ސަން އެފްއެމް އޮންލައިން އަށް ދުވާލަކު އަންނަ ހިޓްސްގެ އަދަދު ދެ ލައްކައަށް އަރައިފި އެވެ. ސަން އެފްއެމް އޮންލައިންގެ މަގުބޫލުކަން މިހާ ބޮޑަށް އިތުރު ވަމުން އަންނަ އިރު މި ވެބްސައިޓަށް ދުވާލަކު އެވްރެޖްކޮށް ވަންނަ މީހުންގެ ޢަދަދު މިހާރު ވަނީ ހަތަރު ހާހުން މައްޗަށް އަރައިފަ އެވެ.
ސަން އެފްއެމް އޮންލައިންގެ ފާއިތުވި ތިން މަސް ދުވަހުގެ ތަފާސް ހިސާބަށް ބަލައިލާ އިރު، އޯގަސްޓް މަހު ދުވާލެއްގެ އެވްރެޖް ހިޓްސް 72000 އަށް އަރައިފައިވާ އިރު، މުޅި މަހުގެ ތެރޭގައި ލިބުނު ހިޓްސް ގެ އަދަދު ވަނީ ދެ މިލިއަނަށް އަރައިފަ އެވެ. ސެޕްޓެމްބަރު މަހު ދުވާލެއްގެ އެވްރެޖް ހިޓްސް 114000 އަށް އަރައިފައިވާ އިރު މުޅި މަހުގެ ތެރޭގައި ލިބުނު ހިޓްސްގެ އަދަދު ތިން މިލިއަނަށް ވުރެ މައްޗަށް އަރައިފައިވެ އެވެ. އަދި އޮކްޓޯބަރު މަހު ދުވާލަކު ލިބުނު ހިޓްސްގެ އަދަދު 196000 އަށް އެރި އިރު މުޅި މަހުގެ ތެރޭގައި ލިބުނު ހިޓްސްގެ އަދަދު ހުރީ ހަ މިލިއަނުން މަތީގަ އެވެ. މިހާރުގެ ތަފާސް ހިސާބުތަކަށް ބަލާ އިރު ސަންއެފްއެމް އޮންލައިނަށް ވަންނަ މީހުން އެވްރެޖް ގޮތެއްގައި ފަސް މިނެޓަށް ވުރެ ގިނަ ވަގުތު ސައިޓުގައި ހޭދަ ކުރެ އެވެ. އަދި އެވްރެޖްކޮށް ހަތަރު ޕޭޖަށް ކޮންމެ މީހަކު ވެސް ވިޒިޓް ކުރެ އެވެ.
ސަން އެފްއެމް އޮންލައިނަށް ރާއްޖެ އިން ބޭރުން އެންމެ ގިނަ އަދަދަކަށް މީހުން ވަންނަނީ މެލޭޝިއާ އިންނެވެ. ދެވަނައިގައި ސްރީލަންކާ ހިމެނޭ އިރު ތިން ވަނައަށް އެންމެ ގިނަ މީހުން ވަންނަނީ އިންޑިއާ އިންނެވެ. ހަތަރު ވަނައިގައި ހިމެނެނީ އޮސްޓްރޭލިއާ އަދި ފަސް ވަނައިގައި ސިންގަޕޫރެވެ.
ސަންއެފްއެމް އޮންލައިން އަކީ ސަން އެފްއެމްގެ މެނޭޖްމެންޓުގެ ފަރާތުން ރަޖިސްޓްރީ ކޮށްގެން ހިންގާ އޮންލައިން ނޫހެކެވެ. މި ސައިޓް މެދުވެރިކޮށް ސަން އެފްއެމްގެ ރޭޑިއޯ ޕްރޮގްރާމަތައް ވަގުތުން އަޑު އެހޭނެ އެވެ. އަދި ސަން މެގަޒިން އޮންލައިންކޮށް ކިޔޭނެ އެވެ.