ގާހިރާ (ޖޫން 15): ރަތް ކަނޑާއި އަގަބާގެ ކަނޑުއޮޅި ގުޅޭ ސަރަހައްދުގައި އޮންނަ މިސްރުގެ ދެ ޖަޒީރާއެއް ކަމުގައިވާ ޖަޒީރަތު ތީރާން އަދި ޖަޒީރަތު ޞަނާފީރު ސައުދީ އަރަބިއްޔާއަށް ދިނުމަށް މިސްރުގެ ގާނޫނު ހަދާ މަޖިލީހުން ފާސްކޮށްފި އެވެ.
އިއްޔެ މަޖިލީހުގެ ޑިފެންސް އެންޑް ނެޝަނަލް ސެކިއުރިޓީ ކޮމިޓީން ވަނީ އެއެއްބަސްވުމަށް ރުހުން ދީފަ އެވެ. އެކޮމިޓީއަށް މިސްރުގެ ސަރުކާރުން ހުށަހެޅި ރިޕޯޓެއްގައިވާ ގޮތުން އެ ރަށްތައް ސައުދީއަށް ދިން ނަމަވެސް ދެ ރަށުގެ ހުރިހާ ކަމެއް ބަލަހައްޓާނީ މިސްރުންނެވެ.
އެނިންމުމަށް އަދި ރައީސް އަބްދުލް ފައްތާހު އަލް ސީސީގެ ރުހުން ބޭނުންވާނެ އެވެ.
ގާނޫނު ހަދާ މަޖިލީހުގެ އެނިންމުމާ ގުޅިގެން ބައެއް މަޖިލިސް މެމްބަރުން ވަނީ މަޖިލީހުގައި ހަޅުތާލު ކުރާނެ ކަމަށާއި، މަގާމުން އިސްތިއުފާ ދެއްވާނެ ކަމުގެ އިންޒާރުވެސް ދެއްވާފަ އެވެ. އަދި ގިނަ އަދަދެއްގެ މީހުން ގާހިރާގެ މަގުތަކުގައި މުޒާހަރާކުރުމާ ގުޅިގެން އަށް މީހަކު ހައްޔަރުކޮށްފައިވެ އެވެ.
ތީރާން އަދި ސަނާފީރު ސައުދީއަށް ވެދުންކުރުމަށް މިސްރުގެ ރައީސް އަބްދުލްފައްތާހު ސީސީ ނިންމީ، 2016 ވަނަ އަހަރުގެ އޭޕްރިލް މަހު އެގައުމަށް ސައުދީ ރަސްގެފާނު ސަލްމާން ބިން އަބްދުލްްއަޒީޒް ކުރެއްވި ދަތުރުފުޅުގެ ތެރެއިންނެވެ. ސީސީ އެފަދައިން ސައުދީއާ ޑީލް ހަދައި، ދެ ރަށް ދިނީ އެ ދެ ރަށް ގުޅުވާލައި، ސައުދީއާ މިސްރާ ދެމެދު ކޯޒްވޭއެއް އެޅުމަށް ކަމަށް ބައެއް ފަރާތްތަކުން ބުނެއެވެ.
ނަމަވެސް ސަރުކާރާ އިދިކޮޅު ފަރާތްތަކުން ވަނީ ސައުދީ އަރަބިއާ ރުއްސުމަށްޓަކައި އެ ގައުމަށް މިސްރުގެ ރަށްތައް ދީފައި ވަނީ ގާނޫނު އަސާސީއާ ހިލާފަށް ކަމަށް ބުނެފަ އެވެ. އަދި އެއީ ސީސީ އިސްކޮށް ހުންނަވައިގެން ކުރީގެ ރައީސް މުހައްމަދު މުރްސީގެ ސަރުކާރު 2013 ވަނަ އަހަރު ވައްޓާލި ފަހުން ސައުދީން ސީސީގެ ސަރުކާރަށް މާލީ އެހީ ފޯރުކޮށްދޭތީ ކަމަށް ބުނެފަ އެވެ.
އަދި ސައުދީއަށް އެފަދައިން ދެ ރަށް ނުދެވޭނެކަމަށް މިސްރުގެ ހައި ކޯޓަކުން ޖޫން މަހުގެ ތެރޭގައި ނިންމި އިރު، އެގައުމުގެ ސުޕްރިމް އެޑްމިނިސްޓްރޭޓިވް ކޯޓުން ވަނީ އެ ހުކުމް ދަމަހައްޓައިފައެވެ. (ބީބީސީ)