މާލޭގައި ޕާކް ތަރައްޤީ ކުރުމުގެ މަޤްސަދު ހާސިލްވަމުން އަންނަ ކަމަށް ހައުސިން މިނިސްޓްރީ އިން ބުނެފި އެވެ.
ހައުސިންގ މިނިސްޓްރީގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ މިނިސްޓްރީގެ ސްޓޭޓް މިނިސްޓަރު އަހުމަދު ހަބީބު ވިދާޅުވީ މާލޭގައި ޕާކް ތަރައްޤީ ކުރުމުގެ މަޤްސަދަކީ އިޖުތިމާއީ ގުޅުން ރަނގަޅުކުރުން ކަމަށެވެ. އެ މަޤްސަދު ހާސިލްވަމުން އަންނަ ކަމަށް ފާހަގަ ކުރައްވައި ހަބީބު ވިދާޅުވީ މާލޭގައި ޕާކް ހެދުމުގެ އަނެއް ބޭނުމަކީ ވީހާ ވެސް ހުސް ޖާގަ އިތުރު ކުރުން ކަމަށެވެ.
"އަޅުގަނޑުމެން ފަހުން މި ހުޅުވި ދެ ޕާކްވެސް ހަމަ، އަޅުގަނޑުމެން މި ބޭނުންވި މަޤްސަދު ހާސިލްވަމުން ދާކަން އެބ ފެނޭ. ކޮންމެ ދުވަހަކު ހެނދުނު އަދި ހަވީރުވެސް މީހުން ފުރި ބާރުވެފައި އޮންނަ ތަނެއް ކަމަށް މި ފާހަގަ ވަނީ،" ހަބީބު ވިދާޅުވިއެވެ.
ހަބީބު އިތުރަށް ވިދާޅުވީ، ނަތީޖާ ފެންނަ ގޮތުން މިފަދަ ހުސް ބިންތަކަށް މާލޭގައި ދިރިއުޅޭ ރައްޔިތުން ބޭނުންވެފައި ތިބިކަން ހާމަވަމުން އަންނަ ކަމަށެވެ.
މާފަންނު މުއިވެޔޮދޮށު ނުވަތަ ބިސްބުރު ހުރި ތަނަށް ޖުމްހޫރީ ބިނާ ބަދަލުކޮށް ކުޑަކުދިން ކުޅޭ ސާމާނާއެކު ބިސްބުރު ޕާކް ތަރައްޤީކޮށް ހުޅުވާފައި ވާއިރު، މާލޭ ދެކުނު ހާބަރު ސަރަހައްދުން، ހާބަރު "ކަޑަތައް" ހުންނަ ސަރަހައްދުގައި ރައިވެރިބޭ މައިޒާންވެސް ދާދި ފަހުން ވަނީ ހުޅުވާފައެވެ.