ވޯލްޑް ކަޕުގެ 16 ވަނަ މެޗުގެ ލައިވް ބްލޮގް: ބްރެޒިލް 2 - 0 ސާބިއާ

90 މިނެޓާއި އިތުރު ވަގުތުގެ ގޮތުގައި ދެއްކި ހަތް މިނެޓުގެ ކުޅުންވެސް ހަމަވެ، މެޗު ނިމިއްޖެ.

ސާބިއާ އިން މެޗު ނިންމާލީ އޮން ޓާގެޓަށް އެންމެ ހަމަލާއެއް ވެސް ފޮނުވާ ނުލައި، ބްރެޒިލް އިން 22 ހަމަލާއެއް އުފައްދާފައި ވާއިރު، އޮން ޓާގެޓަށް އަށް ހަމަލާ ފޮނުވާލާފައިވޭ.

ބްރެޒިލް އިން މެޗު ނިންމާލީ 59 އިންސައްތަ ބޯލް ޕޮޒެޝަން ހިފަހައްޓައިގެން. ބްރެޒިލްގެ ކުޅުންތެރިންނާއި ދެކޮޅަށް ސާބިއާ އިން 12 ފައުލެއް ކުރި. ސާބިއާގެ ތިން ކުޅުންތެރިންނަށް ރީނދޫ ކާޑު ދައްކާފައިވޭ.

މި މެޗުން ބްރެޒިލް މޮޅުވިއިރު އެޓީމުން މިހާތަނަށް ފީފާ ވޯލްޑް ކަޕުގައި ކުޅުނު މެޗު ތަކުގެ ތެރެއިން 74 މެޗު ކާމިޔާބު ކޮށްފައިވާއިރު، މި އަދަދަށް އެހެން ޓީމަކަށް މޮޅު ހޯދިފައެއް ނުވޭ. ބްރެޒިލް އިން މިހާތަނަށް ވޯލްޑް ކަޕުގައި 110 މެޗު ކުޅެފައިވޭ. ވިން ރޭޝިއޯ އަށް ބަލާލާއިރު މިއީ 67.89 އިންސައްތަ ވިން ރޭޝިއޯ އެއް.

ބްރެޒިލް އަކީ 1982 ވަނަ އަހަރުން ފެށިގެން މިހާ ތަނަށް ކުޅުނު ހުރިހާ ވޯލްޑް ކަޕެއްގައިވެސް އެ ޓީމު ހިމެނޭ ގުރޫޕުގެ އެއްވަނަ މަގާމު ހޯދައި، ދެވަނަ ބުރަށް ދަތުރުކުރާ ޓީމެއް.

73 ވަނަ މިނެޓު: ރިޗާލިސަންގެ ހިތްގައިމު ގޯލަކުން ބްރެޒިލް އިން ލީޑު ފުޅާކޮށްފި. މިއީ ވިނީޝިއުސް ނަގައިދިން ހިތްގައިމު މޮޅު ހުރުމެއް ކޮންޓްރޯލް ކޮށްލުމަށްފަހު މައްޗަށް ހިއްލާލާ، ބައިސިކަލް ކިކަކުން ބޯޅަ ގޯލުގެ ތެރެއަށް ފޮނުވާލައިގެން ރިޗާލިސަން ކާމިޔާބު ކުރި ލަނޑެއް. މިއީ ގައުމީ ޖާޒީގައި ރިޗާލިސަންގެ 19 ވަނަ ލަނޑު. ވޯލްޑް ކަޕުގައި އޭނާގެ ދެވަނަ ލަނޑު.

70 ވަނަ މިނެޓު: މެޗުގައި ބްރެޒިލް އިން މިހާތަނަށް 15 ހަމަލާއެއް އުފައްދާފައިވާއިރު، އެޓީމުން ކުޅެން އަރާ ތިބި ކުޅުންތެރިންގެ ތެރެއިން ހަމަލާއެއް އުފެއްދިފައި ނުވަނީ ހަމައެކަނި ޑިފެންޑަރު މާކީނިއޯސް އަށާއި ލޫކަސް ޕަކޭޓާ އަށް.

