ބޮލީވުޑްގެ އެކްޓަރު ކާތިކް އާރިއަންގެ ކުރިއަށް އޮތް ފިލްމު "ޕަތީ ޕަތުނީ އޯރް ވޯ 2"އިން ބަތަލާ ރަވީނާ ޓަންޑަން ފެނުމުގެ ފުރުސަތު ފަހިވެފައިވާ ކަމަށް ރިޕޯޓުތައް ބުނެފިއެވެ.
ފިލްމީ ޚަބަރުތައް ގެނެސްދޭ ބޮލީވުޑްހަންގާމާގައި ބުނެފައިވާ ގޮތުން މި ފިލްމުގެ ޑައިރެކްޓަރު މުދައްސަރު އަޒީޒް އަންނަނީ ރަވީނާ ފިލްމުގައި ހިމެނުމުގެ މަޝްވަރާތައް ކުރަމުން ކަމަށާއި ވަރަށް އަވަހަށް އެކަން ރަސްމީކޮށް އިއުލާނު ކުރުމަށް ވަނީ ހަމަޖެހިފައެވެ.
ފިލްމުގައި ރަވީނާއަށް ހުށަހެޅުނު ރޯލަކީ ވަރަށް ޝައުގުވެރި ރޯލެއް ކަމަށާއި އޭގެ ސާފު މަންޒަރު އަންނަ އަހަރުގެ ޖަނަވަރީ މަހު ބެލުންތެރިންނަށް ފެންނާނެ ކަމަށް ވެސް ރިޕޯޓުތައް ބުނެއެވެ.
މި ފިލްމުގެ ސްކްރިޕްޓް ވެސް މިހާރު ނިމިފައިވާއިރު ވަރަށް އަވަހަށް ފިލްމުގެ ފުރަތަމަ ޝެޑިއުލް ފެށުމުގެ މަސައްކަތް އަންނަނީ ކުރަމުންނެވެ.
ކާތިކްގެ ފިލްމު "ޕަތީ ޕަތުނީ އޯރް ވޯ"ގެ ޕޯސްޓަރެއް--ފޮޓޯ/ފިލްމުފެއަ
މުދައްސަރު އަޒީޒުގެ މި ފިލްމަކީ 1978 ވަނަ އަހަރު ހަމަ އެ ނަމުގައި ރިލީޒްކުރި ފިލްމުގެ ރިމޭކްގެ ދެވަނަ ބައެވެ. ފިލްމު "ޕަތީ ޕަތުނީ އޯރް ވޯ"ގައި ކާތިކާ އެކު ބަތަލާގެ ރޯލްއިން ފެނުނީ އަނަނިޔާ ޕާންޑޭ އަދި ބޫމީ ޕެޑްނެކާރުއެވެ. މި ފިލްމުގެ ދެވަނަ ބައިން ބަތަލާ ރަވީނާގެ އިތުރުން ބޫމީ ފެންނާނެކަން ކަށަވަރުވެފައި ވާއިރު ބަތަލާ އަނަނިޔާ ފެންނާނެކަން ކަށަވަރުވެފައެއް ނުވެއެވެ.
ކަންނާޑާ ފިލްމު "ކޭޖީއެފް"ގެ ދެވަނަ ފިލްމުގައި ބަތަލާ ރަވީނާގެ ފެނިލުމަށް އާއްމުންގެ ބޮޑު ތަރުހީބެއް ލިބިފައިވާއިރު މި އަހަރު ރަވީނާ ދެ ފިލްމަކުން ފެނުނެވެ. ބަތަލާ ދެން އެންމެ އަވަހަށް ބެލުންތެރިންނަށް ފެންނާނީ މިހާރު މަސައްކަތް ފަށާފައިވާ ޕްރޮޑިއުސަރު ފީރޯޒު ނަދިއަދުވާލާގެ ފިލްމު "ވެލްކަމް ޓު ދަ ޖަންގަލް"އިންނެވެ.