އިންޑިއާގެ ލެޖެންޑަރީ ލަވަކިޔުންތެރިޔާ މުހައްމަދު ރަފީއުގެ ހަޔާތުގެ މައްޗަށް ބިނާކޮށް ފިލްމެއް އުފައްދަން ނިންމާފައިވާ ކަމަށް ރަފީއުގެ އާއިލާއިން ބުނެފިއެވެ.
އިންޑިއާގެ ގޯއާގައި ކުރިއަށްދިޔަ މި އަހަރުގެ އިންޑިއާ އިންޓަނޭޝަނަލް ފިލްމު ފެސްޓިވަލްގައި ވާހަކަދައްކަމުން ކުރީގެ ލަވަކިޔުންތެރިޔާ މުހައްމަދު ރަފީއުގެ ދަރިފުޅު ޝާހިދު ރަފީއު ބުނީ، ބައްޕަ ރަފީއުގެ ބަޔޮޕިކެއް އުފައްދަން ގަސްތުކޮށްފައިވާ ކަމަށެވެ.
އެކަން ރަސްމީކޮށް އިއުލާނުކުރަން އާއިލާއިން ނިންމާފައިވަނީ ރަފީއުގެ އުފަންދުވަސް ކަމަށްވާ ޑިސެމްބަރު މަހުގެ 24 ވަނަ ދުވަހު ކަމަށް ޝާހިދު ރަފީއު ވަނީ ބުނެފައެވެ.
ޝާހިދު ރަފީއު ބުނިގޮތުގައި މި ބައޮޕިކްއާ ގުޅޭގޮތުން ޑައިރެކްޓަރު އުމޭޝް ޝުކްލާއާ އެކު މަޝްވަރާތައް ދަނީ ކުރިއަށެވެ. މި ބަޔޮޕިކް ހާއްސަކުރާނީ ރަފީއު ސަހާބްގެ ހަޔާތުގެ ވާހަކަ ކިޔައިދިނުމަށް ކަމަށާއި ރަފީއުގެ ލަވަތަކުގެ ތެރެއިން އެންމެ ބޮޑޫ މަޝްހޫރުކަމެއް ހޯދި ލަވަތައް ވެސް ބެލުންތެރިންނަށް ގެނެސްދޭން ނިންމާފައިވާ ކަމަށް ޝާހިދު ވަނީ ބުނެފައެވެ.
މުހައްމަދު ރަފީއުގެ ދަރިފުޅު ޝާހިދު ރަފީއު އާއިލާއާ އެކު--ފޮޓޯ/ފޭސްބުކް
އިންޑިއާގެ ރަންޢަދުގެ ވެރިޔާ މުހައްމަދު ރަފީއު ވަނީ 25،000އަށް ވުރެ ގިނަ ލަވަތައް މިއުޒިކް ކެރިއަރުގައި ރިކޯޑުކޮށްފައެވެ. ގާތްގަނޑަކަށް 40 އަހަރުވަންދެން މިއުޒިކީ ދާއިރާގައި މެދުނުކެނޑި މަސައްކަތްކުރި ކުރީގެ ލަވަކިޔުންތެރިޔާ ވަނީ 1،000އަށް ވުރެ ގިނަ ފިލްމުތަކަށް ލަވަ ރިކޯޑުކޮށްދީފައެވެ. ނަވާރަސަތޭކަ ފަސްދޮޅަހުގެ އަހަރުތަކުގެ ފިލްމުތަކުން ރަފީއުގެ ލަވައެއް ހިމެނިފައިނުވާ ފިލްމެއް ވަރަށް މަދުވާނެއެވެ.
މި ބަޔޮޕިކުން ބެލުންތެރިންނަށް ނޭނގޭ ރަފީއުގެ ހަޔާތާ ގުޅުންހުރި ގިނަ ފިލްމުތަކެއް ފެނުމަކީ ވަރަށް ގިނަ ބަޔަކަށް ލިބޭނެ ހިތްހަމެޖެހުމެއް ކަމަށާއި މިއީ ރަފީއަށް ދެވޭ ވަރަށް ޚާއްސަ ޓްރިބިއުޓަކަށް ވާނެ ކަމަށް ދަރިފުޅު ޝާހިދު ރަފީއު ވަނީ ބުނެފައެވެ.