ޓެލްއަވީވު (3 އޮކްޓޯބަރު 2024) : އިސްރާއީލުގެ ވެރިރަށް ޓެލްއަވީވް އާއި އިތުރު ދެ ސިޓީ ކަމަށްވާ ހެޒްލިޔާ އަދި ބިތާހްތިކްވާގެ އެތައް ތަނެއްގައި ރޭ ދަންވަރު ބާރުގަދަ ގޮވުންތަކެއް ގޮވައި އަލިފާން ރޯވެފައިވާ ކަމަށް ޔަހޫދީ މީޑިއާއިން ހާމަކޮށްފިއެވެ.
އިސްރާއީލުގެ ނޫހެއްކަމަށްވާ "ޔަދިއޮތް އަހަރަނޮތް" ބުނާގޮތުން އެތިން ސިޓީން ރޭ ދަންވަރު ބާރުގަދަ ގޮވުންތަކެއްގެ އަޑުތައް އިވުމާއެކު އެތައް ތަނެއްގައި އަލިފާން ރޯވެފައިވާ މަންޒަރު ވަނީ ފެނިފައެވެ. މިއާއެކު އާންމުން ވަނީ ބިރުގެންފައެވެ. ބައެއް މީހުން ވަނީ ވާނުވާ ނޭންގޭތީ ބިންގަރާސްތަކަށް ވަދެފައެވެ.
މިއާއެކު މި ސިޓީތަކުގެ ޖައްވު ވަނީ ސައިރަންގެ އަޑުތަކުން ގުގުމާލާފައެވެ. ވެގެން އުޅޭގޮތެއް އާންމުންނަށް ނޭންގޭއިރު އިސްރާއީލުގެ އަސްކަރިއްޔާއިން ވަނީ ގޮވާތަކެއްޗާއެކު ވެއްޓިގަނެގެން ހަމަލާދޭ ޑްރޯންތަކަކާއި މި ސައިލްތަކެއް މި ސިޓީތަކަށް ރޭ ދަންވަރު އަމާޒުވިކަން ހާމަކޮށްފައެވެ. މިތަކެތި އައިކަމަށް ވަނީ ޔަމަނުންނާއި ލުބްނާނުންނެވެ.
އިސްރާއީލުގެ އަސްކަރިއްޔާ ބުނާގޮތުން އިސްރާއީލުގެ ވައިގެ ދިފާއީ ނިޒާމުން ޑްރޯންތަކާއި މިސައިލްތަކަށް ހުރަސްއެޅިއެވެ. ނަމަވެސް އެތަކެތީގެ ފުނޑުފުނޑުވެފައިވާ ބައިތައް ޓެލްއަވީވް އާއި އެނޫން ތަންތަނަށް ވެއްޓި ތަންތަނުގައި އަލިފާން ރޯވީއެވެ. ރައްޔިތުންނަށް އެއްވެސް ނުރައްކަލެއްނެތްކަމަށް އިސްރާއީލުގެ އަސްކަރިއްޔާގެ ތަރުޖަމާނު ޑެނިއަލް ހަގާރީ ބުންޏެވެ.
އީރާނުން އިސްރާއީލަށް ފޮނުވާލި މިސައިލެއް ގެ ވެއްޓިފައިވާ ބައިތައް އަނދަނީ
އިސްރާއީލު ގެންދަނީ ހޫޘީންނާއި ހިޒްބު އަދި ހަމާސްފަދަ މުޖާހިދުންގެ ޖަމާއަތްތަކާ އަދި އެ ޖަމާއަތްތަކުގެ ފަހަތުގައި އޮންނަ އީރާނުން އެ ގައުމަށް ދޭ ހަމަލާތަކުގެ މައުލޫމާތު ވަރަށް ބޮޑަށް ސިއްރު ކުރަމުންނެވެ. އަދި ލިބޭ ގެއްލުންތައް ފޮރުވައި ހުރިހާ ހަމަލާތަކެއް މައިތިރިކުރާކަމުގެ ޕްރޮޕަގެންޑާތައް ފަތުރަމުންނެވެ.
