ނަޕޯލީގެ ނައިޖީރިއާ ފޯވަޑް ވިކްޓާ އޮސިމްހެން ބޭނުންވަނީ މެންޗެސްޓާ ޔުނައިޓެޑް ނުވަތަ ރެއާލް މެޑްރިޑާ ގުޅެން ކަމަށް ނަޕޯލީގެ ކުރީގެ މިޑްފީލްޑަރު ސަލްވަޓޯ ބަގްނީ ބުނެފިއެވެ.
ބަގްނީ ދެކޭގޮތުގައި ފްރާންސް ނުވަތަ ޖަރުމަންގެ ކްލަބަކާ ގުޅެން އޮސިމްހެން ބޭނުމެއް ނުވެއެވެ. ލިވަޕޫލާއި ޗެލްސީން ޔޫއެފާ ޗެމްޕިއަންސް ލީގުގައި ވާދަނުކުރާތީ އެ ކްލަބުތަކަށް ދާން އޮސިމްހެން ބޭނުންނުވާ ކަމަށް ވެސް ބަގްނީ ބުންޏެވެ.
"ފްރާންސްގައި ކުރިން ކުޅެފައިވާތީ، އެގައުމުގެ ކްލަބަކަށް އޮސިމްހެން ނުދާނެ. ޗެމްޕިއަންސް ލީގުގައި ވާދަނުކުރާތީ ލިވަޕޫލް ނުވަތަ ޗެލްސީއަކަށް ވެސް ނުދާނެ. އޭނާ ބޭނުންވަނީ މެންޗެސްޓާ ޔުނައިޓެޑް ނުވަތަ ރެއާލް މެޑްރިޑަށް ދާން. އެހެން އެއްވެސް ޓީމަކަށް އޭނާގެ ޝައުގުވެރިކަމެއް ނެތް،" 'ޓުޓޯ ނަޕޯލީ'އަށް ދިން އިންޓަވިއުއެއްގައި ބަގްނީ ބުންޏެވެ.
މިސީޒަނުގައި އޮސިމްހެން، ނަޕޯލީއަށް ދެއްކި މޮޅު ކުޅުމާ ގުޅިގެން ޔޫރަޕުގެ ގިނަ ކްލަބުތަކަކުން ދަނީ އޭނާ ހޯދުމަށް މަސައްކަތްކުރަމުންނެވެ. އޭގެ ތެރޭގައި ސްޓްރައިކަރެއްގެ ބޭނުން ޖެހިފައިވާ ޔުނައިޓެޑާއި ޗެލްސީ އަދި ރެއާލް ވެސް ހިމެނެއެވެ. ނަމަވެސް ރިޕޯޓުތައް ބުނާގޮތުގައި އޭނާ ގުޅޭނީ ޗެމްޕިއަންސް ލީގުގައި ވާދަކުރާ ކްލަބަކާއެވެ.
ޔޫރަޕުގެ ވަރުގަދަ ކްލަބުތަކަކުން އޮސިމްހެން ހޯދުމަށް މަސައްކަތްކުރަމުންދިޔަ ނަމަވެސް، އޭނާ ދޫކޮށްލުމުގެ ވިސްނުން ނުގެންގުޅޭ ކަމަށް ނަޕޯލީން ވަނީ ބުނެފައެވެ. ނަޕޯލީން މަސައްކަތްކުރަނީ އޮސިމްހެންގެ ކޮންޓްރެކްޓް އާކުރުމަށެވެ.