ވޮޝިންޓަން (9 އޮކްޓޯބަރު 2024) : އީރާނަށް ހަމަލާ ދިނުމާބެހޭގޮތުން އެމެރިކާގެ ރައީސް ޖޯ ބައިޑެން އާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މިއަދު ފޯނުން މަޝްވަރާ ކުރައްވާނެކަމަށް އެމެރިކާގެ އޮންލައިން ނޫހެއްކަމަށްވާ "އެކްސިއޮސް" އިން ބުނެފިއެވެ.
އެ ނޫސް ބުނިގޮތުގައި އީރާނަށް ހަމަލާދީފިނަމަ އެކަމުގެ ރައްދު ވަރަށް ހަރުކަށި ގޮތަކަށް އީރާނުން އިސްރާއީލަށް ދޭނެކަމަށް ބައިޑެން އާއި ނަތަންޔާހޫއަށް ވެސް ގަބޫލުކުރެވޭތީއާއި އީރާނުގެ ތެލުގެ މަރުކަޒުތަކަށް ހަމަލާދީ އެތަންތަން ހަލާކުކޮށްލައިފިނަމަ ދުނިޔޭގެ ބާޒާރުގައި ތެލުގެ އަގު މައްޗަށްގޮސް އެކަމުގެ ފައިދާ ރަޝިއާ ނަގާފާނެތީ އެމެރިކާ ވަރަށް ކަންބޮޑުވެއެވެ.
އެމެރިކާގެ ރައީސް ބައިޑެން ވަނީ އީރާނުގެ ތެލާއި ގޭހުގެ މަރުކަޒުތަކަށާއި ނިއުކްލިޔާ މަރުކަޒުތަކަށް ހަމަލާ ދިނުމަށް އެމެރިކާ ތާއީދު ނުކުރާކަމަށް ވިދާޅުވެފައެވެ.
"އެކްސިއޮސް" ބުނާގޮތުން އީރާނަށް ހަމަލާދިނުމުގެ މައްސަލާގައި ކުރިން އިސްރާއީލު ގެންގުޅުނު ހަރުކަށި ވިސްނުމަށް މިހާރު ބަދަލުތަކެއް އައިސްފައިވާކަން ވަނީ ފާހަގަ ކުރެވިއެވެ.
އީރާން އިސްރާއީލަށް ހަމަލާ ދިން ދުވަހުގެ ރޭގައި އިސްރާއީލުގެ އަސްކަރީ ތަރުޖަމާނު ޑެނިއަލް ހަގާރީ ވަނީ އެ ރޭ އިސްރާއީލުން އީރާނަށް ހަރުކަށި ރައްދު ހަމަލާދޭނެކަމަށް ބުނެ ހަރުކަށި ބަޔާނެއް ދީފައެވެ. އަދި ހަމަލާދޭނެ ތަންތަނުގެ ތެރޭގައި އީރާނުގެ ތެލުގެ މަރުކަޒުތަކާއި ނިއުކްލިޔާ މަރުކަޒުތަކާ އަދި އަސްކަރީ މަރުކަޒުތައް ހިމެނޭނެކަމަށް ވެސް ހަގާރީ ބުނެފައިވެއެވެ.
ނަމަވެސް އީރާނުގެ ހަމަލާތަކަށް ހަފްތާއެއް ވީއިރުވެސް އިސްރާއީލުގެ މަސްއޫލުވެރިން ދައްކަމުން ގެންދަނީ އީރާނަށް ރައްދު ހަމަލާތައް ދޭނެވާހަކައެވެ. ހަމަލާދީފައެއް ނުވެއެވެ.
އިސްރާއީލުގެ "ވާލާ" ވެބްސައިޓް ބުނާގޮތުން އީރާނުގެ ހަމަލާތަކަށް ހަފްތާއަކަށްވުރެ ގިނަ ދުވަސް ވީއިރުވެސް އީރާނަށް ހަމަލާދޭނެ ގޮތަކާ ހަމަލާތައް އަމާޒުކުރާނެ ތަންތަނާ ބެހޭގޮތުން އިސްރާއީލަށް އަދިވެސް ގޮތެއް ނިންމިފައެއް ނުވެއެވެ. އިސްރާއީލުގެ ސިޔާސީ އިސްވެރިންނާއި އަސްކަރީ ވެރިންނަށް މިކަމުގެ ފައިނަލް ޕްލޭނަށް އަދިވެސް އެއްބަސްވެވިފައެއް ނުވެއެވެ.
މީގެ ސަބަބުތަކުގެ ތެރޭގައި އީރާނަށް ހަމަލާދިނުމަށްފަހު އީރާނުން އިސްރާއީލަށް ދޭނެކަމަށް ބެލެވޭ ވަރުގަދަ ރައްދުގެ ސަބަބުން އިސްރާއީލުގެ ހައްސާސް މަރުކަޒުތަކަށް ލިބިދާނެ ގެއްލުންތައް ބޮޑުވާނެކަމަށް ބެލެވުމާ އަދި އެމެރިކާގެ ސީދާ ބައިވެރިވުމެއްނެތި އިސްރާއީލުން އީރާނަށް ދޭ ހަމާލާތަކުން އީރާނުގެ ނިއުކްލިޔާ މަރުކަޒުތަކަށް މާބޮޑު ގެއްލުމެއް ނުދެވިނެކަމުގެ ކަންބޮޑުވުން އޮތުން ހިމެނޭކަމަށް "ވާލާ" ބުނެއެވެ.
