އޭއެފްސީ ކަޕްގެ ގްރޫޕް ސްޓޭޖުގައި ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި ދާކާ އަބަހާނީ ބައްދަލުކުރާ މެޗުގެ ލައިވް ކަވަރޭޖަށް ސަންގެ ކިޔުންތެރީންނަށް މަރުހަބާ!
މިއަދު ހަވީރު ބަނގްލަދޭޝްގެ ބަންގަބަންދު ސްޓޭޑިއަމްގައި ކުޅޭ އެ މެޗަށް ނުކުންނައިރު:
- މެޗުގައި އެއްކޮޅުން ނުކުންނަ މާޒިޔާއަކީ މިދިޔަ އަހަރުގެ ދިވެހި ޕްރިމިއާ ލީގުގެ ޗެމްޕިއަން.
- މާޒިޔާއާ ދެކޮޅަށް ނުކުންނަ އަބަހާނީއަކީ ބަންގާޅު ލީގުގެ ޗެމްޕިއަން.
- މާޒިޔާއިން މެޗަށް ނުކުންނައިރު، އެޓީމު ވަނީ މިއަހަރު ކުޅުނު ޗެރިޓީ ޝީލްޑް މެޗާއި މާލޭ ލީގުގައި ކުޅުނު ދެ މެޗުން ވެސް މޮޅުވެފައި.
- މާޒިޔާއިން މާލޭ ލީގުގައި ކުޅުނު ދެ މެޗުގައި ވެސް އެޓީމު ކޮޅަށް އެއްވެސް ލަނޑެއް ވަދެފައެއް ނުވޭ.
- މާލޭ ލީގުގައި މާޒިޔާއިން ވަނީ ކްލަބު އީގަލްސް އަދި ކްލަބު ގްރީން ސްޓްރީޓްސް ބަލިކޮށްފައި.
- އޭއެފްސީ ކަޕަށް ތައްޔާރުވުމަށް އަބަހާނީ ވަނީ ބަނގްލަދޭޝްގައި ބޭއްވި ޝެއިޚް ކަމާލް އިންޓަނޭޝަނަލް ކްލަބު ކަޕްގައި ވާދަކޮށްފައި.
- އެ މުބާރާތުގައި އަބަހާނީއަށް ގްރޫޕް ސްޓޭޖް ފަހަނައަޅައި ދެވިފައިނުވާއިރު، ރާއްޖޭގެ ޓީސީ ސްޕޯޓްސް ކްލަބު އަތުން ބަލިވެފައިވޭ. ޓީސީއަކީ އެ މުބާރާތުގެ ޗެމްޕިއަން.
- އޭއެފްސީ ކަޕްގެ 'ގްރޫޕް އީ'ގައި މާޒިޔާއާއި އަބަހާނީގެ އިތުރުން ހިމެނެނީ އިންޑިއާގެ ލީގު ޗެމްޕިއަން އަދި މިދިޔަ އަހަރުގެ އޭއެފްސީ ކަޕްގެ ރަނަރަޕް ބެންގަލޫރު އެފްސީއާއި އިންޑިއާގެ ލީގު ރަނަރަޕް މޯހަން ބަގާން.