62 ވަނަ މިނެޓު: ބްރެޒިލް އިން މެޗުގައި ލަނޑު ޖަހާ ލީޑު ނަގައިފި. މިއީ ނޭމާގެ މޮޅު ކުޅުމަކުން ތަނަވަސްވި ފުރުސަތެއްގައި ވިނީޝިއުސް ފޮނުވާލި ހަމަލާއެއް ކީޕަރުގެ އަތުގައި ޖެހިފައި ނުކުތުމުން، ރިބައުންސް ބޯޅަ ގޯލުގެ ތެރެއަށް ވައްދާލައިގެން ރިޗާލިސަން ޖެހި ލަނޑެއް. މިއީ ރިޗާލިސަން ބްރެޒިލްގެ ގައުމީ ޖާޒީގައި ޖެހި 18 ވަނަ ލަނޑު އަދި ވޯލްޑް ކަޕުގައި ޖެހި ފުރަތަމަ ލަނޑު.

60 ވަނަ މިނެޓު: އޭރިއާގެ މާ ބޭރުން އެލެކްސް ސާންޑްރޯ ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށް. މިއީ މިހާތަނަށް މި މެޗުގައި ފެނުނު އެންމެ ނުރައްކާތެރި ހަމަލާ.

ދަނޑަށް ވަދެހުރި ބްރެޒިލްގެ ސަޕޯޓަރެއް.

ދެވަނަ ހާފު ފަށައިގެން މިނެޓެއްވެސް ނުވަނީސް ބްރެޒިލް އަށް ލަނޑު ޖަހާނެ ރަނުގެ ފުރުސަތެއް. ސާބިއާގެ ޑިފެންޑަރަކު ހެދި ގޯހެއްގެ ފައިދާ ނަގައިގެން މުޅިން ހުސްކޮށް ހުރެ އޭރިއާ ތެރެއަށް ވަދެ ރަފީނިއާ ފޮނުވާލި ހަމަލާ ހުއްޓުވީ ސާބިއާގެ ކީޕަރު މިލިންކޮވިޗް.

ބްރެޒިލްގެ ނޭމާ އަކީ މިފަހަރުގެ ވޯލްޑް ކަޕުގައި އެއް ކުޅުންތެރިއަކަށް އިދިކޮޅު ޓީމުން އެންމެ ގިނަ ފައުލު ކުރި ދެ ކުޅުންތެރިންގެ ތެރެއިން އެއް ކުޅުންތެރިއާ. އެއީ ފަސް ފައުލު. މި އަދަދަށް ދެން ފައުލް ތަކާއި ކުރިމަތިލާން ޖެހުނީ ސްޕެއިން އިން ކޮސްޓަ ރިކާ އާއި ބައްދަލުކުރި މެޗުގައި ތަފާތު މޮޅު ކުޅުމެއް ދެއްކި ޒުވާން މިޑްފީލްޑަރު ގަވީއާ.

ބްރެޒިލް އިން ފުރަތަމަ ހާފުގައި ހަތަރު ހަމަލާ އުފެއްދިއިރު މިއީ 2010 ވަނަ އަހަރުގެ ވޯލްޑް ކަޕުގައި އައިވަރީ ކޯސްޓްއާ ދެކޮޅަށް ކުޅުނު މެޗަށްފަހު ވޯލްޑް ކަޕުގެ ގްރޫޕް ސްޓޭޖު މެޗެއްގެ ފުރަތަމަ ހާފުގައި އެންމެ މަދުން ހަމަލާ އުފެއްދި ފަހަރު.

45 މިނެޓުގެ ކުޅުން ހަމަވެ އިތުރުވަގުތުގެ ގޮތުގައި ދެއްކީ އެންމެ މިނެޓެއް.

މެޗުގައި ބްރެޒިލް އިން 30 ވަނަ މިނެޓާއި ހަމައަށްވެސް ފުލުފުލުގައި ގިނަ ފުރުސަތުތަކެއް ތަނަވަސް ކުރަމުން އަންނައިރު، އެ ޓީމަށް ކުރިމަތިވާ ހަމައެކަނި ގޮންޖެހުމަކީ ގޯލާއި ދިމާލަށް ބޯޅަ ފޮނުވާ ނުލެވުން.

ބްރެޒިލްގެ ކެޕްޓަން ތިއާގޯ ސިލްވާ އަކީ މި މެޗުގައި އޭނާ ކުޅުމުން، ބްރެޒިލްގެ ޖާޒީގައި ކުޅޭ އެންމެ އުމުރުން ދޮށި ކުޅުންތެރިޔާ. އެއީ 38 އަހަރާއި 63 ދުވަހުން.

ފީފާ ވޯލްޑް ކަޕުގެ އެންމެ ކާމިޔާބު ޓީމު ބްރެޒިލް އިން ސާބިއާ އާއި ދެކޮޅަށް ނުކުންނަ މެޗުގައި ދެ ޓީމުން ބޭނުންކުރާ ފުރަތަމަ 11.