ނޭޕާލްގެ ޓެބަކާން ޔުނިވާސިޓީ އިން ސްޕެޝަލިސްޓް ތަމްރީނު ހޯދުމަށް ލިބުނު ފުރުސަތު އިއުލާނުކޮށް، އެކަމަށް ކުރިމަތިލައިގެން ފުރުސަތު ލިބުނު ކުދިންނަށް އެކަމުގެ ލިޔުން ހަވާލުކޮށްފި އެވެ.
ސިއްހީ ދާއިރާއަށް ބޭނުންވާ ދިވެހި ސްޕެޝަލިސްޓުންނަށް ތަމްރީނު ދިނުމަށް ނޭޕާލްގެ ޔުނިވާސިޓީއާއި ދިވެހި ސަރުކާރުން ސޮއިކޮށްފައިވާ އެމްއޯޔޫގެ ދަށުން ކުރި އެ އިއުލާނާ ގުޅިގެން ކުރިމަތިލީ ފަރާތްތަކުގެ ތެރެއިން ހަތް ފަރާތަކަށް ވަނީ އެކަމުގެ ލިޔުން ހަވާލުކޮށްފަ އެވެ.
މިއަދު ހެލްތު މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި ސްޓޭޓް މިނިސްޓަރު ޑރ. މުހައްމަދު ހަބީބް ވިދާޅުވީ، ވޭތުވެ ދިޔަ ތަނުގައި ނޭޕާލުން ގިނަ އަދަދެއްގެ ދިވެހި ޑޮކްޓަރުންނަށް ތަމްރީނު ދީފައިވާ ކަމަށެވެ. އެގޮތުން މިދިޔަ ދެ އަހަރު ޖުމްލަ 36 ޑޮކްޓަރުންނަށް ސްޕެޝަލިސްޓް ތަމްރީނު ދީފައިވާ ކަމަށް ހަބީބު ވިދާޅުވި އެވެ.
ހަބީބު ވިދާޅުވީ ދިވެހި ޑޮކްޓަރުންނަށް އެކަށީގެންވާ ތަމްރީނު ދީގެން ނޫނީ ދިވެހިންނަށް އެކަށީގެންވާ ބޭސްފަރުވާ ނުލިބޭނެ ކަމަށެވެ.
ހަބީބު އިތުރަށް ވިދާޅުވީ ރާއްޖޭގައި މަސައްކަތްކުރާ ބިދޭސީ ސްޕެޝަލިސްޓުންގެ އަދަދު މަދުކުރުމަށް، ދިވެހި ޑޮކްޓަރުންނަށް ސްޕެޝަލިސްޓް ދާއިރާއިން ތަމްރީނު ދިނުމަށް ސަރުކާރުން ގިނަ މަސައްކަތްތަކެއް ކުރައްވަމުން އަންނަ ކަމަށެވެ. އަދި ވިދާޅުވީ މި އަހަރުގެ ތެރޭގައި އިތުރު ފުރުސަތުތައް ލިބޭނެ ކަމަށް އުންމީދު ކުރައްވާ ކަމަށެވެ.