އަންނަ އަހަރު ހުޅުދެލީގައި ނަރުދަމާގެ ނިޒާމު ގާއިމު ކުރުމުގެ މަސައްކަތް ފެއްޓެވުމަށް މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.
މި އަތޮޅަށް ކުރައްވި ރަސްމީ ދަތުރުފުޅުގައި މިއަދު މެންދުރު މި އަތޮޅު ހުޅުދެއްޔަށް ވަޑައިގެން ރައްޔިތުންނާ ބައްދަލުކުރައްވައި ރައީސް ވިދާޅުވީ ނަރުދަނާ ނިޒާމެއް ނެތުމުން މި ރަށަށް ދިމާވެފައިވާ ދަތިކަން ހައްލުކޮށް ދިނުމަށް އެ މަސައްކަތް އަންނަ އަހަރު ފެޓެވުމަށް މަސައްކަތްޕުޅު ކުރައްވާނެ ކަމަށެވެ.
އަދި ވިދާޅުވީ މި ރަށުގައި ދިމާވެފައިވާ ކަރަންޓް މައްސަލައަށް ހައްލު ގެނައުމަށް އިންޖީނުގެ އަޕުގްރޭޑް ކުރުމުގެ މަސައްކަތް ފެނަކަ ކުންފުންޏާ ހަވާލުކުރައްވައިގެން އެ މަސައްކަތް ވެސް ކުރިއަށް ގެންދަވާނެ ކަމަށެވެ.
ރައީސް ވިދާޅުވީ މި އަތޮޅުގައި ދިރި އުޅޭ ރައްޔިތުންނަކީ އަތޮޅު ކުރިއެރުވުމަށް މަސައްކަތްކުރާ ބައެއް ކަމަށާއި ކިތަންމެ ކުޑަ ނަމަވެސް ކަމެއްް، ކޮންމެނ ރަށަކަށް ވެސް ސަރުކާރުން ކޮށްދެވޭތޯ އަޅެން އޮތް ހުރިހާ އެއްބާރުލުމެއް އަޅުއްވާނެ ކަމަށެވެ.
އެ ޖަލްސާގައި ވާހަކަފުޅު ދެއްކެވި މީދޫ ދާއިރާގެ މެންބަރު އަހްމަދު ޝިޔާމް ވިދާޅުވީ މި ރަށުގައި ހުރި ހެލްތު ސެންޓަރުގެ ހިދުމަތް ރަނގަޅު ފެންވަރެއްގައި ދޭން ފެށޭނެ ކަމަށާއި އަދި ޕްރީ ސްކޫލްގެ ހިދުމަތްދޭން ފެއްޓޭނެ ކަމަށެވެ.
ރައީސް ޑރ. ވަހީދު ފ. އަތޮޅަށާއި ދ. އަތޮޅަށް ކުރެއްވި ރަސްމީ ދަތުރުފުޅު ނިންމަވާލައްވާފައި މިއަދު ހަވީރު ވަނީ މާލެ ވަޑައިގެންފަ އެވެ. އެމަނިކުފާނު ވިދާޅުވީ މި ދަތުރުފުޅުގެ ސަބަބުން ވަރަށް ބޮޑު ހިތްޕުޅު ހަމަޖެހުމެއް ލިބިވަޑައިގެންނެވި ކަމަށާއި ވަރަށް ގިނަ ކަންތައްތަކެއް އެނގިވަޑައިގެންފި ކަމަށެވެ.
date_range
ބުރާސްފަތި 26 ޑިސެމްބަރ 2024