ޖަރުމަނު ބުންޑެސްލީގާގައި ތާވަލްގެ އެއްވަނައިގާ އުޅޭ ބަޔާން މިޔުނިކްއިން އައުގްސްބާގް ބަލިކޮށް ލީޑު ފުޅާކޮށްފިއެވެ.
ބަޔާންގެ ދަނޑު އަލިއާންޒް އެރީނާގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ ތިން ލަނޑު, ސުން ލަނޑުންނެވެ. ބަޔާންއިން މުޅި މެޗު ކޮންޓްރޯލްކޮށް ގިނަ ހަމަލާތަކެއް އުފެއްދި މި މެޗުގައި އެ ޓީމުގެ ތަރިއަކަށް ވެގެންދިޔައި އެ ޓީމަށް ކުޅޭ އިންގްލަންޑްގެ ކެޕްޓަން އަދި ނުރައްކާތެރި ފޯވާޑް ހެރީ ކޭންއެވެ.
މި މެޗުގައި ބަޔާންއިން ކާމިޔާބުކުރި ތިން ލަނޑުވެސް އެ ޓީމަށް ކާމިޔާބު ކޮށްދީ ކޭން ވަނީ ހެޓްރިކެއް ހަދާފައެވެ. މިތިން ލަނޑާއެކު ކޭން ވަނީ ބުންޑެސްލީގާގައި އެންމެ އަވަހަށް 50 ލަނޑު ހެދި ކުޅުންތެރިޔާގެ ރިކޯޑްވެސް ގާއިމްކޮށްފައެވެ. އޭނާ 50 ލަނޑު ކާމިޔާބު ކޮށްފައިވަނީ 43 މެޗުންނެވެ. ކުރިން މިރިކޯޑް އޮންނަނީ ކުރިން ބޮރޫޝިއާ ޑޯޓްމުންޑަށް ކުޅުނު ނޯވޭގެ ފޯވަޑް އާލިން ހާލަންޑް އަތުގައެވެ. އެއީ 50 ލަނޑު 50 މެޗުން ކާމިޔާބު ކޮށްގެންނެވެ.
މި މެޗު ބަޔާންއިން ތިން ލަނޑު ކާމިޔާބު ކުރި ނަމަވެސް މިމެޗުގެ ފުރަތަމަ ހާފު އެ ޓީމަށް އެހާ ފަސޭހަ ހާފަކަށް ނުވިއެވެ. އައުގްސްބާގްއިން ވަނީ ފުރަތަމަ ހާފުގައި ވަރަށް ރަނގަޅަށް ޑިފެންޑް ކޮށް ބަޔާންއަށް ލަނޑެއް ޖެހުނަ ނުދީ ހިފަހައްޓާލާފައެވެ. މި މެޗުގައި ބަޔާންއިން ކާމިޔާބު ކުރި ފުރަތަމަ ލަނޑު ކޭން ކާމިޔާބުކޮށްފައިވަނީ މެޗުގެ 63 ވަނަ މިނެޓުގައި ލިބުނު ޕެނަލްޓީ އަކުންނެވެ. އަދި ފަހު ދެ ލަނޑު ކާމިޔާބު ކުރެވިފައިވަނީ މި މެޗުގެ އިތުރު ވަގުތުއެވެ. މި ގޮތުން ދެވަނަ ލަނޑު ކާމިޔާބުކޮށްފައިވަނީ އިތުރު ވަގުތުގެ ތިން ވަނަ މިނެޓުގައި ލިބުނު ޕެނަލްޓީ އަކުންނެވެ. މި ޕެނަލްޓީ ލިބިގެންދިޔަ ފައުލް ކުރި އައުގްސްބާގްގެ ކެވެން ޝުލޮޓާބެކްއަށް ވަނީ ދެވަނަ ރީނދޫ ކާޑާއެކު ރަތް ކާޑު ދައްކާފައެވެ.
މިމެޗުގައި ކޭން އޭނާގެ ހެޓްރިކް ފުރިހަމަ ކޮށްފައިވަނީ އިތުރު ވަގުތުގެ ފަސްވަނަ މިނެޓުގައި ކާމިޔާބު ކުރި ލަނޑާއެކުއެވެ.
މެޗަށްފަހު ވާހަކަ ދައްކަމުން ކޭން ހާމަކުރިގޮތުގައި މި މެޗު ފަސޭހަ ނުވާނެކަން ކުރިންވެސް އިހްސާސް ކުރެވުނު ކަމަށެވެ. އެހެންކަމުން މި މެޗުގައި ޖެހުނީ ކެތްތެރިކަމާއެކު ފުރުސަތެއް ލިބޭތޯ އިންތިޒާރު ކުރާށެވެ. ކޭން މިހާރު ވަނީ މި ސީޒަންގައި މިހާތަނަށް ކުޅުނު 11 މެޗުގައި 14 ލަނޑު ކާމިޔާބު ކޮށްފައެވެ. އަދި މިސީޒަންގައި އޭނާ ބަޔާންއަށް ކާމިޔާބު ކޮށްދީފައިވާ ލަނޑުގެ އަދަދު އުޅެނީ 20 ގައެވެ.
މި ކާމިޔާބީއާއެކު ބަޔާންއިން މިހާރުވަނީ 11 މެޗުން ލިބިފައިވާ 29 ޕޮއިންޓާއެކު ތާވަލްގެ އެއްވަނައިގައި އަށް ޕޮއިންޓްގެ ލީޑެއް ނަގައިފައެވެ. އަދި އައުގްސްބާގް އުޅެނީ 12 ޕޮއިންޓާއެކު ތާވަލްގެ 13 ވަނައިގައެވެ.