ރާއްޖޭގައި ފަގީރުންނާއި މިސްކީނުންގެ ގޮތުގައި ރަޖިސްޓްރީ ކުރި މީހުންގެ އަދަދު 1436 ވަނަ އަހަރަށް ވުރެ، 1437 ވަނަ އަހަރު ފަގީރުންގެ ގޮތުގައި ރަޖިސްޓްރީ ކުރި ނިސްބަތް 31 ޕަސެންޓް އިތުރުވެއްޖެ އެވެ.
އިސްލާމިކް މިނިސްޓްރީގެ ކޯޑިނޭޓަރު މުހައްމަދު އަހްސަން މިއަދު ސަން އަށް ވިދާޅުވީ 1436 ވަނަ އަހަރު މުދަލު ޒަކާތް ހައްގުވާ ފަގީރުންގެ ލިސްޓުގައި 12335 މީހުން ހިމެނިފައިވާ ކަމަށެވެ. ނަމަވެސް އޭގެ ފަހު އަހަރު، 1437 ވަނަ އަހަރު މުދަލު ޒަކާތުގެ ފައިސާ އިން ޒަކާތް ހައްގުވާ ލިސްޓަށް 3934 މީހުން އިތުރުވެފައިވާ ކަމަށެވެ.
މި އަހަރު މުދަލު ޒަކާތް ލިބޭ ފަގީރުންނާއި މިސްކީނުންގެ ލިސްޓުގައި މުޅި ރާއްޖެއިން 16269 މީހުން ރަޖިސްޓްރީ ކޮށްފައިވާ ކަމަށް އަހުސަން ވިދާޅުވި އެވެ. އެއީ 1436 ވަނަ އަހަރާ އަޅާބަލާ އިރު 31 ޕަސެންޓުގެ އިތުރުވުމެކެވެ.
އިސްލާމިކް މިނިސްޓްރީ އިން ބުނީ މުދަލު ޒަކާތުގެ ގޮތުގައި މި އަހަރު ދޫކުރާނީ މީހަކަށް 900 ރުފިޔާ ކަމަށެވެ. އެއީ މިދިޔަ އަހަރު ވެސް ބެހި އަދަދެވެ.
ފަގީރުންނާއި މިސްކީނުންގެ ގޮތުގައި މި އަހަރު ރަޖިސްޓްރީ ކޮށްފައިވާ ފަގީރުންގެ އަދަދުން ބަލާ އިރު މި އަހަރު މުދަލު ޒަކާތުގެ ގޮތުގައި 14.6 މިލިއަން ދިވެހި ރުފިޔާ އިސްލާމިކް މިނިސްޓްރީން ބަހާނެ ކަމަށް އެ މިނިސްޓްރީ އިން ބުންޏެވެ. ނަމަވެސް 1436 ވަނަ އަހަރު މުދަލު ޒަކާތުގެ ގޮތުގައި ލިބުނު ވަރެއް އިސްލާމިކް މިނިސްޓްރީން ހާމައެއް ނުކުރެ އެވެ.
އިސްލާމިކް މިނިސްޓްރީން ބުނި ގޮތުގައި މިއަދުން ފެށިގެން އަންނަ އަންގާރަ ދުވަހުގެ ނިޔަލަށް މުދަލު ޒަކާތް ބަހަން ފަށާފައި ވަނީ މާލެ، ވިލިމާލެ އަދި ހުޅުމާލޭގައި ދިރިއުޅޭ ފަގީރުންނާއި މިސްކީނުންނަށެވެ.
މާލޭ ސަރަހައްދުން 3155 މީހުން ފަގީރުންގެ ގޮތުގައި މި އަހަރުރަޖިސްޓްރީ ކޮށްފައިވާ އިރު އެމީހުންނަށް މުދަލު ޒަކާތް ބަހާނީ ކޮންމެ ދުވަހެއްގެ ވެސް ހެނދުނު 9.00 އިން 15.00 އަށް ކަމަށް އިސްލާމިކް މިނިސްޓްރީ އިން ބުންޏެވެ. އަދި ނަމާދު ވަގުތަށް ބަންގި ގޮވާ ވަގުތުން ފެށިގެން 30 މިނެޓަށް ފައިސާ ދޫކުރުން މެދުކަނޑާލާނެ ކަމަށް ވެސް އެ މިނިސްޓްރީ އިން ބުންޏެވެ.
އެ މިނިސްޓްރީން ބުނީ، ކޮންމެ ދުވަހަކު ވެސް ދޫކުރާނީ ދުވާލަކަށް 150 ނަންބަރު ކަމަށާއި ނަންބަރު ދޫކުރާނީ ނަންބަރު ނަގަން އަންނަ ތަރުތީބުން ކަމަށެވެ. ކޮންމެ ނަންބަރަކަށް 15 އައިޑީ ކާޑަށް ހިދުމަތް ދޭނެ ކަމަށް ވެސް ބުންޏެވެ.
އަދި ފަގީރުންގެ ލިސްޓުގައި ނަންނޯޓް ކޮށްފައިވާ މީހުންގެ އައިޑީކާޑު ހިފައިގެން ބަދަލުގައި މީހަކު އައިކަމުގައިވީ ނަމަވެސް އެއީ ވެރިފަރާތުން ފޮނުވި މީހެއްކަމުގައި ބަލައި، އެ މީހެއްގެ ފައިސާ އައިޑީކާޑު ހިފައިގެން އަންނަ މީހާއަށް ދޫކުރާނެ ކަމަށް އިސްލާމިކް މިނިސްޓްރީން ބުނެ އެވެ.
އިސްލާމިކް މިނިސްޓްރީން ބުނީ މާލެ، ހުޅުމާލެ އަދި ވިލިމާލޭގައި ދިރިއުޅޭ މީހުންނަށް މުދަލު ޒަކާތް ބެހުމުގެ މަސައްކަތް މިނިސްޓްރީން ކުރިއަށް ގެންދާއިރު، އެ މަސައްކަތް އަތޮޅު ތެރޭގައި ކުރިއަށް ގެންދާނީ ރަށު ކައުންސިލްތަކާއި އަތޮޅު ކައުންސިލްތަކުން ކަމަށެވެ. އަދި މުދަލު ޒަކާތް ބަހަން ފަށާނެ ދުވަހެއް ކަނޑައަޅާނީ އެ ކައުންސިލަކުން ކަމަށް އިސްލާމިކް މިނިސްޓްރީން ބުނެ އެވެ.