އައްޑޫ ސިޓީ ވިލިނގިލީގައި ހުންނަ ޝަންގްރިލާ ވިލިނގިލި ރިސޯޓް އެންޑް ސްޕާ މޯލްޑިވްސް ރިސޯޓުގައި ޗައިނާ ފަތުރުވެރިއަކު ގެނބިގެން މަރުވެއްޖެ އެވެ.
ޝަންގްރިލާ ރިސޯޓުގައި ގެނބިގެން މަރުވެފައި ވަނީ ޗައިނާ ފިރިހެނެކެވެ.
ފުލުހުންގެ މީޑިއާ އޮފިޝަލް ވިދާޅުވީ، މިއަދު 9:00 ހާ އިރު އެ ހާދިސާ ރިޕޯޓް ކޮށްފައި ވަނީ ހިތަދޫ ރީޖަނަލް ހޮސްޕިޓަލުން ކަމަށެވެ. އަދި ފަތުރުވެރިޔާ ހޮސްޕިޓަލަށް ގެނައި އިރު ވެސް އޭނާ އޮތީ މަރުވެފައި ކަމަށް ހޮސްޕިޓަލާ ހަވާލައިދީ ފުލުހުންގެ މީޑިއާ އޮފިޝަލް މައުލޫމާތު ދެ އެވެ.
މާލެއާ ހުޅުލެއާ ދެމެދު އަޅާ ޗައިނާ މޯލްޑިވްސް ފްރެންޑްޝިޕް ބްރިޖުގެ މަސައްކަތް ކުރަމުން ދިޔަ ސަރަހައްދުން މިއަދު ޗައިނާ މީހަކަށް ވެސް އަނިޔާ ވެފަ އެވެ. އެސަރަހައްދުގައި ދުއްވި ޑިންގީއެއް ބަންޑުން ޖަހާލުމުގެ އޭގައި އިން ދެ މީހަކަށް އަނިޔާވި އިރު، އޭގެ ތެރެއިން އެކަކީ ޗައިނާ މީހެކެވެ.
އޭނާ އޭޑީކޭ އަށް ގެންގޮސްފައިވާ އިރު، އެ ހޮސްޕިޓަލުން ބުނީ އޭނާ އަށް ފަރުވާ ދެމުން އަންނަ ކަމަށާއި ޑޮކްޓަރުގެ ރިޕޯޓު ނުލިބޭތީ އަދި ވަކި އެއްޗެއް ބުނަން ނޭނގޭ ކަމަށެވެ.