ބޭރުގެ ފަރާތްތަކުން ބޮޑެތި ލޯނުތަކެއް ނަގައިގެން ދައުލަތް ހިންގަން މަސައްކަތް ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހަންމަދު ވަހީދު ހަސަން މަނިކު ވިދާޅުވެއްޖެ އެވެ.
ރައީސް މިހާރު ފ. އަތޮޅަށާއި ދ. އަތޮޅަށް ކުރައްވަމުން ގެންދަވާ ދަތުރުފުޅުގައި ރޭ ފ. ނިލަންދޫ ރައްޔިތުންނާ ބައްދަލުކުރައްވައި ރައީސް ވަހީދު ވިދާޅުވީ މަސައްކަތް ކުރައްވަނީ ދައުލަތަށް ލިބޭ އެއްޗަކުން ފުއްދައިގެން ޚަރަދުތައް ބެލެހެއްޓުމަށް ކަމަށާއި ކޮންމެހެން ކުރަން ޖެހޭ ކަމެއް ކުރެއްވުމަށް ނޫނީ އިސްކަން ނުދެއްވާ ކަމަށެވެ.
"ރާއްޖެ އަށް އިތުރަށް އާމްދަނީ ވަންނާނެ ގޮތްތައް ހޯއްދަމުން މި އަންނަނީ. ބޭރުގެ ފަރާތްތަކުން ބޮޑެތި ލޯނުތަކެއް ނަގައިގެން ގައުމު ހިންގާކަށް ނޫޅޭނަން. ލިބޭ އާމްދަނީއަކުން ހަރަދުތައް ހަމަޖައްސަން ބަލަނީ،" ރައީސް ވިދާޅުވި އެވެ.
ރައީސް އެހެން ވިދާޅުވީ އިރު ދައުލަތަށް ލިބޭ އާމްދަނީ އަށް ވުރެ ހަރަދުތައް ބޮޑުވެ ދެކޮޅު ނުޖެއްސިގެން ސަރުކާރުން އަންނަނީ އިންޑިއާ ސަރުކާރުން 25 މިލިއަން ޑޮލަރުގެ ލޯނެއް ނެގުމަށް މަސައްކަތް ކުރަމުންނެވެ.
ދައުލަތަށް ހިޔާނާތްތެރި ނުވާނެކަމަށް ވައުދުވެ ވަޑައިގަންނަވަމުން ރައީސް ވިދާޅުވީ ތަރައްގީއަށް ޓަކައި ފެށިފައި ހުރި ވަރަށް ގިނަ މަޝްރޫއުތަކެއް ކުރިއަށް އޮތް ހަ މަސްދުވަހުގެ ތެރޭގައި އެކީއެކަށް ނިންމާލެވޭނެ ކަމަށެވެ. އެގޮތުން ރައީސް ފާހަގަ ކުރެއްވީ ލ. އަތޮޅުގައި އަޅާ 16 ކިލޯ މީޓަރުގެ މަގުގެ މަސައްކަތާއި އައިޖީއެމްއެޗްގައި އަލަށްހަދާ ޢިމާރާތުގެ މަސައްކަތާއި އަދި އައްޑޫ ސިޓީގެ އާ ހޮސްޕިޓަލްގެ އަމަލީ މަސައްކަތް ފެށުމެވެ. އަދި މޯލްޑިވިއަންގެ ފްލީޓަށް އޭ - 320 މަރުކާގެގެ ބޯޓެއް އިތުރުވުމަކީ ރާއްޖޭގެ ވައިގެ ދަތުރުފަތުރުގެ ޝިނާއަތަށް ލިބުނު އިތުރު ކުރިއެރުމެއްކަން ވެސް ރައީސް ފާހަގަކުރެއްވި އެވެ.
ސިޔާސީ ހަލަބޮލިކަމުގެ މައްޗަށް އަލިއަޅުވާ ލައްވަމަމުން ރައީސް ވިދާޅުވީ ވޭތުވެދިޔަ އަށް މަސްދުވަހަކީ، ރާއްޖެއަށް ދިމާވި އާދަޔާ ޚިލާފު ދުވަސްވަރެއް ކަމަށާއި އެ ދުވަސްތަކުން ރާއްޖެއަށް އަދިވެސް އަރައިގަނެވިފައި ނުވާ ކަމަށެވެ. އަދި ވިދާޅުވީ ރައްޔިތުން ނިކަމެތިކޮށް ގައުމު ހަލާކުކޮށްލަން ބަޔަކު ކެޑިނޭޅި މަސައްކަތް ކުރަމުން އަންނަ ކަމަށާއި އެކަމަށް ސަމާލުވާންޖެހިފައިވާ ކަމަށެވެ. އެކަމަށް ސަރުކާރުން ޖާގަ ނުދެއްވާނެ ކަމަށް ވިދާޅުވި އެވެ.
"އެ ހަލަބޮލިކަމުން މުޅިއަކުން އަރައިނުގަނެވޭ. ރާއްޖޭގެ ރައްޔިތުން ނިކަމެތިކޮށް. އިޤްތިޞާދު ހަލާކުކޮށް، ޤައުމުގައި ފިތުނަފަސާދަ އުފެއްދުމަށް ރައްޔިތުންގެ ޢުދުވާނުންތަކެއް މަސައްކަތް ކުރަމުންދޭ،" ރައީސް ވިދާޅުވި އެވެ. "އެކަމަށް ސަރުކާރު އޮތީ ސަމާލުވެގެން. ޤައުމު ހަލާކުކޮށް، ފިތުނަފަސާދަ އުފެއްދުމުގެ ފުރުޞަތެއް، އިރާދަކުރެއްވިއްޔާ އެފަދަ މީހުންނަށް ނުދޭނަން،"
މިވޭތުވެދިޔަ އަށް މަސްދުވަހުގެ ތަޖްރިބާއާއެކު ޤައުމައިގެން ކުރިއަށް ދިޔުމުގެ ފުރިހަމަ ޤާބިލުކަމާއި ޔަޤީންކަން އެބައޮތް ކަމަށް ރައީސް ވިދާޅުވި އެވެ. އަދި ވިދާޅުވީ ކުރިއަށް އޮތް ދުވަސްތަކަކީ އުފާ ފާގަތި ދުވަސްތަކަކަށް ވެގެން ދާނެ ކަމަށާއި ރައްޔިތުންނަށް ބޭނުންވާ އަސާސީ ހުރިހާ ހިދުމަތެއް ފޯރުކޮށްދެއްވޭނެ ކަމުގެ ފުރިހަމަ ޔަގީންކަން އޮތް ކަމަށެވެ.
date_range
ބުރާސްފަތި 26 ޑިސެމްބަރ 2024