ރައީސް އިބްރާހިމް ސޯލިހްގެ ސަރުކާރަށް ދެ އަހަރު ފުރުނީއެވެ. ވައުދުތަކާއެކު އައި މި ސަރުކާރުން ވައުދު ފުއްދާ ރައްޔިތުންނަށް ހޯދައިދިނީ ކޮން މަންފާއެއް ހެއްޔެވެ؟ މި ހާއްސަ އެޑިޝަންގައި މި ބަލައިލަނީ ސަރުކާރަށް ދެއަހަރު ތެރޭ ހޯދުނު ކާމިޔާބީތަކަށެވެ. ސަރުކާރަށް ހާސިލްވީ މިންވަރަށެވެ. ރައްޔިތުން އެކަމާ މެދު ދެކުނު ގޮތަށެވެ. ރައްޔިތުންނަށް ލިބުނު ފޮނި މީރުކަމަށެވެ.
ހަގީގީ ލާމަރުކަޒީ ނިޒާމުގެ ފޮނިމީރުކަން ހޯދައިދިނުމަކީ މި ސަރުކާރުން ދެ އަހަރު ތެރޭ ހޯދުނު ބޮޑު ކާމިޔާބެއް.
ސަރުކާރާއި އިދިކޮޅުގެ ވިސްނުން އުޑާ ބިމާހާ ތަފާތު ނަމަވެސް، މި ޑިމްކޮރަސީގައި ގޮތް ނިންމަންޖެހޭނީ ރައްޔިތުންނެވެ. މުހިންމީ ރައީސް ސޯލިހުގެ މާލިމީކަމުގެ ދަށުން އިންސާފުގެ ކަނޑަށް ނުކުތް އޮޑީގެ މިސްރާބާއި، އޮޑީގެ ދުވެއްޔާމެދު ރައްޔިތުން ދެކޭގޮތެވެ. ސަރުކާރަށް ދެ އަހަރު ފުރި ތިން ވަނަ އަހަރެއް ފެށުނު އިރު ސަރުކާރުން ބުނާ އިންސާފުގެ އިހްސާސް ރައްޔިތުންނަށް ކުރެވޭ ހެއްޔެވެ؟