"ސީރިޔަސްކޮށް ފެންނަ މަޖާ ލީޑަރެއް"؟

އެބޭފުޅާ އަބަދުވެސް ފެންނާނީ ވަރަށް ސީރިޔަސްވެފައި ހުންނަވަނިކޮށެވެ. ވާދަވެރިން ބުނާ ގޮތުން ނަމަ ކޯފާވެފަ އެވެ. މިއީ އަންނަ މަހު ހަތެއްގައި ބާއްވާ ރިޔާސީ އިންތިހާބުގައި ވާދަކުރައްވާ ކެންޑިޑޭޓް އަބުދުﷲ ޔާމީން އަބުދުލް ޤައްޔޫމްގެ ވާހަކަ އެވެ.

ޔާމީނާ މެދު މި ނަޒަރުން ދެކެވެނީ އޭނާގެ މޫނުފުޅު ފެންނަ ގޮތުގެ ސަބަބުން ކަމަށް ވެދާނެ އެވެ. ނުވަތަ އެއީ ވާހަކަފުޅު ދެއްކެވުމުގެ ރާގު ހުންނަ ގޮތުން ކަމަށް ވެސް ވެދާނެ އެވެ.

ބޭރުފުށުން ފެންނަ ގޮތާ އެތެރެއާ ތަފާތު ވުމަކީ އާ ނަޒަރިއްޔާއެއް ނޫނެވެ. އެއީ ދުނިޔަވީ ވަރަށް ގިނަ ކަންތައްތަކުގައިވާ ގޮތެކެވެ. ޔާމީނުގެ މިޒާޖު ވެސް ވެފައި ވަނީ އެފަދަ ކަމަކަށް ކަމަށް މިހާރު ގަބޫލު ކުރެވިދާނެ އެވެ. އެއީ މިހާތަނަށް މާގިނަ ބަޔަކަށް، މާގިނަ ކަންތައްތަކެއް ނޭނގި އޮތް އޭނާގެ އާއިލީ ޒާތީ ދިރިއުޅުން އާއިލާގެ މެމްބަރުންނާއި ރަށްޓެހިން ކިޔައި ދެއްވުމުންނެވެ.

އެމްބީސީގެ ޓީވީ މޯލްޑިވްސް އިން ގެނެސްދޭ "ރިޔާސީ ކެންޑިޑޭޓް" ޕްރޮގްރާމްގައި ވާހަކަފުޅު ދެއްކެވި ބޭފުޅުން ވިދާޅުވީ "ސީރިޔަސް"ކޮށް ފެނުނު ނަމަވެސް ޔާމީނަކީ ހަމަ ވަރަށް ސަކަ މިޒާޖެއްގެ މަޖާ ބޭފުޅެއް ކަމަށެވެ.

އެއްބަނޑު އެއްބަފާ ބޭބޭފުޅު އަބުދުﷲ މަޖީދު ވެސް ވިދާޅުވީ ޔާމީނަކީ ހަމަ މަޖާކުރައްވާ ބޭފުޅެއް ކަމަށެވެ. މަޖީދު އެންމެ ބޮޑަށް ހަނދުމަފުޅު ހުންނަނީ ވެސް ޔާމީނު ސަކަރާތް ޖެއްސެވުމުގެ ސަބަބުން ގޭތެރޭގައި ހިނގި ކުޑަ ހާދިސާއެކެވެ. އެއީ ގޭތެރޭގައި ދަޅެއްގެ މަތީގައި ހުރި ބައްތިއެއް ވެއްޓި ކުޑަކޮށް އަލިފާން ރޯވި ހާދިސާ އެވެ.
ރާއްޖޭން ބޭރުގައި ޔާމީނާ އެކު ކިޔަވާ ވިދާޅުވާން އުޅުއްވި ބޭފުޅަކު ވެސް ވިދާޅުވީ ޔާމީނަކީ ވަރަށް ސީރިއަސް އެހެން ނަމަވެސް ސަކަ މިޒާޖެއްގެ މަޖާ ބޭފުޅެއް ކަމަށެވެ.

"ކަންތައްތަކާ ވަރަށް ސީރިޔަސްކޮށް، އުޅުއްވާނީ، ނަތީޖާ ހާސިލުކުރައްވަން އުޅުއްވާނީ، އެކަމަކު ހަމަ މަޖާ ވެސް ކުރައްވާނެ،" ޔާމީނާ އެކު ލުބުނާނުގައި ކިޔަވާ ވިދާޅުވާން އުޅުއްވި އަހުމަދު ޝަފީގު (އެމްވީކޭ ޝަފީގު) ވިދާޅުވެފައިވެ އެވެ.

މިހާ ހިސާބުން އުފެދިދާނެ ސުވާލެއް އެބަވެ އެވެ. އެއީ "ތުއްޕުޅު އިރު މަޖާ މިޒާޖެއް ހުރި ކަމަށް ވިޔަސް، ސިޔާސީ ދާއިރާގައި އެކްޓިވްކޮށް އުޅުއްވަން ފެއްޓެވުމުން މިޒާޖު ބަދަލުވެދާނެ ނޫންތޯ" މިސުވާލެވެ.
މިސުވާލުގެ ޖަވާބު ސިޔާސީ ރަނގަޅު މަގާމެއްގައި، ވަޒީރެއްގެ މަގާމުގައި ހުންނެވި އިރު ޔާމީނާ އެކު މަސައްކަތް ކުރެއްވި ކުރީގެ ޖެންޑާ މިނިސްޓަރު އަނީސާ އަހުމަދުގެ ވާހަކަ ފުޅުން ލިބެ އެވެ. އަނީސާ ވިދާޅުވީ "ކޮންމެ ފަދަ ވާހަކައެއްގެ ތެރެއިން ވެސް ކުއްލިއަކަށް ހެއްވާ ވާހަކަފުޅެއް ވިދާޅުވެ، މަޖާ ކުރައްވަފާނެ" ކަމަށެވެ.

