ސުޕްރީމް ކޯޓުގައި މިއަދު ކުރިއަށް ގެންދިޔަ އެ މައްސަލައިގެ ފަހު އަޑުއެހުމުގައި ވަނީ އިސްތުއުނާފް ކުރާ ފަރާތުން އެދުނު ގޮތަށް ޖޫރިމަނާ ދެއްކުން ފަސްކޮށްދިނުމުގެ އަމުރެއް ނެރެދީފައެވެ.
އެގޮތުން ރައީސް ޔާމީނަށް ކޮށްފައިވާ ޖޫރިމަނާއާ ގުޅޭ ގޮތުން އެއްވެސް ފިޔަވަޅެއް ދައުލަތުގެ އިދާރާއަކުން ނޭޅުމަށް ވަނީ އަމަރުކޮށްފައެވެ. އެގޮތަށް އަމުރުކޮށްފައިވަނީ ތިން ފަނޑިޔާރުންގެ އިއްތިފާގުންނެވެ.
ފަސް މިލިއަން ޑޮލަރުގެ ޖޫރިމަނާއެއް ދައްކަވަން އެންގި ނަމަވެސް އެ ފައިސާ ދައްކަވާފައި ނުވާތީ، އެޓާނީ ޖެނެރަލް އޮފީހުގެ ފަރާތުން ސިވިލް ކޯޓަށް ހުށަހެޅި މައްސަލަ މާދަމާ ހައި ކޯޓުގައި ފެށުމަށް އޮތީ ތާވަލްކޮށްފައެވެ. ސުޕްރީމް ކޯޓުގެ ހުކުމާއި އެކު އެ މައްސަލަ މަޑުޖެހިގެންދާނެއެވެ.
ރައީސް ޔާމީންގެ ފަރާތުން އޮތީ ހުކުމް ތަންފީޒު ކުރުން ފަސްކުރުމުގެ އަމުރެއް ނެރެދިނުމަށް ވެސް އެދިފައެވެ. ނަމަވެސް އެފަދަ އަމުރެއް ނެރެން ޖެހޭ ހަލާތެއް ނެތް ކަމަށް ތިން ފަނޑިޔާރުން ވަނީ އެއްބަސްވެފައެވެ.
އެޓާނީ ޖެނެރަލްގެ އޮފީހުން މީގެ ކުރިން ބުނީ، ރައީސް ޔާމީންގެ މައްޗަށް ކުރި ހުކުމުގައި ވަނީ، ހުކުމް ކުރާތާ މަދުވެގެން ހަ މަސް ތެރޭ މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އަށް ފައިސާ ދެއްކުމަށް ކަމަށެވެ. ނަމަވެސް ޔާމީން އެ ފައިސާ ދައްކަވާފައި ނުވެއެވެ.
އޭގެ ފަހުން، ޖޫރިމަނާގެ ފައިސާ 30 ދުވަހުގެ ތެރޭގައި ދެއްކުމަށް މީރާއިން ރައީސް ޔާމީނަށް އެންގި ނަމަވެސް، އަދިވެސް ފައިސާ ހަވާލު ކުރައްވާފައި ނުވެއެވެ.
އެހެންކަމުން އެޓާނީ ޖެނެރަލްގެ އޮފީހުން ވަނީ ކްރިމިނަލް ކޯޓުގެ ހުކުމް ތަންފީޒުކޮށް ދިނުމަށް އެދި ސިވިލް ކޯޓަށް މައްސަލަ ހުށަހަޅާފައެވެ. އެގޮތުން ޖޫރިމަނާގެ ގޮތުގައި ދައްކަން ޖެހޭ ފަސް މިލިއަން ޑޮލަރު އެކީ އެއް ފަހަރާ ދައުލަތަށް ދެއްކުމަށް އަމުުރު ކޮށްދިނުމަށް އެދިފައިވެއެވެ.
އޭޖީ އޮފީހުން އެ މައްސަލަ ހުށަހެޅީ ޓެކްސް ނެގުމާ ބެހޭ އިދާރީ ގާނޫނުގެ 50 ވަނަ މާއްދާގެ (ބ)ގެ ދަށުންނެވެ.
އެ މާއްދާގައި ބުނެފައި ވަނީ، އެހެން ގާނޫނެއްގައި އެހެން ގޮތަކަށް ބަޔާންކޮށްފައިވީ ނަމަވެސް، އެ މާއްދާގައި ބަޔާން ކުރާ ޓެކްސް ފިޔަވައި އެހެނިހެން ފައިސާގެ ތެރެއިން ދައުލަތަށް ލިބެން ޖެހި ނުލިބިވާ ފައިސާއެއް، އެ ފައިސާއެއް ދައްކަން ޖެހޭ މުއްދަތުގައި ދައްކާފައި ނުވާނަމަ، އެ ފައިސާ ޝަރީއަތް މެދުވެރިކޮށް ހޯދުމުގެ އިހުތިޔާރު ބަންޑާރަނައިބަށް ލިބިގެންވާ ކަމަށެވެ.
ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ ރައީސް ޔާމީން ފަސް އަހަރަށް ޖަލަށް ލުމަށާއި ޖޫރިމަނާ ކުރުމަށް ކްރިމިނަލް ކޯޓުން ހުކުމް ކުރީ، ނޮވެމްބަރު 28، 2019ގައެވެ.
އެ މައްސަލަ އެމަނިކުފާނުގެ ފަރާތުން ހައިކޯޓުގައި އިސްތިއުނާފު ކުރުމުން އެ މައްސަލަ ބަލައި ކްރިމިނަލް ކޯޓުގެ ހުކުމަށް ހައިކޯޓުން ތާއީދު ކުރީ މިއަހަރުގެ ޖެނުއަރީ 21ގައިއެވެ. އެއަށްފަހު އެ ހުކުމް އެމަނިކުފާނުގެ ފަރާތުން ވަނީ ސުޕްރީމް ކޯޓުގައި އިސްތިއުނާފު ކުރަން ހުށަހަޅައިފައެވެ.