ވޮޝިންޓަން (ޖުލައި 26): ރަޝިއާއާ ދެކޮޅަށް ދަތިކުރުމުގެ ފިޔަވަޅު އެޅުމާ ބެހޭ ބިލް އެމެރިކާގެ ގާނޫނު ހަދާ މަޖިލީހުގެ ތިރީގެއިން ފާސްކޮށްފި އެވެ.
ރަޝިއާގެ އިތުރުން އީރާނާއި އުތުރު ކޮރެއާއާ ދެކޮޅަށް އަޅާނެ ފިޔަވަޅުތައް ހިމަނާފައިވާ އެބިލު ފާސް ކުރުމަށް މަޖިލީހުގެ 419 މެމްބަރުން ވޯޓު ދިން އިރު ބިލާ ދެކޮޅަށް ވޯޓު ދިނީ އެންމެ ތިން މެމްބަރުންނެވެ. އެބިލު ދެން ފޮނުވާނީ މަޖިލީހުގެ މަތީގެއަށެވެ. އަދި އެއަށް ފަހު ރައީސް ޑޮނަލްޑް ޓްރަމްޕަށެވެ.
ރައީސް ޓްރަމްޕް ވެރިކަމަށް ވަޑައިގެންނެވިތާ ހަ މަސްވެފައިވާ އިރު، ރަޝިއާ އިން އެމެރިކާގެ ރިޔާސީ އިންތިހާބަށް ނުފޫޒު ފޯރުވި މައްސަލަ އެފްބީއައި އާއި ގާނޫނު ހަދާ މަޖިލީހުން އަދިވެސް ދަނީ ބަލަމުންނެވެ. ނަމަވެސް ޓްރަމްޕް އަކީ ރިޔާސީ ކެމްޕެއިން ފެއްޓެވި އިރުވެސް ރަޝިއާއާ އެކު ގާތް ގުޅުމެއް ބާއްވަން ބޭނުންފުޅުވާ ކަމަށް ވިދާޅުވެފައިވާ ބޭފުޅެކެވެ.
އެހެންކަމުން ރަޝިއާއާ ދެކޮޅަށް އަޅާ ފިޔަވަޅުތަކާ ބެހޭ ބިލުގައި ގާނޫނު ހަދާ މަޖިލީހުން ވަނީ ހާއްސާ މާއްދާއެއް ހިމަނާފަ އެވެ. އޭގައިވާ ގޮތުން، ރަޝިއާއާ ދެކޮޅަށް އަޅާފައިވާ ފިޔަވަޅެއް އުވާލަން ޓްރަމްޕް ބޭނުންފުޅުވާ ނަމަ އެއާ ބެހޭ ރިޕޯޓެއް ގާނޫނު ހަދާ މަޖިލީހަށް ފޮނުވަން ވާނެ އެވެ. އަދި އެފިޔަވަޅު އުވާލެވެނީ ގާނޫނު ހަދާ މަޖިލީހުން އެކަމަށް އެއްބަސްވުމުންނެވެ.
މީގެ އިތުރުން އެބިލަކީ ޑިމޮކްރެޓިކް އަދި ރިޕަބްލިކަން ލީޑަރުން ހިމެނޭ ސެނެޓް ފޮރިން ރިލޭޝަންސް ކޮމިޓީން ހަދާފައިވާ ބިލެއް ކަމުން ޓްރަމްޕް އެ ބިލު ވީޓޯ ކުރެއްވުމަކީ ނާދިރު ކަމެކެވެ. އެއީ އޭގެ ސަބަބުން ޑިމޮކްރެޓުންގެ އިތުރުން ރިޕަބްލިކަން މެމްބަރުންގެ ނުރުހުން ވެސް ޓްރަމްޕަށް އަމާޒުވެ، ރަޝިއާ އިން ބޭނުންވާ ގޮތަށް ޓްރަމްޕް އަމަލު ކުރައްވާ ކަމުގެ ތުހުމަތުތައް ފެންމަތިވާނެތީ އެވެ. (އަލްޖަޒީރާ)