އަނީސާ ވިދާޅުވީ "ސަމާސާ"ގޮތަކަށް ވަރަށް ސީޔާސަކަމެއް ވެސް ޔާމީނު ކުރެއްވި ކަމަށެވެ. އެއީ ޔާމީނު ވަޒީރުކަމުން އިސްތިއުފާދެއްވި ސިޓީފުޅު އަނީސާ މެދުވެރި ކުރައްވައި ރައީސް މައުމޫނުގެ އަތްޕުޅަށް އެރުއްވުއްމެވެ.
އަނީސާ އެ ވިދާޅުވި ދުވަސް ވަރަކީ މިހާރު، އެމަގާމަކަށް ވަޑައިގެންނެވުމަށް ޔާމީނު ކެމްޕޭން ކުރައްވަމުން ގެންދަވާ، ރާއްޖޭގެ ރައީސުލްޖުމްހޫރިއްޔާ ކަމުގެ މަގާމުގައި ޔާމީނުގެ "ތުއްތޮންބެ" ކުރީގެ ރައީސް މައުމޫނު އަބުދުލް ގައްޔޫމު ހުންނެވި ދުވަސްވަރެވެ. އެހެންވީމާ އެއީ ޔާމީނަށް ފަސޭހަފުޅު ދުވަސްވަރެއް ކަމަށް ވެދާނެ އެވެ.

ނަމަވެސް މާހައުލު މާ ފަސޭހަ ނޫން އިރުވެސް ޔާމީނު ހަމަ މަޖާ ކުރެއްވިކަން ޕީޕީއެމްގެ ޕާލަމެންޓްރީ ގްރޫޕްގެ މެމްބަރު އަދި ރައްޔިތުންގެ މަޖިލީހުގެ ވިލި މާފަންނު ދާއިރާގެ މެމްބަރު އަހުމަދު ނިހާނުގެ ވާހަކަފުޅުން އެނގެ އެވެ.
"ކެމްޕޭން ކުރުމަށް އަޅުގަނޑުމެން އަތޮޅުތަކަށް ކުރާ ދަތުރުތަކުގައި ތިން ގަޑި އިރު ހަތަރު ގަޑިއިރު ބައެއް ފަހަރު ހޭދަކުރަން ޖެހޭ. އެކަހަލަ ދަތުރުތަކުގައި ހަމަ ވަރަށް މަޖާކުރައްވާނެ، ޑިގް ކުޅުއްވާނެ، ލަވަބާޒީ، ބައިތު ބާޒީ ކުރައްވަން އަމިއްލަ ފުޅަށް ވެސް ފަށްޓަވާފާނެ،" ނިހާނު ވިދާޅުވި އެވެ.

ޔާމީނުގެ މަޖާ ސިފަފުޅުތަކާ އެކުގައިމެ، އޭނާގެ އާއިލާގެ ބޭފުޅުންނާ އޮންނަނީ މާ ރަނގަޅު މަޖާ ގުޅުމެއް ކަމެއް ނުވަތަ ނޫންކަން ސާފުވާ ވަރަކަށް ބޭފުޅުންގެ ބަހެއް ލިބިފައެއް ނެތެވެ. އިވުނީ އެންމެ ބޭފުޅެއްގެ ވާހަކަ ފުޅެވެ.
މީލާދީން ހާހާ ނުވަ ސަތޭކަ ނަވާވަންނަ ވަނަ އަހަރުގެ މޭމަހުގެ 21 ވަނަ ދުވަހު އުފަންވި ޔާމީނު ވިދާޅުވީ ގޮތުގައި އެއްބަފާ އެންމެ ދޮށީ ބޭބޭފުޅު މައުމޫނަށް ވެސް އޭނާ ތައާރަފްވީ ސިޓީގެ ޒަރީއާއިންނެވެ. ނަމަވެސް ރައީސް މައުމޫނު ކިޔަވާވިދާޅުވެގެން މާލެ ވަޑައިގެން ފަހުން އަދި އޭގެ ފަހުން ރައީސްކަމާ ހަވާލުވެވަޑައި ގެންނެވި ފަހުން ޔާމީނު ވަނީ މައުމޫނާ އެކު ޓީޓީ ކުޅުއްވައި، މަޖާ ވެސް ކުރައްވައި ހައްދަވާ އުޅުއްވި އެވެ.

ޔާމީންގެ ރައްޓެހިންނާއި އެއްކޮށް މަސައްކަތް ކުރެއްވި ބޭފުޅުންގެ ބަހުން ޔާމީނަކީ ސަކަ މިޒާޖެއްގެ، އަދި ކުރައްވާ މަސައްކަތްޕުޅުން ނަތީޖާ ހާސިލު ކުރެއްވުމަށް މަސައްކަތް ކުރައްވާ ބޭފުޅެކެވެ. އޭނާގެ ސީރިއަސް ފަރާތް އެންމެ ބޭފުޅުންނަށް ވެސް އެނގެ އެވެ. ދެން އޮތީ އޭނާގެ އެ "ސަކަ މިޒާޖާ" އެކު "އެތެރެއިން ފެންނަ ހިނިތުންވުމުން" އޭނާގެ ސަޕޯޓަރުންނަށް ހިތްހަމަޖެހުން ހޯއްދަވައިދެއްވުމެވެ.