މިހާރު ރާއްޖެ އަށް ކުރަމުންދާ ވިއްސާރައިގައި ހޯރަފުށީގައި ފެންބޮޑުވެ ލިބިފައިވާ ގެއްލުންތައް ބައްލަވައިލެއްވުމަށް ރައީސުލްޖުމްހޫރިއްޔާ ޑރ. މުހައްމަދު ވަހީދު ހަސަން މަނިކު އެ ރަށަށް ފުރާވަޑައިގެންފި އެވެ.
ހުއްޓުމެއްނެތި ބޯކޮށް ވާރޭވެހުމާ ގުޅިގެން ހޯރަފުށީގައި ވަރަށް ބޮޑަށް ފެންބޮޑުވެ، ވަރަށް ގިނަ ގޭގެއަށް ވަނީ އެކިއެކި ގެއްލުންތައް ލިބިފަ އެވެ. އެގޮތުން މި ވިއްސަރާގައި އެ ރަށުގައި ފެންބޮޑުވުމާ ގުޅިގެން އެ ރަށުގެ 95 ގެއަކަށް ގެއްލުންވެ 600 ވަރަކަށް މީހުންނަށް އަސަރުކޮށްފައިވާ ކަމަށް އެ ރަށުގެ ކައުންސިލުން ވަނީ ބުނެފައެ އެވެ.
ރާއްޖެ އަށް ކުރަމުންދާ ވިއްސާރައިގައި ލިބެމުންދާ ގެއްލުންތައް ބައްލަވައިލެއްވުމަށް ރައީސުލްޖުމްހޫރިއްޔާގެ ހާއްސަ މަންދޫބެއްގެ ގޮތުން ދެ ބޭފުޅަކު އުތުރާއި ދެކުނުގެ ބައެއް ރަށްތަކަށް ފޮނުއްވުމަށް ވެސް ރައީސުލްޖުމްހޫރިއްޔާ ވަނީ ހަމަޖައްސަވައިފި އެވެ.
ދެކުނުގެ ބައެއް ރަށްތަކަށް ފޮނުއްވުމަށް ހަމަޖެއްސެވީ، ރައީސުލްޖުމްހޫރިއްޔާގެ އޮފީހުގެ އެޑްވައިޒާ އިބްރާހީމް ލުތުފީ އެވެ. އަދި އުތުރަށް ފޮނުއްވުމަށް ހަމަޖެއްސެވީ މިނިސްޓަރު އޮފް ހޯމްއެފެއާޒްގެ ނައިބު މުހައްމަދު ސަލީމެވެ.
އެ ބޭފުޅުން ކުރައްވާ ދަތުރުފުޅުގައި، ވިއްސާރައިގައި މިހާތަނަށް ލިބިފައިވާ ގެއްލުންތައް ބައްލަވާލައްވައި، މިވަގުތަށް ސަރުކާރުން ކޮށްދެއްވެން ހުރި ކަންތައްތަކަކީ ކޮބައިތޯ ބައްލަވާނެ ކަމަށް ރައީސް އޮފީހުން ބުނެ އެވެ.
date_range
ބުރާސްފަތި 26 ޑިސެމްބަރ 2024