ޝަންގްރިއްލާ، ވިލިގިނލި ރިސޯޓުން 68000 ޑޮލަރު (1.04 މިލިއަން ރުފިޔާ) އަށް ހިޔާނާތްތެރިވި ކަމުގެ ތުހުމަތުގައި މުވައްޒަފަކު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް މިއަދު ސަން އަށް ވިދާޅުވީ ގިނަ އަދަދެއްގެ ފައިސާ އަށް ހިޔާނާތްތެރިވި ކަމުގެ ތުހުމަތުގައި ޝަންގުރިއްލާގެ މުވައްޒަފެއް ކަމަށްވާ 25 އަހަރުގެ ދިވެހި ފިރިހެނަކު މިދިޔަ ބުރާސްފަތި ދުވަހު ހައްޔަރުކޮށްފައިވާ ކަމަށެވެ.
"އެއީ ބުރާސްފަތި ދުވަހު ހުށަހެޅުނު މައްސަލައެއް. އެދުވަހު ވާނީ ކޯޓް އަމުރެއްގެ ދަށުން މީހަކު ހައްޔަރުކޮށްފައި. އޭނާގެ ބަންދަށް ވަނީ ފަސް ދުވަސް އިތުރުކުރެވިފައި،" މީޑިއާ އޮފިޝަލް ވިދާޅުވި އެވެ.
ސަންއަށް އެނގިފައިވާ ގޮތުގައި ހިޔާނާތުގެ ތުހުމަތުގައި ހައްޔަރުކޮށްފައި ވަނީ ފައިނޭންސް ދާއިރާގައި މަސައްކަތްކުރާ މުވައްޒަފެކެވެ.
ރިސޯޓުގެ ގިނަ އަދަދެއްގެ ފައިސާ އަށް ހިޔާނާތްތެރިވި މައްސަލަ ފުލުހުން މިހާރު ދަނީ ތަހުގީގު ކުރަމުން ކަމަށް މީޑިއާ އޮފިޝަލް ވިދާޅުވި އެވެ.