އީރާނަކީ ބިމުގެ ގޮތުން ބިޔަ ގައުމަކަށްވެފައި އީރާނުގެ ނިއުކްލިޔާ މަރުކަޒުތައް ހުންނަނީ އެތަން އަނެއްތަނާ ވަރަށް ދުރުގައި ކަމަށް ވުމާ އަދި ނިއުކްލިޔާ މަރުކަޒުތަކުގެ މުހިއްމު ބައިތައް ފަރުބަދަތަކުގެ އަޑީގައި ހުރުންކަމަށްވާތީއެވެ.
ވައިޓް ހައުސްގެ މަސްއޫލުވެރިއަކާ ހަވާލާދީ "އެކްސިއޮސް" ބުނާގޮތުން އެމެރިކާ އިސްރާއީލަށް އަންގާފައިވަނީ އީރާނުން އިސްރާއީލަށް ދިން ހަމަލާތަކުގައި އިސްރާއީލަށް ލިބުނު ގެއްލުންތަކާ އެއްވަރުގެ ތިލަފަތްހަމަ ހަމަލާތަކެއް އީރާނަށް ދިނުމަށެވެ. އެއާ ނުބައްދަލު އާދަޔާ ޚިލާފަށް ގެއްލުން ބޮޑު ހަމަލާތަކެއް އީރާނަށް ނުދިނުމަށެވެ.
އެއީ ސަރަހައްދީ ހަނގުރާމައަކަށް މަގު ފަހިނުވާނެގޮތަކަށް އަމަލުކުރުމަށް އެމެރިކާ ބޭނުންވާތީއާއި އީރާނުން އިސްރާއީލަށް ހަމަލާދިންއިރުވެސް އިސްރާއީލުގެ މަދަނީ ތަންތަނަށާއި ނިއުކްލިޔާ މަރުކަޒުތަކަށް ހަމަލާދީފައިނުވާތީއެވެ. އަދި އީރާނުން މައިގަނޑުގޮތެއްގައި ހަމަލާދީފައިވަނީ އިސްރާއީލުގެ އަސްކަރީ ބޭސްތަކަށް ކަމަށްވާތީއެވެ.
އިސްރާއީލުން ވަނީ އީރާނުގެ ރޮވޮލިއުޝަރަނީ ގާޑުންގެ މަރުކަޒުތަކަށާއި އީރާނުގެ ދީނީ މުރުޝިދު އާޔަތުﷲ އަލީ ޚަމަނާއިގެ އޮފީސް އެކުވެންޏަށްވެސް ހަމަލާދޭނެކަމަށް ބުނެފައެވެ.
އިސްރާއީލުގެ "ވާލާ" ނިއުސް ބުނާގޮތުން އިސްރާއީލުގެ ޙަމަލާތަކުގައި އީރާނަށް ބޮޑެތި ގެއްލުންތަކެއް ލިބިއްޖެނަމަ އެކަމުގެ ރައްދު އިސްރާއީލަށް ދިނުމުގެ އިތުރުން އީރާނުގެ ނިއުކްލިޔާ ޑޮކްޓްރިން ބަދަލުކުރުން ފަދަ ކަމެއް އީރާނުން ކުރުމަކީ އެކަށީގެންވާ ކަމެކެވެ.
އިސްރާއީލުގެ ހަމަލާތަކަށްފަހު ނިއުކްލިޔާ ހަތިޔާރު އުފައްދަން ނިންމިކަން ނުވަތަ މިހާރުވެސް ނިއުކްލިޔާ ހަތިޔާރު އުފައްދާފައި ހުރިކަން އީރާން އިއުލާނުކޮށްފިނަމަ އެއީ އިސްރާއީލުގެ އިތުރުން އެމެރިކާގެވެސް ވަރަށް ބޮޑު ބޮލުގަ ރިހުމަކަށް ވެގެންދާނެ ކަމެކެވެ.
އީރާނަކީ ރަޝިއާ އެކޭ އެއްގޮތަށް އެމެރިކާއިން އިންތިހާއަށް ދަތިކުރުމުގެ ފިޔަވަޅުތައް އަޅާފައިވާ ގައުމަކަށްވާތީ މިފަދަ ހާލަތެއްގައި ދެން އެމެރިކާއަށް އިތުރަށް އެޅޭނެ މާބޮޑު ފިޔަވަޅުތަކެއް ނޯންނާނެތީއެވެ. އަނެއްކޮޅުން އީރާނުގައި ނިއުކްލިޔާ ހަތިޔާރު ހުރިކަން އިއުލާންކޮށްފިނަމަ ދެން އެގައުމާ ކުޅޭކަށް އެމެރިކާއަށްވެސް އަދި އިސްރާއީލަށްވެސް ނުކުރޭނެތީއެވެ. އީރާނުގެ މިފަދަ ނިންމުމެއް ނިންމުމަކީ އެދެގައުމަށްވެސް ވަރަށް ލަދުވެތި ކަމަކަށް ވެގެންދާނެކަމެކެވެ.