މިދިޔަ އަންގާރަ ދުވަހުގެ ރޭ އީރާނުން އިސްރާއީލަށް ދިން ވަރުގަދަ މިސައިލް ހަމަލާތައްވެސް ހުއްޓުވިކަމަށް އިސްރާއީލު ބުނެފައިވާއިރު އެ ހަމަލާތަކުން މާއްދީ ބޮޑެތި ގެއްލުން ތަކެއް އިސްރާއީލަށް ލިބުނުކަން މިހާރު ވަނީ ކަށަވަރު ވެފައެވެ.
މީގެތެރޭގައި 40 އަށްވުރެ ގިނަ އިމާރާތް ހަލާކުވުމާއި އިތުރު 60 ވަރަކަށް އިމާރާތަށް އެކިވަރުގެ ގެއްލުންތައް ލިބުމާއި އިސްރާއީލު ސިފައިންގެ އެތައް ބަޔަކު ޒަޚަމްވުން ހިމެނެއެވެ. އަދި އިސްރާއީލުގެ އެންމެ ބޮޑު ވައިގެ ދެބޭސް އަށް ބޮޑެތި ގެއްލުންތަކެއް ލިބުނުކަމަށް މުސްތަގިއްލު ރިޕޯޓްތަކުން ވަނީ ހާމަވެފައެވެ. އަދި އިސްރާއީލުގެ ޖާސޫސީ އިދާރާ މޮސާޑުގެ މަރުކަޒަކަށް ވެސް ގެއްލުން ލިބުނު ކަމަށް ވެއެވެ.
އަސްކަރީ ގިނަ މުހައްލިލުން ވިދާޅުވެފައިވާ ގޮތުގައި އީރާނުން އިސްރާއީލަށް ފޮނުވާލި މިސައިލް ތަކުން އެހާ ބޮޑު ގެއްލުންތަކެއް އިސްރާއީލަށް ނުލިބުނީ އެ މިސައިލްތަކުގައި ހަރުކޮށްފައިވަނީ ތަންކޮޅެއް ގެއްލުން ކުޑަ ވޯހެޑް ތަކެއްކަމަށް ވުމުންނެވެ. އެއީ އިސްރާއީލަށް ބޮޑެތި ގެއްލުންތަކެއް ދީގެން ސަރަހައްދީ ހަނގުރާމައަކަށް މަގުފަހި ނުކުރުމުގެ ގޮތުންނެވެ. އިސްރާއީލަށް ބޮޑު ގެއްލުމެއް ނުލިބޭނަމަ އިސްރާއީލުން އީރާނަށް ދޭ ރައްދުވެސް ކުޑަވާނެ ކަމަށް ބަލައިގެންނެވެ.
ސަރަހައްދީ ހަނގުރާމައަކަށް ދިޔުމަކީ އީރާނަށްވެސް ބޮޑެތި ގެއްލުންތަކެއް ލިބޭނެކަމެއް ކަމުގެ އިހްސާސް އީރާންވެސް ކުރެއެވެ. މިފަދަ ހަނގުރާމައެއް ފަށައިފިނަމަ އީރާނުގެ ނިއުކްލިޔާ އަދި ތެލާއި ގޭހުގެ މަރުކަޒުތަކަށް އިސްރާއީލުގެ އިތުރުން އެމެރިކާވެސް ވަރުގަދަ ހަމާލާ ތަކެއް ދޭނެކަން އީރާނަށް އެނގެއެވެ. އަދި އީރާނުން ވެސް މިފަދަ ހާލަތެއްގައި އިސްރާއީލުގެ ނިއުކްލިޔާ މައި މަރުކަޒު ފުނޑާލާނެކަމަށް ބެލެވެއެވެ. އަދި ގަލްފުގެ ހުރްމުޒް ކަނޑުއޮޅި ބަންދުކޮށް ތެޔޮ ބޭރުކުރުން ހުއްޓުވާނެއެވެ.
