ޕެޝަން ފުރުޓު ނުވަތަ ޖުމުްހޫރީ މޭވާއަކީ ރާއްޖޭގެ ކޮންމެ ހިސާބެއްގައިވެސް ހައްދާ މޭވާއެކެވެ. ދިވެހިންގެ ގިނަ ބަޔަކަށް މީރު މި މޭވާ ގިނައިން ބޭނުންކުރަނީ ފަނި ގިރުމަށެވެ. މިއީ ވަރަށް ރަހަމީރު އަދި ރެސްޓޯރެންޓުތަކުގައިވެސް އެންމެ މަގުބޫލު ބުއިމެވެ. ނަމަވެސް ޕެޝަން ފުރުޓުން ކުރާ ފައިދާތައް އެނގެނީ ކޮން ބަޔަކަށްތޯ މިއީ ސުވާލު އުފެދޭ ކަމެކެވެ.
ޕެޝަން ފުރުޓުގައި ގިނަ އަދަދަކަށް އެންޓިއޮކްސިޑެންޓް އެކުލެވިގެންވެއެވެ. މިއީ ހަށިގަނޑުގައި އުފެދޭ ސެލްތައް ރައްކާތެރިކޮށްދޭ، ހަށިގަނޑަށް މުހިއްމު މާއްދާއެކެވެ. ހަށިގަނޑުގައި ލޭ ހިނގުން އިތުރުކޮށްދީ، ހާއްސަކޮށް ސިކުނޑިއަށް ލޭ ފޮނުވައިދިނުމަށް މި މާއްދާ އެހީތެރިވެދެއެވެ. މީގެ އިތުރުން، އެންޓިއޮކްސިޑެންޓަކީ ސްޓްރެސް ފިލުވައިދިނުމަށާއި ހަށިގަނޑުގައި އުފެދޭ ބެކްޓީރިއާތަކުން ރައްކާތެރިވެ ހުރުމަށް އެހީތެރިވެދޭ މާއްދާއެކެވެ. އެހެންކަމުން ސްޓްރެސް ފިލުވައިލުމަށާއި އިންފެކްޝަންތަކުން ރައްކާތެރިވެ ހުރުމަށް ޕެޝަން ފުރުޓު ބޭނުންކުރެވިދާނެއެވެ.
ހަމައެއާއެކު، ޕެޝަން ފުރުޓުގައި ގިނަ އަދަދަކަށް ފައިބަރު އެކުލެވިގެންވެއެވެ. ހާއްސަކޮށް ޑައިޓްކުރާ ފަރާތްތަކަށް މި މޭވާ ވަރަށް މުހިންމެވެ. ގިނަ އަދަދަކަށް ފައިބަރު އެކުލެވިގެންވުމުން ކާބޯތަކެތި އަވަހަށް ހަޖަމްކުރުމަށް އެހީވެދީ، ބަނޑުހިކުމުން މި މާއްދާ ރައްކާތެރިކޮށްދެއެވެ. އެހެންކަމުން، ފާހާނާ ކުރުމުގައި ދިމާވާ މައްސަލަތަކަށްވެސް ޕެޝަން ފުރުޓަކީ ހައްލެކެވެ. އަދި ފައިބަރުގެ ސަބަބުން ކޮލެސްޓްރޯލް ދަށްކޮށްދީ ހިތުގެ ދުޅަހެޔޮކަންވެސް އިތުރުކޮށްދެއެވެ.
އަދި، މި މޭވާއަކީ ގިނަ އަދަދެއްގެ ވިޓަމިން އެކުލެވިގެންވާ މޭވާއަކަށްވާއިރު، ވިޓަމިން އޭ ގެ ސަބަބުން ހަންގަނޑު ރީތިކޮށް ހުރުމުށާއި ލޮލުގެ ފެނުން ރަނގަޅުކޮށްދެއެވެ.
އެހެންކަމުން ނަފުސާނީ ދުޅަހެޔޮކަމަށާއި ތަފާތު ބަލިތަކުން ރައްކާތެރިވެ ހުރުމަށް މި މޭވާއަކީ ކޮންމެ ދުވަހަކުވެސް ކެއުމުގައި ބޭނުންކުރުމަށް މުހިންމު މޭވާއެކެވެ. ނިކަން އަޖުމަ ބަލައިލުމަށް ކޮންމެ ދުވަހެއްގެ ކެއުމުގައި މި މޭވާ ހިމަނަބަލާށެވެ.