ނާސާއިން ބޭނުންކުރާނެ އާ ސްޕޭސް ސޫޓް ދައްކާލައިފި

ނާސާގެ އާ ސްޕޭސް ސޫޓު--- ފޮޓޯ/ ގެޓީ

ނާސާގެ އާޓިމިސް ޕްރޮގްރާމްގެ ދަށުން ކުރިއަށް އޮތް ހަނދުގެ މިޝަންތަކުގައި އެސްޓްރޮނޯޓުން ލައިގެން އުޅޭނެ އާ ސްޕޭސްސޫޓް ޑިޒައިން ދައްކާލައިފިއެވެ.

އާ އެކްސިއަމް އެކްސްޓްރާވެހިކިއުލާ މޮބިލިޓީ ޔުނިޓް (އެކްސްއީއެމްޔޫ) ސްޕޭސްސޫޓް ފަރުމާ ކޮށްފައިވަނީ ކުރީގެ އެޕޯލޯ ސޫޓްތަކަށް ވުރެ ބޮޑު ފްލެކްސިބިލިޓީއަކާ އެކު ފުޅާ ދާއިރާއެއްގައި ހަރަކާތްތެރިވާ ގޮތަށެވެ. ނާސާއިން ބުނީ މި ސޫޓުތަކުގެ ސަބަބުން އަންހެނުންނާއި ފިރިހެނުންނަށް ވެސް ފޯމް ފިޓިން އަދި އަރާމު ޑިޒައިނެއް ލިބިގެންދާނެ ކަމަށެވެ.

އަދި، މޮބިލިޓީ އިތުރުކޮށް، ހަނދުގައި ދިމާވެދާނެ ނުރައްކާތަކުން ސަލާމަތްވުމަށް މި ސޫޓުގައި އެންމެ ފަހުގެ ޓެކްނޮލޮޖީ ހިމަނާފައިވާ ކަމަށް ވެސް ނާސާއިން ބުނެއެވެ.

މި ސްޕޭސްސޫޓްތައް ދައްކާލާފައިވަނީ ޓެކްސަސްގެ ހުސްޓަންގައި ހުންނަ ޖޯންސަން ސްޕޭސް ސެންޓަރުގައި އެކްސިއަމް ސްޕޭސް އިން އިންތިޒާމްކުރި އިވެންޓެއްގެ ތެރެއިންނެވެ. މި ޑިޒައިން ފުރިހަމަ ކުރުމަށް 228.5 މިލިއަން ޑޮލަރު (189.6 މިލިއަން ޕައުންޑް) ހޭދަވި ކަމަށް ނާސާއިން ބުނެއެވެ.

އެކްސްއީއެމްޔޫ ސްޕޭސްސޫޓުގައި ގިނަ ޕްރޮޓެކްޓިވް ލޭޔާސް އާއި ލައިފް ސަޕޯޓް ސިސްޓަމްސްއާ އެކު ބެކްޕެކާއި ލައިޓްތަކާއި ބަބުލް ޝޭޕް ހެލްމެޓްގެ މަތީގައި ހަރުކޮށްފައިވާ ހައި ޑެފިނިޝަން ވީޑިއޯ ކެމެރާއެއް ވެސް ހިމެނެއެވެ.

ނާސާގެ ކުރީގެ ސްޕޭސްސޫޓްތައް 1981ވަނަ އަހަރުން ފެށިގެން އަލުން ޑިޒައިން ކޮށްފައިނުވާއިރު، އާ ޑިޒައިންގެ މަގުސަދަކީ އެސްޓްރޮނޯޓުންނަށް އަނެއްކާ ވެސް ހަނދުގައި ހިނގާއިރު ކުރިމަތިވާނެ ގޮންޖެހުންތަކާ ކުރިމަތިލުމެވެ. މިހާރުގެ ސޫޓްތަކުން ދިމާވާ އެއް ގޮންޖެހުން ކަމުގައިވާ ސޫޓްގެ ސައިޒްގެ މައްސަލައިން މި އާ ޑިޒައިނާ އެކު އަރައިގަނެވޭނެ ކަމަށް ނާސާއިން އުންމީދުކުރެއެވެ.

ނާސާއިން އުންމީދުކުރާ ގޮތުގައި 2025ވަނަ އަހަރު ހަނދަށް ކުރާ އާޓިމިސް ތިނެއްގެ މިޝަނަށް އަޕްޑޭޓް ކޮށްފައިވާ ސޫޓްތައް ތައްޔާރު ކުރެވޭނެއެވެ.

ނާސާގެ އެޑްމިނިސްޓްރޭޓަރު ބިލް ނެލްސަން ވިދާޅުވީ އެކްސިއަމްއާ އެކު މި ޕާޓްނަޝިޕަކީ އެސްޓްރޮނޯޓުން ހަނދަށް ފޭބުމާއި ޖައްވުގައި އެމެރިކާގެ ލީޑަޝިޕް ކުރިއަށް ގެންދިއުމަށް ވަރަށް މުހިންމު ކަމެއް ކަމަށެވެ. އާ ސްޕޭސްސޫޓުތަކުގެ ސަބަބުން ފުރަތަމަ އަންހެނަކަށް ހަނދުގައި ހިނގާލުމުގެ ފުރުސަތު ލިބިގެންދާނެ ކަމަށާއި ކުރިއަށްވުރެ ގިނަ ބަޔަކަށް ހަނދުގައި ސައިންސް ދިރާސާކޮށް ކުރިއަށް ގެންދިއުމުގެ ފުރުސަތު ހުޅުވިގެންދާނެ ކަމަށް ވިދާޅުވިއެވެ.

މި އާ ޑިޒައިނަކީ ހަނދުގައި ހިނގާ ފުރަތަމަ ފިރިހެނުން ލައިގެން އުޅުނު އައިކޮނިކް، ބަލްކީ ސްޕޭސްސޫޓްތަކުން އެއްކީބާ އެއަށްވުރެ ރަނގަޅު ތަޖްރީބާއެއް ލިއްބައިދިނުން ކަމަށް ވެސް ނާސާއިން ބުނެއެވެ. އެގޮތުން އާ ޑިޒައިނުން އެސްޓްރޮނޯޓުންނަށް މާ އަރާމުވެފައި ފަސޭހަ ކަމުން ގިނަ މޮބިލިޓީއާއި ހިތްގައިމުކަން ލިބިގެންދެއެވެ.

ގުޅޭ ޓެގު
comment ކޮމެންޓް