ގައުމީ ފުޓްބޯޅަ ޓީމްގެ ކޯޗު ކަމުގެ ވަޒީފާއިން އިސްތިއުފާ ދެއްވި ވެލިޒާ ޕޮޕޯޕަށް އެފްއޭއެމުން އިތުރު ވަގުތު ދޭންޖެހޭ ކަަމަށް ގައުމީ ޓީމުގެ ކެޕްޓަން ޢަލީ އަޝްފާޤު (ދަގަނޑޭ) ބުނެފި އެވެ.
ދަގަނޑޭ މިރޭ އޭނާގެ ރަސްމީ ފޭސްބުކް ޕޭޖުގައި އާންމުކޮށްފައިވާ ސްޓޭޓްމެންޓެއްގައި ބުނެފައިވަނީ އޭނަ މިހާތަނަށް މަސައްކަތް ކުރި ކޯޗުންގެ ތެރެއިން ޕޮޕޯފްއަކީ މޮޅު ކޯޗެއް ކަމަށާއި ކޯޗްގެ ފެންވަރު ދެއްކުމަށް ޕޮޕޯޕަށް އިތުރު ވަގުތު ދޭންޖެހޭ ކަމަށް ގަބޫލު ކުރާ ކަމަށެވެ.
ދަގަނޑޭ ބުނީ ޕޮޕޯޕްގެ ކޯޗްކަމުގެ ދަށުން ޓީމު ކުޅުނު މެޗްތަކާ ބަލާފައި ނަތީޖަ ރަނގަޅު ކަމަށެވެ.
"އަހަރެން ގަބޫލު ކުރާ ގޮތުގައި އެފްއޭއިން ކޯޗްގެ ފެންވަރު ސާބިތުކޮށްދިނުމަށް ގިނަ ވަގުތު ދޭންޖެހޭ. ކުޅުނު މެޗްތަކުގެ ފެންވަރާ ބަލާފައި ޓީމުގެ ނަތީޖާ ރަނގަޅު. ޓީމު އިތުރަށް ވަރުގަދަ ކުރުމަށް ޕޮޕޯޕަށް އިތުރު ވަގުތު ދޭން ޖެހޭ،" ދަގަނޑޭ އޭނާ ކުރި ޕޮސްޓްގައި ބުނެފައިވެ އެވެ.
ދަގަނޑޭ ބުނީ ޑިސެމްބަރު މަހު ބާއްވަން ހަމަޖެހިފައިވާ ސާފް ޗެމްޕިއިންޝިޕާއި އިންޓަނޭޝަނަލް ގޭމްސްތަކަށް ތައްޔާތާރުވުމަށް ޕޮޕޯޕް ޕްލޭންތަކެއް ގެންގުޅެފައިވާ ކަމަށެވެ.
ދަގަނޑޭ ވަނީ އެފްއޭއެމް ނޯމަލއިޒޭޝަން ކޮމިޓީގެ ޗެއާމަން މުޙައްމަދު ޝަވީދު، ޕޮޕޯފް އާއި ކުޅުންތެރިންނާ ބެހޭ ގޮތުން ދައްކާފައިވާ ވާހަކަތަކާ މެދު ކަންބޮޑުވާ ކަމަށާއި އެއީ ރާއްޖޭގެ ފުޓްބޯޅަ ހިންގެވުމުގައި އިސްކޮށް ހުންނެވި ބޭފުޅެއްގެ ފަރާތުން ގަބޫލު ކުރެވޭނެ ކަމެއް ނުންކަމަށެވެ.
މިއަދު އެފްއޭއެމް ހައުސްގައި ބޭއްވި ނޫސްކޮންފަރެންސްގައި ޝަވީދު ވިދާޅުވީ ވޭތުވެދިޔަ ދުވަސްތަކުގައި އެފްއޭއެމްގެ ޓެކްނިކަލް ޓީމުން ބެލި ބެލުމުންނާއި ކުރި އިންވެސްޓިގޭޓްތަކުން ޕޮޕޯފް ލައިގެން ސާފް ޗެމްޕިއަންޝިޕްގެ ޓާގެޓް ހާސިލު ކުރުމީ ފަސޭހަ ކަމަކަށް ނުވާނެ ކަމަށާއި އެހެންވެ ކޯޗުގެ މައްސަލާގައި ނަގަންޖެހޭ ޑެސިޝަން ލަސްކޮށް އިންޒާރު ދިނުމަށްފަހު ކުރިއަށް ގެންގޮސްފިނަ އަޅުގަނޑުމެން ހާސިލު ކުރަން ބޭނުންވާ ޓާގެޓް ހާސިލުކުރުމަށް ދާއިރު ޓީމު ތެރޭގައި މާބޮޑެތި މައްސަލަ އޮވެދާނެ ކަމަށް ގަބޫލު ކުރެވޭ ކަމަށެވެ.
ޝަވީދު ވިދާޅުވީ، ކޯޗާ ބެހޭ ގޮތުން ބޮޑެތި ޑިސިޕްލިނަރީ މައްސަލަތަކެއް އެފްއޭއެމަށް ހުށަހެޅުނު ކަމަށާއި ސީދާ އެފްއޭއެމްގެ އިސްފަރާތްތަކަށް ވެސް އެ ކަންތައްތައް ފެނިފައިވާ ކަމަށެވެ.
"ކޯޗާއި ބެހޭގޮތުން ބޮޑެތި ޑިސިޕްލިނަރީ މައްސަލަތަކެއް ހުށަހެޅިގެން ދިޔަ. އެއީކީ އެއްގޮތަކަށްވެސް ޕްލޭޔާސްގެ ފަރާތުން ހުށަހެޅިފައިވާ ކަންތައްތަކެއް ނޫން. އެހެން ނަމަވެސް ކޯޗްގެ ޑިސިޕްލިންނާއި ކޯޗާއި ކުޅުންތެރިންނާ ދެމެދު ގެންގުޅޭ ވައިބާ ގުރޫޕްތަކުގައި ސީދާ އަޅުގަނޑުމެންގެ ހަމަ ލޮލުން ބަލާފައި ފެނިފައި ހުރި އެފޮޓޯތަކާއި އެމަންޒަރުތައް. އެއެއްޗިއްސަކީ އަޅުގަނޑުމެން ގަބޫލު ކުރާނެ ކަންތައްތަކެއް ނޫން،" ޝަވީދު ވިދާޅުވިއެވެ.
ޝަވީދު ވިދާޅުވީ ވޯލްޑްކަޕް ކޮލިފައިން ފުރަތަމަ މެޗް ގަތަރާ ދެކޮޅަށް ކުޅުމުގެ ކުރިން ރާއްޖެއަށް އިންޓަނޭޝަނަލް ފްރެންޑްލީ މެޗްތަކެއް ލިބުނު ކަމަށާއި ނަމަވެސް އެއިން ކޮންމެ މެޗެއް ޕޮޕޯފް ރިޖެކްޓް ކުރިކަމަށެވެ.