މިއަހަރު ރާއްޖެއިން ހައްޖަށް މީހުން ގެންދިއުމުގެ ހުއްދަ ދިނުމާ ގުޅޭ ކަންކަން މަޑުޖައްސާލުމަށް އެންޓި ކޮރަޕްޝަން ކޮމިޝަން (އޭސީސީ) އިން އިސްލާމިކް މިނިސްޓްރީއަށް އަންގާފައިވާތީ، ހައްޖު ގްރޫޕްތަކަށް ފައިސާ ނުދެއްކުމަށް އާންމު ރައްޔިތުންނަށް އޭސީސީ އިން އިލްތިމާސް ކޮށްފިއެވެ.
އިސްލާމިކް މިނިސްޓްރީން ވަނީ މިއަހަރު ރާއްޖެ އިން ހައްޖަށް މީހުން ގެންދިއުމަށް އަމިއްލަ ފަސް ކުންފުންޏަކާއެކު ހައްޖު ކޯޕަރޭޝަނަށް ހައްޖު ކޯޓާ ދިނުމަށް ނިންމައި އެކަން މީގެ ތިން ދުވަސް ކުރިން އިއުލާން ކޮށްފައެވެ.
ނަމަވެސް ހައްޖަށް މީހުން ގެންދިއުމަށްޓަކާ އެކަމަށް އެދޭ ފަރާތްތަކަށް ހައްޖު ކޯޓާ ދޫކުރުމަށްޓަކާ އިސްލާމިކް މިނިސްޓްރީން ކުރި އިއުލާނާ ގުޅިގެން ހައްޖު ކޯޓާ ލިބޭ ފަރާތްތަކަށް ހޮވުމުގައި ކޮރަޕްޝަނަށް މަގުފަހިވާ ގޮތަށް އަމަލުކޮށްފައިވާ ކަމަށް ބުނެ، އޭސީސީ އިން ވަނީ އެކަން މަޑުޖައްސާލަން އިސްލާމިކް މިނިސްޓްރީއަށް އަންގާފައެވެ.
އޭސީސީ އިން މިއަދު ނެރުނު ބަޔާނެއްގައި ބުނީ، މިއަހަރު ހައްޖަށް މީހުން ގެންދިއުމަށް ހުއްދަދޭނެ ކުންފުނިތައް އިސްލާމިކް މިނިސްޓްރީން ހޮވިނަމަވެސް، މިހާތަނަށް އެއްވެސް ކުންފުންޏަކަށް ހުއްދަދީ އަދި ކޯޓާ ދޫކުރުމަށް އިސްލާމިކް މިނިސްޓްރީން ސޮއިކޮށްފައިނުވާ ކަމަށެވެ.
ނަމަވެސް ބައެއް ކުންފުނިތަކުން ހައްޖަށް މީހުން ގެންދިއުމަށް އާންމުންގެ އަތުން ފައިސާ ނަގާކަމުގެ ޝަކުވާ ހުށަހެޅިގެންދާ ކަމަށާއި އެހެންކަމުން އަދި އެ ކުންފުނިތަކަށް ފައިސާ ނުދެއްކުމަށް އޭސީސީން ވަނީ އިލްތިމާސް ކޮށްފައެވެ.
"ކުންފުނިތަކުން ހައްޖަށް މީހުން ގެންދިއުމަށް އާންމުންގެ އަތުން ފައިސާ ނުނެގުމަށާއި އަދި އާންމު ފަރާތްތަކުން ވެސް ކުންފުނިތަކަށް ފައިސާ ނުދެއްކުމަށް މި ކޮމިޝަނުން އިލްތިމާސްކުރަމެވެ.،" އޭސީސީގެ ބަޔާނުގައި ބުނެފައިވެއެވެ.
ހައްޖަށް މީހުން ގެންދިއުމުގެ ހުއްދަ ދިނުން މަޑުޖައްސާލަން އޭސީސީން މިއަދު އަންގާފައިވާއިރު، ވަކި ބަޔަކަށް މަންފާވާ ގޮތަށް ހައްޖަށް ގެންދިއުމުގެ ހުއްދަ ދީފައިވާ ކަމަށް ބުނެ، އިސްލާމިކް މިނިސްޓްރީގެ އިސް އޮފިޝަލަކު ވާހަކަ ދައްކާފައިވާ އޯޑިއޯއެއް ވަނީ އާންމުވެފަ އެވެ.
ރާއްޖެއަށް މިއަހަރު މިހާތަނަށް ލިބިފައިވާ 1000 ހައްޖު ކޯޓާގެ ތެރެއިން 500 މީހުން ހައްޖަށް ގެންދިއުމުގެ ހުއްދަ ދޭނީ ހައްޖު ކޯޕަރޭޝަނަށެވެ. އަދި ބާކީ 500 ކޯޓާގެ ތެރެއިން މިނިސްޓްރީން ހޮވި ކޮންމެ ކުންފުންޏަކަށް ވެސް ދޭން ނިންމާފައިވަނީ 100 ކޯޓާއެވެ.