ކާޅެއްގެ މައްސަލައިގައި ލ. މާމެންދޫ އަންހެނަކު އެރަށުގެ އެހެން އަންހެނެއްގެ މައްޗަށް ކޯޓްގައި ދައުވާކޮށްފައި ވަނިކޮށް މިއަދު މެންދުރު ކުއްލި ގޮތަކަށް ކާޅު މަރުވެއްޖެ އެވެ.
މާމެންދޫ ރަށު ކައުންސިލުންގެ އޮފިޝަލަކު ވިދާޅުވީ ކާޅު މަރުވިކަން، އެ ކާޅު ވަގަށް ނެގި އެރަށު ކުނަހަންދޫގެ ސަންފާ އަބޫބަކުރު ރަށުކައުންސިލަށް ގޮސް ކަށަވަރުކޮށް ދިނުމުން ކައުންސިލުގެ އޮފިޝަލުން ގޮސް ބެލި އިރު ކާޅު މަރުވެފައިވާ ކަމަށެވެ.
"އޭނާ ބުނީ މައްސަލަ ޖެހުނު ހިސާބުން ފެށިގެން ކާޅު ބައިންދަނީ ބަދިގޭ އުނދުން ކައިރީގައި ބަނދެފައި ކަމަށް. އެހެން އިންދާ މިއަދު ކާޅު މަރުވެފައިވާ ކަމަށް،" ކައުންސިލުގެ އޮފިޝަލަކު ވިދާޅުވި އެވެ.
މާމެންދޫ މީހަކު ބުނީ މައްސަލަ ބޮޑުވެފައިވާ ކާޅުގެ މަރާ ގުޅިގެން ކާޅު ވެރިފަރާތް ކަމަށްވާ އެރަށު ދިއްގާ ގަސްދޮށުގެ ނަދާ އާއި ކާޅު ވަގަށް ނެގި ސަންފާ ވެސް މިއަދު ރޮއި ހަދާފައިވާ ކަމަށެވެ.
ނަދާ އޭނާގެ ކާޅު ވަގަށް ނަގައިގެން ސަންފާގެ މައްޗަށް ކޯޓްގައި މަދަނީ ދައުވާއެއް ކުރީ މިދިއަ ހޯމަ ދުވަހު އެވެ. އޭގެ ކުރިން އެ ދެމިހުންގެ މައްސަލަ ވަނީ ރަށު ކައުންސިލުން ބަލައިފަ އެވެ.
"ނަދާގެ ދައުވާއަކީ އޭނާ އޮޅުކޮށްގެން ގެންގުޅުނު ކާޅެއް މިރަށު އެހެން އަންހެނަކު ވަގަށް ނެގުމަށް ފަހު ކާޅު ނުދޭނެ ކަމަށް ބުނާތީ، ކާޅު މިނިވަން ކޮށް ދިނުމަށް އެދި ކޯޓް އަމުރެއް ނެރެދިނުން،" ރަށު ކައުންސިލަރު މުހައްމަދު ޝިފާޒު ވިދާޅުވި އެވެ.
ޝިފާޒު ވިދާޅުވީ ކާޅުގެ މައްސަލަ ނަދާ ފުރަތަމަ ހުށަހެޅީ ކައުންސިލަށް ކަމަށާއި މައްސަލައާ ގުޅިގެން ސަންފާ އަބޫބުކުރާއި ނަދާ ހާޒިރުކޮށް ނަދާގެ ކާޅެއް ވަގަށް ގެންދިޔައިންތޯ ސުވާލު ކުރުމުން ސަންފާ އެކަމަށް އެއްބަސްވެ ކާޅު ނުދޭނެ ކަމަށް ބުނެފައިވާ ކަމަށެވެ.
"ނަދާ މައްސަލަ ޖެއްސީ އޭނާ ގެންގުޅޭ ކާޅެއް ސަންފަ ވަގަށް ނެގި ކަމަށްބުނެ އެކަން ބަލައި ދިނުމަށް. ދެ މީހުން ހާޒިރުކޮށް ސަންފައާ ސުވާލު ކުރީމަ ބުނެފި އާނއެކޭ ކާޅު ވަގަށް ނެގީމޭ، އެކަމަކު ކާޅެއް ނުދޭނަމޭ، އަޅުގަނޑުމެން ނަސޭހަތް ދިނުމުން ވެސް ކާޅު އަނބުރާ ދޭ ގޮތަކަށް އެއްބަހެއް ނުވި އަދި ދަފަރާތް ސުލްހައެއް ވެސް ނުވި... އެހިސާބުން ނަދާ ބޭނުންވީ ކާޅު ހޯދަން މަދަނީ މައްސަލައެއް ކޯޓަށް ވައްދަން،" ޝިފާޒު ވިދާޅުވި އެވެ. "އޭނާ ކުރި ދައުވާ ވަނީ ކޯޓަށް ބަލައިގެންފައި. އެ ދައުވާގައި ބުނަނީ ސަންފާގެ އަތް ދަށުން ކާޅު މިނިވަންކޮށް ނަދާ ހަވާލު ކުރުމުގެ އަމުރެއް ނެރެ ދިނުމަށް،"
ޝިފާޒު ވިދާޅުވީ ނަދާގެ ކާޅު ވަގަށް ގެންދިއުމަށް ފަހު ނުދޭނެ ކަމަށް ސަންފާ ބުނަނީ އޭނާ އޮޅުކޮށްގެން ގެންގުޅުނު ކާޅެއް މިދިޔަ ރޯދަމަހުގެ ތެރޭ ކުޑަކުއްކަށް ދެ ރުފިޔާ ދީގެން ނަދާ ވަގަށް ނަގުވާފައިވާ ކަމަށް ބުނެ ކަމަށެވެ.
"އޭނާ ބުނަނީ ނުދޭނަމޭ . ކާޅު ދޭން ނުޖެހޭ ސަބަބަކީ ނަދާ ވަނީ ތިމަންނާގެ ކާޅު ކުއްޖަކު ލައްވާ ވަގަށް ނަގުވާފައޭ. އެކަމަށް ނަދާ ދެކޮޅު ހަދާ، ދެން މުޅި ރަށުގައި މިހާރު އޮތީ މި ކާޅުގެ ވާހަކަ،" ޝިފާޒު ވިދާޅުވި އެވެ.
ކާޅު މިއަދު މަރުވީ އެކާޅުގެ މައްސަލަ މާމެދުން ކޯޓުގައި ހިންގަން ފޮނަދޫ މެޖިސްޓްރޭޓް އެރަށަށް ވަޑައިގަންނަވާ ގޮތަށް ހަމަޖެހިފައި ވަނިކޮށެވެ.
date_range
ހޯމަ 23 ޑިސެމްބަރ 2024