މަގުބޫލު އެމެރިކަން ކޮމެޑީ-ޑްރާމާ "ދަ ބެއަ" ސީރީޒުން މަޝްހޫރުވި 'އިޓަލީއަން ބީފް' ސޭންޑްވިޗަކީ އެމެރިކާގެ އިލިނޯއީ ސްޓޭޓްގެ ރަސްމީ ސޭންޑްވިޗް ކަމުގައި ހަމަޖައްސައިފިއެވެ.
މި ސޭންޑްވިޗަކީ އެމެރިކާގެ މަޝްހޫރު އެކްޓަރު ޖެރެމީ އެލަން ވައިޓް ކުޅޭ ޝެފް ކާމީ ބަޒާޓޯގެ ރޯލު ކުޅެފައިވާ "ދަ ބެއަ" ސީރީޒްގެ އެންމެ މުހިންމު އެއްބައެވެ. އެމީ އެވޯޑް ކާމިޔާބުކޮށްފައިވާ މި ސީރީޒްގެ ސަބަބުން މުޅި ދުނިޔެއަށް މަޝްހޫރުވި 'އިޓަލީއަން ބީފް' ސޭންޑްވިޗް، މިހާރު ވަނީ އެމެރިކާގެ އިލިނޯއީ ސްޓޭޓްގެ ރަސްމީ ސޭންޑްވިޗްގެ ގޮތުގައި ރަސްމީކޮށް ބަލައިގެންފައެވެ.
ފިލްމީ ޚަބަރުތައް ގެނެސްދޭ 'ވެރައިޓީ' މަޖައްލާއިން ރިޕޯޓްކޮށްފައިވާ ގޮތުގައި، މި ކަމާ ގުޅޭ ގަރާރު މިދިޔަ ބުދަ ދުވަހު ސްޕްރިންގްފީލްޑްގައި ފާސްކޮށްފައިވަނީ މި ސީރީޒްގައި ގޭރީ 'ސްވީޕްސް' ވުޑްސްގެ ރޯލު ކުޅޭ ކޯރީ ހެންޑްރިކްސްގެ ހާޒިރުގައެވެ.
ޖެރެމީ އެލެން "ދަ ބެއަ"ގެ މަންޒަރެއްގައި--ފޮޓޯ/ޓެލެގްރާފްއިންޑިއާ
އެ ގަރާރުގައި ބަޔާންކޮށްފައިވާ ގޮތުގައި، "ދަ ބެއަ" ސީރީޒްގެ ސަބަބުން އެމެރިކާގެ މިޑްވެސްޓް ސަރަހައްދުގެ މުއްސަނދި ކާނާގެ ސަގާފަތާއި، އިލިނޯއީގެ ކާބޯތަކެތީގެ ތަފާތު ބާވަތްތަކަށް ބައިނަލްއަގުވާމީ ސަމާލުކަން ވަނީ ލިބިފައެވެ. އަދި، މި ސީރީޒަކީ ޝިކާގޯގެ ކާނާގެ ސަގާފަތާއި، އެ ސިޓީގެ މަސައްކަތްތެރި އާއިލާތަކުގެ އަސްލު ދިރިއުޅުމާއި، އިލިނޯއީގެ ރައްޔިތުންގެ ހިތްވަރުގަދަކަމާއި އުފެއްދުންތެރިކަން ވަރަށް ފުރިހަމައަށް ދައްކުވައިދޭ ސިލްސިލާއެއްކަން ވެސް އެ ގަރާރުގައި ފާހަގަކޮށްފައިވެއެވެ.
މި ސޭންޑްވިޗްގެ ތާރީޚަށް ބަލާއިރު، މީގެ އަސްލު ގުޅިފައިވަނީ 20 ވަނަ ގަރުނުގެ ކުރީކޮޅު ޝިކާގޯގައި ދިރިއުޅުނު އިޓަލީގެ މަސައްކަތްތެރި އާއިލާތަކާއެވެ. މިއަދު މި ސޭންޑްވިޗް ބެލެވެނީ އިލިނޯއީގެ ސަގާފަތް ދުނިޔެއަށް ދައްކައިދޭ މުހިންމު ރަމްޒެއްގެ ގޮތުގައެވެ.
ކްރިސްޓޮފަ ސްޓޯރަ އުފައްދާފައިވާ "ދަ ބެއަ" ސީރީޒްގައި ދައްކުވައިދެނީ މޮޅު ޝެފެއް ކަމަށްވާ ކާމީ ބަޒާޓޯ، އޭނާގެ މަރުވި ބޭބެގެ ސޭންޑްވިޗް ފިހާރަ ހިންގުމާ ހަވާލުވެ، އެތަން ފެންވަރު ރަނގަޅު ރެސްޓޯރަންޓަކަށް ބަދަލުކުރުމަށް ކުރާ ހިތްވަރުގަދަ މަސައްކަތެވެ. ދެހާސްބާވީސް ވަނަ އަހަރު ފެށި މި ސީރީޒަށް މިހާރު ވަނީ ދުނިޔޭގެ އެކި ކަންކޮޅުތަކުން ބޮޑު ތަރުހީބެއް ލިބިފައެވެ. މި ސީރީޒްގެ މުހިންމު ތަރިންގެ ތެރޭގައި އަޔޯ އެޑެބީރީ، އެބޮން މޮސް-ބެކްރަކް، އެބީ އެލިއަޓް އަދި ލައޮނަލް ބޯއިސް ހިމެނެއެވެ.
ފަސް ސީޒަނަށް ދެމޭ މި ސިލްސިލާގެ އެންމެ ފަހު ސީޒަން، މި އަންނަ މަހުގެ 25 ވަނަ ދުވަހު އެފްއެކްސް އަދި ހުލޫ މެދުވެރިކޮށް ދައްކަން ފަށާނެއެވެ. އިންޑިއާގައި މި ސީރީޒް ބަލާލެވޭނީ ޖިއޯހޮޓްސްޓާ މެދުވެރިކޮށެވެ.