ވެލާނާ އިންޓަނޭޝަނަލް އެއާޕޯޓްގެ މިހާރު ބޭނުންކުރަމުން އަންނަ ރަންވޭގެ ހުޅަނގު ދެކުނުން ބޭނުން ކުރަމުން އައި މަގު ބަންދުކޮށް އިތުރު މަގެއް ހުޅުވައިފި އެވެ.
މޯލްޑިވްސް އެއާޕޯޓްސް ކޮންޕެނީ ލިމިޓެޑް (އެމްއޭސީއެލް)ގެ ޖެނެރަލް މެނޭޖަރު ކޯޕަރޭޓް ކޮމިއުނިކޭޝަން ހަސަން އަރީފް އިއްޔެ ސަން އަށް ވިދާޅުވީ، މިހާރު ބޭނުން ކުރަމުން އަންނަ އެ މަގު ބަންދުކުރީ ފްލައިޓްތައް ޕާކްކުރުމަށް ޓަކައި ބޭނުންވާ އޭޕްރޮން 50،000 އަކަފޫޓަށް ބޮޑުކުރުމަށް ކަމަށެވެ.
މިހާރު ބޭނުން ކުރަމުން އަންނަ އެ މަގު ބަނދުކޮށް މިއަދުން ފެށިގެން ދެން ބޭނުން ކުރާނީ މިހާރު ބޭނުން ކުރަމުން އަންނަ މަގުގެ ހުޅަގުން އަލަށް ހަދާފައިވާ 630 މީޓަރުގެ މަގު ކަމަށް ވެސް އަރީފް ވިދާޅުވި އެވެ.
އަލަށް ބޮޑުކުރަން ނިންމާފައިވާ އޭޕްރޮންގެ އިތުރުން އެއާޕޯޓްގެ އައު ރަންވޭއެއް އަޅައި އެއާޕޯޓް ތަރައްގީ ކުރުމުގެ ތަފާތު މަޝްރޫއުތައް ދަނީ ހިންގަމުންނެވެ.