މިހާރު ރާއްޖެއަށް ކުރަމުންދާ ވިއްސާރައިގެން ސަބަބުން ދިޔަވަރު ބޮޑުވާ ގަޑިތަކުގައި ބައެއް ސަރަހައްދުތަކަށް އުދައެރުން އެކަށީގެންވާ ކަމަށް މޫސުމާ ބެހޭ އިދާރާއިން ލަފާކޮށްފިއެވެ.
މޯލްޑިވްސް މީޓްރިއޮލޮޖިކަލް ސާވިސް އިން ލަފާކުރާގޮތުން މިއަދުގެ ހެނދުނު 10:00 އިން މާދަމާ ހެނދުނު 10:00 އަށް ކަނޑު ގަދަވެ، ގުގުރުމާއެކު ވިއްސާރަކުރާނެއެވެ. އަދި ބައެއް ސަރަހައްދު ތަކަށް އުދައެރުން އެކަށީގެންވާތީ ކަނޑުދަތުރު ކުރައްވާ ފަރާތްތަކުން ސަމާލުވުމުނަށް ވަނީ އިލްތިމާސްކޮށްފައެވެ.
މިއަދަށް ލަފާކުރާ މޫސުން
- ރާއްޖޭގެ ބޮޑުބަޔަކަށް ވިއްސާރަކުރާނެ އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހޭނެ
- ކުނުގެ އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު 10 މޭލާ 20 މޭލާ ދެމެދުގެ ބާރުމިނުގައި ވައިޖެހޭނެ
- އެހެން ހިސާބުތަކަށް ހުޅަނގާއި ހުޅަނގުއުތުރުން ގަޑިއަކު 15 މޭލާ 25 މޭލާ ދެމެދުގެ ބާރުމިނުގައި ވައިޖެހޭނެ
- ވިލާގަޑުގައި ގަޑިއަކު ގާތްގަޑަކަށް 45 މޭލާ 50 މޭލާ ދެމެދުގެ ބާރުމިނަށް ވައިގަދަވުން އެކަށީގެންވޭ
- ރާއްޖޭގެ ކަނޑުތައް އާއްމުގޮތެއް ގަދަވާނެ
ރާއްޖޭއަށް މިހާރުކުރަމުންދާ ވިއްސާރައިގައި ރާއްޖޭގެ ބޮޑު ބަޔަކަށް ވިއްސާރަކޮށް ބައެއް ރަށްތަކަށް ގުގުރުމާއެކު ބޯކޮށް ވާރާވެހޭނެކަމަށް މޫސުމާބެހޭ އިދާރާއިން ލާފަކޮށްފައިވާތީ، ކަނޑުދަތުރުކުރާ ފަރާތްތަކުން މޫސުމަށް ބަލައިގެން ދަތުރު ކުރުމަށް ފުލުހުންވެސް ރޭ ވަނީ އިލްތިމާސްކޮށްފަ އެވެ.