ހައިޕާ ސޮނިކް މިސައިލުން އިސްރާއީލަށް ހަމަލާދިނުމުގައި އީރާނުގެ ބޭނުމަކީ އިސްރާއީލާ ދެކޮޅަށް ބަދަލު ހިފުމުގެ ގާބިލްކަން އެ ގައުމަށް ލިބިފައިވާކަން ދެއްކުންކަމަށްވެއެވެ. ލަންޑަންގައި ނުކުންނަ ދަ ގާޑިއަން ނޫހާއި ޓެލެގްރާފް ނޫސް ބުނާގޮތުން އީރާނުން ފޮނުވާލި މިސައިލްތަކުގެ ގާތްގަނޑަކަށް 80 އިންސައްތަ އިސްރާއީލަށް އެރިއެވެ. އިސްރާއީލުގެ ތިން ވައިގެ ދިފާއީ ނިޒާމުވަނީ އީރާނުގެ އަޑަށްވުރެ ނުވަ ގުނަ ބާރަށް ދަތުރުކުރާ މިސައިލްތައް ހުއްޓުވުުމުގައި ވަރަށް ބޮޑަށް ނާކާމިޔާބުވެފައެވެ. އެއީ ހައިޕާ ސޮނިކް މިސައިލުން ހަމަލާދިނުމުންނެވެ.
އިސްރާއީލުގެ ވެރިރަށް ޓެލްއަވީވް އާއި އިތުރު ދެ ސިޓީގައި ރޭ ބާރުގަދަ އެއްޗެހި ތަކެއްގޮވައި އަލިފާންގަނޑުތަކެއް އުފެދިފައިވާއިރު ޔަމަންގެ ހޫޘީން ވަނީ އިސްރާއީލަށް ރޭ ޑްރޯން ހަމަލާތަކެއް ފޮނުވާލިކަމަށް ބުނެފައެވެ. އަދި ހިޒްބުﷲ އިން ވަނީ އިސްރާއީލުގެ ސިޓީތަކަށް 60 އަށް ވުރެ ގިނަ މިސައިލް ފޮނުވާލިކަން ހާމަކޮށްފައެވެ.
ހިޒްބުﷲ އިން އިއްޔެ ވަނީ އެއްގަމު ހަނގުރާމައިގައި އިސްރާއީލުގެ އެލީޓް ކޮމާންޑޯސް ބާރުތަކުގެ ތިން ކޮމާންޑަރުންނާއި ފަސް ސިފައިން މަރާލައި ލުބްނާނުގެ އެތެރެއަށް ވަދެގަތް އިސްރާއީލުގެ ކޮމާންޑޯސްގެ ބާރުތައް ފައްސައި ސަރަހައްދީ ރޮނގުން ބޭރުކޮށްލާފައެވެ.
ފަހަތަށް ޖެހެން ޖެހުނުކަމަށާއި އޮފިސަރުން ހިމެނޭގޮތަށް އަށް ސިފައިން ހިޒްބުﷲ ގެ އަތްދަށުން މަރުވިކަމަށް އިސްރާއީލުގެ އަސްކަރިއްޔާއިން ވަނީ އެއްބަސްވެފައެވެ. އަދި އެއްގަމު ހަނގުރާމައިގެ ގެއްލުން އިންތިހާއަށް ބޮޑުވެފައި ވަރަށް ވޭންދެނިވި ކަމަށް އިސްރާއީލުގެ އަސްކަރީ ވެރިން ވަނީ އެއްބަސްވެފައެވެ.
އަނެއްކޮޅުން ފަލަސްތީނުގެ ޒުވާނަކު އަންގާރަ ދުވަހު ވަނީ އިސްރާއީލުގެ ސިޓީއެއްކަމަށްވާ ހައިފާއަށް ހަތިޔާރާއެކު ވަދެ އިސްރާއީލުގެ އަށް މީހަކު މަރާލުމަށްފަހު ފިލާފައެވެ.