބަރު 4 (ހަވީރު): ބަންގަލަދޭޝް - އިންޑިއާ
- އޮކްޓޯބަރު 7 (ރޭގަނޑު): ދިވެހިރާއްޖެ - ބަންގަލަދޭޝް
- އޮކްޓޯބަރު 13 (ހަވީރު): ބަންގްލަދޭޝް - ނޭޕާލް
ސީދާ ތަށްޓަށް އަމާޒު ހިފައިގެން ބަންގްލަދޭޝް މުބާރާތަށް ނުކުންނަ އިރު ލަންކާ ވެސް އޮތީ ވަރުގަދަ ސްކޮޑެކެވެ. ލަންކާ އަށް މިހާތަނަށް ސާފް ޗެމްޕިއަންޝިޕް ކާމިޔާބުކުރެވުނީ އެންމެ ފަހަރަކު އެވެ. އެއީ 1995 ވަނަ އަހަރު ލަންކާގައި ބޭއްވި މުބާރާތުގެ ފައިނަލުގައި އިންޑިއާ ބަލިކޮށްފަ އެވެ.
އެ ޓީމު އެންމެފަހުން ބައިނަލްއަޤްވާމީ މެޗެއް ކުޅެފައިވަނީ މިއަހަރުގެ ޖޫންމަހުގައެވެ. ވޯލްޑްކަޕް ކޮލިފައިންގައި ސައުތު ކޮރެއާ އަތުން 5-0 އިން ބަލިވި މެޗަށްފަހު އަދި މިހާތަނަށް އެ ގައުމުން މެޗެއް ނުކުޅެއެވެ.
ލަންކާގެ ކޯޗަކީ ބޮސްނިއާ އަށް ނިސްބަތްވާ އޮސްޓްރޭލިއާ ދަރިކޮޅުގެ އާމިރު އަލަގިޗެވެ. އޭނާއަކީ ދިވެހިންނަށް ވެސް އާ މޫނެއް ނޫނެވެ. އޭނާ ވަނީ 2015 ވަނަ އަހަރުގެ ސީޒަންގެ ކުރީކޮޅު ނިއު ރޭޑިއަންޓްގެ ކޯޗުކަމުގައި އެއް މަސްދުވަސް ހޭދަކޮށްފަ އެވެ. ލަންކާ ގައުމީ ޓީމާ އަލަގިޗް ހަވާލުވީ މިދިޔަ އަހަރުގެ ފެބްރުއަރީ މަހު އެވެ.
ސާފް ޗެމްޕިއަންޝިޕް 2021 ގައި ސްރީ ލަންކާގެ މެޗުތަކުގެ ޝެޑިއުލް
- އޮކްޓޯބަރު 1 (16:00): ސްރީ ލަންކާ - ބަންގަލަދޭޝް
- އޮކްޓޯބަރު 4 (21:00): ސްރީ ލަންކާ - ނޭޕާލް
- އޮކްޓޯބަރު 7 (16:00): އިންޑިއާ - ސްރީ ލަންކާ
- އޮކްޓޯބަރު 10 (21:00): ދިވެހިރާއްޖެ - ސްރީ ލަންކާ
